ដោយ ៖ រ៉ាណេត
ភ្នំពេញ ៖ ការធ្វើអាជីវកម្មដោយការបង្កើតម៉ាកសញ្ញាផលិតផលផ្ទាល់ខ្លួននៅកម្ពុជាកំពុងតែមានការចាប់អារម្មណ៍ជាខ្លាំង ដែលក្នុងនោះមានអ្នកខ្លះបានដំណើរការដោយស្របច្បាប់ ហើយអ្នកខ្លះទៀតប្រាសចាកពីនីតិវិធីច្បាប់ ដែលអាចជះឥទ្ធិពលអាក្រក់ដល់ដំណើរអាជីវកម្មរបស់ខ្លួន។
អគ្គនាយកក្រុមហ៊ុន Luxury Smile Group លោកឧកញ៉ា ចិត្រ សេរីសុភ័ក្ត្រ បានមានប្រសាសន៍ប្រាប់ឱ្យដឹងថា ការបង្កើតម៉ាកសញ្ញាផលិតផលផ្ទាល់ខ្លួនវាគឺជារឿងល្អដែលម្ចាស់ អាជីវកម្មគួរតែធ្វើ។ ប៉ុន្តែត្រូវតែប្រាកដថាដំណើរការនៃការបង្កើតម៉ាកសញ្ញាទាំងងអស់នោះត្រូវបានធ្វើឡើង ស្របច្បាប់ ដែលកំណត់។ លោកឧកញ៉ាបានបន្តទៀតថា “ការបង្កើតម៉ាកសញ្ញាទៅលើផលិតផល គឺជាយុទ្ធសាស្ត្រដ៏ល្អក្នុងការបង្កើនការចាប់អារម្មណ៍និងងាយធ្វើឱ្យគេឆាប់ស្គាល់ផលិតផលនៅលើទីផ្សារ។
-->
លោកបន្តទៀតថា “នៅក្នុងប្រទេសកម្ពុជា គឺមានការកំណត់ច្បាប់ត្រឹមត្រូវពីក្រសួងពាណិជ្ជកម្ម និងនិងក្រសួងមហាផ្ទៃទៅលើការបង្កើតម៉ាកសញ្ញា ប៉ុន្តែភាគច្រើនត្រូវបានអាស្រ័យនៅប្រទេសជិតខាងដើម្បីផលិត ជាពិសេស ប្រទេសថៃ ដោយសារតែនៅកម្ពុជាមិនសូវមានរោងចក្រជំនាញ។
លោកបានបន្តទៀតថា “ការស្នើសុំឯកសារច្បាប់ស្ដីពីការបង្កើតម៉ាកសញ្ញាពីក្រសួងនៅក្នុងប្រទេសកម្ពុជា គឺជានីតិវិធីមួយ ប៉ុន្តែក៏ត្រូវស្នើសុំសិទ្ធិផលិត និងការត្រួតពិនិត្យគុណភាពពីស្ថាប័នជំនាញនៅក្នុងប្រទេសថៃផងដែរ។ លោកបន្តថា “បន្ថែមពីនេះ ក្រោយពេលផលិតចេញជាផលិតផលស្របទៅតាមម៉ាកសញ្ញា នៅមានការអនុវត្តតាមនីតិវិធីមួយចំនួនទៀតដើម្បីធ្វើការនាំចូលមកកាន់កម្ពុជាដើម្បីធ្វើការចែកចាយទៅលើទីផ្សារ។
ពាក់ព័ន្ធទៅនឹងការបង្កើតម៉ាកសញ្ញាផលិតផលនេះផងដែរ បច្ចុប្បន្នកំពុងតែមានសកម្មភាពផុសផុលជាច្រើនពីសំណាក់ម្ចាស់អាជីវកម្ម ដែលក្នុងភាគច្រើនត្រូវបានដាក់លក់នៅតាមបណ្តាញ Online ហើយក៏មានអ្នកខ្លះមិនបានអនុវត្តទៅតាមការកំណត់របស់ក្រសួងផងដែរ។
លោកឧកញ៉ា ចិត្រ សេរីសុភ័ក្ត្រ ដែលម្ចាស់ក្រុមហ៊ុនទទួលប្រឹក្សា និងបង្កើតម៉ាកសញ្ញាផលិតផលបានមានប្រសាសន៍ថា “នៅក្នុងករណីអនុវត្តមិនបានត្រឹមទៅតាមការកំណត់របស់ក្រសួងគឺមានន័យថា ខុសច្បាប់ និងត្រូវប្រឈមលើការផាកពិន័យ ឬទទួលទោសផ្សេងៗទៀតអាស្រ័យទៅតាមការកំណត់របស់ច្បាប់។
លោកឧកញ៉ាបានបន្តទៀតថា “ករណីអនុវត្តផ្ទុយពីច្បាប់ ឬបង្កើតម៉ាកសញ្ញាដោយមិនមានសុំការអនុញ្ញាត គឺជាការធ្វើជំនួញ ឬធ្វើអាជីវកម្មទាំងភាពប្រថុយប្រថាន វាងាយស្រួលចំណេញ ប៉ុន្តែក៏ងាយស្រួលខាតបង់ផងដែរ ជាក់ស្ដែងកាលពីពេលកន្លងទៅនេះ ធ្លាប់មានការចុះបិតទីតាំងក្រុមហ៊ុនមួយចំនួនរួចមកហើយដែលលួចបង្កើតម៉ាកសញ្ញាខុសច្បាប់។
លោកឧកញ៉ាបានបញ្ជាក់ថា “ការបង្កើតម៉ាកសញ្ញាផលិតផលស្របច្បាប់ មិនតម្រូវចំណាយពេល ឬថវិកាច្រើនលើសលប់នោះទេ ហើយម្យ៉ាងទៀត ក្នុងករណីដែលម្ចាស់អាជីវកម្មមិនជ្រាប់ពីនីតិវិធីច្បាប់ គឺត្រូវពឹងអ្នកជំនាញដែលជាក្រុមហ៊ុនប្រឹក្សាស្របច្បាប់ជាជំនួយ។ លោកបន្តទៀតថា “ម្ចាស់អាជីវកម្មក៏អាចទទួលបានការជួយរៀបចំផែនការអាជីវកម្មប្រកបដោយនិរន្តភាព ទាំងផ្នែកហិរញ្ញវត្ថុ ការគ្រប់គ្រងធនធានមនុស្ស ក៏ដូចជាយុទ្ធសាស្ត្រក្នុងការបញ្ជ្រៀតផលិតផលចូលទៅក្នុងទីផ្សារផងដែរ។
លោកឧកញ៉ាបានសង្កត់ធ្ងន់ថា “បើចង់ធ្វើជំនួញដោយភាគជោគជ័យ និងយូរអង្វែង ត្រូវធ្វើតាមគោលការណ៍ច្បាប់កំណត់ ជាពិសេសសហការជាមួយក្រុមហ៊ុនជំនាញ ជៀសវាងការធ្វើអាជីវកម្មទាំងភាពប្រថុយប្រថាន ដែលងាយនឹងប្រឈមចំពោះមុខច្បាប់ ខាត់បង់ទាំងទ្រព្យសម្បត្តិ និងខូចទាំងកេរ្តិ៍ឈ្មោះ”៕
