ដោយៈ រ៉ាណេត
ភ្នំពេញៈ មន្ត្រីជាន់ខ្ពស់ក្រសួងសាធារណៈការ និងដឹកជញ្ជូនកម្ពុជា ថៃបានជួបពិភាក្សាការងារស៊ីជម្រៅ ដើម្បីបើកច្រករបៀងសេដ្ឋកិច្ចបន្ថែមដែលស្ថិតនៅភាគខាងកើត និងតភ្ជាប់បណ្តាញហេដ្ឋារចនាសម្ព័ន្ធ រវាងកំពង់ផែស្វយ័តក្រុងព្រះសីហនុ និងកំពង់ផែសមុទ្រទឹកជ្រៅ លឹមឆាបាងនៃព្រះរាជាណាចក្រថៃ។
ជំនួបពិភាក្សានេះ ធ្វើឡើងដើម្បីស្វែងយល់អំពីសក្តានុពល និងកិច្ចសហប្រតិបត្តិការលើការតភ្ជាប់បណ្តាញហេដ្ឋារចនាសម្ព័ន្ធ រវាងកំពង់ផែស្វយ័តក្រុងព្រះសីហនុ និងកំពង់ផែសមុទ្រទឹកជ្រៅ លឹមឆាបាងនៃព្រះរាជាណាចក្រថៃ។
រដ្ឋលេខាធិការប្រចាំការក្រសួងសាធារណការ និងដឹកជញ្ជូន លោកតូច ចាន់កុសលបានបញ្ជាក់ប្រាប់លោកស្រី Nongnuth Phetchratana ទីប្រឹក្សាពិសេសក្រសួងការបរទេសថៃទទួលបន្ទុកច្រករបៀងសេដ្ឋកិច្ចខាងកើតថា ការបើកឱ្យមានដំណើរការជាផ្លូវការនូវច្រករបៀងសេដ្ឋកិច្ចខាងកើតនេះ វាបានជួយបង្កើននិងជំរុញវិស័យដឹកជញ្ជូនកាន់ល្អប្រសើរ ជាពិសេសបង្កើនការវិនិយោគ និងទំហំពាណិជ្ជកម្មរវាងប្រទេសទាំង២ និងអាចបម្រើផលប្រយោជន៍ ដល់វិស័យសេដ្ឋកិច្ចឱ្យមានកំណើន ។
លោកបន្តថា ជាមួយគ្នានេះផងដែរ លោកក៏បានស្នើឱ្យមានកិច្ចពិភាក្សាបន្ថែមលើទំនាក់ទំនង និងកិច្ចសហប្រតិបត្តិការទ្វេភាគីជាមួយភាគីពាក់ព័ន្ធ ដើម្បីស្វែងយល់បន្ថែមទៀតពីនីតិវិធីរវាងប្រទេសទាំងពីរ និងឱកាសវិនិយោគប្រកបដោយសក្តានុពល។
លោកស្រី Nongnuth Phetchratana បានសន្យាយកគោលបំណងខាងលើនេះទៅពិចារណាជាមួយថ្នាក់ដឹកនាំកំពូលរបស់ប្រទេសថៃ ដោយបង្ហាញពីចេតនាល្អក្នុងកិច្ចសហការផងដែរ។
លោកតូច ចាន់កុសល ក៏គូសបញ្ជាក់ពីសារសំខាន់នៃគម្រោងធ្វើឱ្យប្រសើរឡើង បណ្តាញហេដ្ឋារចនាសម្ព័ន្ធតភ្ជាប់របស់កម្ពុជាជាមួយថៃ រួមមាន គម្រោងផ្លូវធ្វើឱ្យប្រសើរឡើងផ្លូវជាតិលេខ៥ ពី២គន្លងទៅ៤គន្លង ផ្លូវជាតិលេខ៤៨ ពីផ្លូវបំបែកស្រែអំបិល ទៅខេត្តកោះកុង គម្រោងស្ពាន ស្ទឹងបត់និងផ្លូវតភ្ជាប់ និងគម្រោងសាងសង់ផ្លូវពីខេត្តបាត់ដំបង ទៅខេត្តកោះកុងដើម្បីកាត់បន្ថយពេល វេលានៃការដឹកជញ្ជូនពីខេត្តប៉ៃលិនទៅកាន់កំពង់ផែទឹកជ្រៅ ៕
