ដោយៈ រ៉ាណេត
ភ្នំពេញៈ ក្រសួងទេសចរណ៍បានទទួលស្គាល់ការថយចុះនៃចំនួនភ្ញៀវទេសចរដែលចូលទស្សនាតំបន់អង្គរជាលើកដំបូង ហើយបានដាក់ចេញផែនការថ្មីជាមួយបណ្តាស្ថាប័នពាក់ព័ន្ធមួយចំនួន ក៏ដូចជាអង្គការ UNESCO ប្រចាំនៅកម្ពុជា បានរៀបចំផែនការយុទ្ធសាស្ត្រជាថ្មី ដើម្បីលើកស្ទួយវិស័យមួយនេះឱ្យមានភាពល្អប្រសើរឡើងវិញ។
កាលពីឆ្នាំ២០១៨ កម្ពុជាទទួលបានទេសចរអន្តរជាតិប្រមាណ៦,២លាននាក់ ក្នុងកំណើន១១% ក្នុងនោះខេត្តសៀមរាបទទួលបានភ្ញៀវអន្តរជាតិប្រមាណ ២,៥៩លាននាក់ កើនឡើង៥,៤៣%។ រយៈពេល៦ខែដើមឆ្នាំ២០១៩នេះ ភ្ញៀវទេសចរដែលទៅខេត្តសៀមរាបមានប្រមាណ ១,២៤លាននាក់ ថយចុះ៨.២៩%។
-->
រដ្ឋមន្ត្រីក្រសួងទេសចរណ៍ លោកថោង ខុនបានមានប្រសាសន៍ក្នុងកិច្ចប្រជុំជាមួយស្ថាប័នពាក់ព័ន្ឋកាលពីថ្ងៃទី៣១ កក្កដាកន្លងមកថា យើងមានបញ្ហាជាច្រើនដែលត្រូវពិភាក្សា ប៉ុន្តែបញ្ហាសំខាន់មុនគេ គឺសៀមរាបត្រូវការការអភិវឌ្ឍផលិតផលទេសចរណ៍ថ្មីៗបន្ថែមទៀត ដើម្បីទាក់ទាញភ្ញៀវទេសចរ និងពន្យារការស្នាក់នៅរបស់ពួកគេ។ លោកបានបន្តទៀតថា កាលពីឆ្នាំ២០១៨កន្លងមក ដើម្បីទ្រទ្រង់កំណើនភ្ញៀវទេសចរមកកម្សាន្តនៅខេត្តសៀមរាប រាជរដ្ឋាភិបាលបានសម្រេចបង្កើតក្រុមការងារអន្តរក្រសួងមួយ ដើម្បីសិក្សារៀបចំផែនការមេអភិវឌ្ឍទេសចរណ៍ខេត្តសៀមរាប ដែលមានក្រសួងទេសចរណ៍ជាប្រធាន ហើយច្ចុប្បន្នក្រុមការងារជំនាញ បាននិងកំពុងសិក្សារៀបចំផែនការមេនេះយ៉ាងសកម្ម។
ផែនការមេ នឹងផ្តោតជាសំខាន់លើការអភិវឌ្ឍខេត្តសៀមរាប ជាពិសេសក្រុងសៀមរាបជាទីក្រុងទេសចរណ៍ ជាទីក្រុងបេតិកភណ្ឌ និងជាទីក្រុងដែលគិតគូរពីបរិស្ថាន (Eco-City) ដែលត្រូវធ្វើសមាហរណកម្មទាំងលើទិដ្ឋភាពសេដ្ឋកិច្ច សង្គម វប្បធម៌ បរិស្ថាន និងស្ថាបត្យកម្ម និងការធ្វើសមាហរណកម្មជាមួយផែនការគ្រប់គ្រងតំបន់អង្គរ (TMP) របស់អាជ្ញាធរជាតិអប្សរាផងដែរ។ ទន្ទឹមនឹងនេះក្រសួងទេសចរណ៍បាន និងកំពុងសហការជាមួយភាគីពាក់ព័ន្ធ រៀបចំការងារមួយចំនួន ដើម្បីជំរុញការអភិវឌ្ឍវិស័យទេសចរណ៍ខេត្តសៀមរាបរួមមាន។
ទី១- ការជំរុញការអភិវឌ្ឍតំបន់ទេសចរណ៍ជុំវិញក្រុងសៀមរាប ជាពិសេសតំបន់ព្រែកទាល់ បឹងទន្លេសាប ភ្នំគូលែន និងសហគមន៍ទេសចរណ៍នានា ដើម្បីបង្កើតផលិតផលទេសចរណ៍ថ្មីៗ និងពន្យារពេលស្នាក់នៅរបស់ភ្ញៀវទេសចរ។ ទី២ ជំរុញឲ្យការអភិវឌ្ឍហេដ្ឋារចនាសម្ព័ន្ធនានាក្នុងខេត្ត ដោយត្រូវធ្វើការជួសជុលផ្លូវ សិក្សារៀបចំប្រព័ន្ធផ្គត់ផ្គង់ទឹក និងអគ្គីសនីឲ្យបានគ្រប់គ្រាន់ និងត្រូវរៀបចំប្រព័ន្ធគ្រប់គ្រងសំណល់រឹង និងរាវឲ្យបានត្រឹមត្រូវតាមស្តង់ដាបរិស្ថាន រៀបចំចំណតរថយន្ត បង្គន់អនាម័យសាធារណៈ គ្រប់គ្រងមធ្យោបាយដឹកជញ្ជូន សណ្តាប់ធ្នាប់របៀបរៀបរយសាធារណៈក្នុងទីក្រុង។ល។
ទី៣- ការពង្រឹងគុណភាពសេវាកម្មទេសចរណ៍ និងធនធានមនុស្សក្នុងវិស័យទេសចរណ៍ ឆ្លើយតបនឹងកំណើនភ្ញៀវទេសចរ ដោយត្រូវពង្រឹងគុណភាពសាលាបណ្តុះបណ្តាលជំនាញវិជ្ជាជីវៈទេសចរណ៍ ការបណ្តុះបណ្តាលផ្ទៃក្នុង និងជំរុញការអនុវត្តស្តង់ដាអាស៊ានក្នុងវិស័យទេសចរណ៍ជាដើម។
លោកសាស្រ្តាចារ្យ Azédine BESCHAOUCH លេខាធិការអចិន្ទ្រៃយ៍នៃ ICC-Angkor បានស្នើឱ្យក្រសួងទេសចរណ៍ លើកបង្ហាញនូវគម្រោងផែនការមេរៀបចំអភិវឌ្ឍន៍ខេត្តសៀមរាប និងផែនការយុទ្ធសាស្ត្រនានា នៅក្នុងកិច្ចប្រជុំពេញអង្គរបស់គណៈកម្មាធិការ ICC ដែលនឹងប្រារព្ធឡើងនាអំឡុងខែធ្នូ ឆ្នាំ២០១៩ ខាងមុខ។ លោកសាស្រ្តាចារ្យក៏បានស្នើឱ្យមានកិច្ចសហប្រតិបត្តិការល្អ លើការរៀបចំផែនការគ្រប់គ្រងតំបន់អង្គរមានជាអាទិ៍ បញ្ជរគ្រប់គ្រងភ្ញៀវមុនចូលទស្សនាប្រាសាទ ការបែងចែកខ្សែទស្សនកិច្ច ចំណតនៅមុខប្រាសាទអង្គរវត្ត បណ្ដាញគមនាគមន៍នៅប្រាសាទបាយ័ន្ត លានជល់ដំរី ប្រាសាទព្រះពិធូ និងនៅតំបន់ភ្នំគូលែន ក៏ដូចជាការរៀបចំប្រព័ន្ធអ៉ីនធើណេត Wifi ការរៀបចំគម្រោងព្រលានយន្តហោះអន្តរជាតិថ្មីនៅខេត្តសៀមរាបផងដែរ។
តាមការឱ្យដឹងពីសំណាក់គណៈ គ្រប់គ្រងសណ្ឋាគារមួយចំនួននៅក្រុងសៀមរាបបាននិយាយក្នុងលក្ខខណ្ឌសុំមិនបញ្ចេញឈ្មោះថា វាជារឿងប្រសើរដែលក្រសួងទេសចរណ៍ចាប់ផ្តើមទទួលស្គាល់បញ្ហានេះ ព្រោះតួលេខបង្ហាញដោយក្រសួងកន្លងមក ហាក់មានតែតួលេខ។ លោកបន្តថា ការកើនឡើងនៃចំនួនតួលេខនៃចំនួនភ្ញៀវទេសចរនៅក្រុងសៀមរាប ដែលចេញដោយក្រសួងទេសចរកាលពីពេលកន្លងទៅ វាគ្រាន់តែជាចំនួនសិប្បនិម្មិតតែប៉ុណ្ណោះ ប៉ុន្តែចំនួនពិតប្រាកដត្រូវបានធ្លាក់ចុះយ៉ាងគំហុក។
ប្រភពដដែលបានបញ្ជាក់ទៀតថា “ប្រសើនបើមន្ត្រីក្រសួងចង់ដឹងច្បាស់អាចចុះធ្វើការអង្កេតនៅតាមបណ្តាសណ្ឋាគារ ឬផ្ទះសំណាក់នានាដែលស្ថិតនៅតំបន់ល្បីៗ នៃក្រុងអង្គរ ក៏ដូចជាក្រុងសៀមរាម នោះពួកគេនឹងនិយាយបញ្ជាក់ពីរឿងនេះ”៕
