ប្រទេសថៃ-ឡាវចាប់ផ្តើមតភ្ជាប់ផ្លូវដែកដឹកជញ្ជូនទំនិញ
ភ្នំពេញ៖ ប្រទេសថៃ-ឡាវចាប់ផ្តើមតភ្ជាប់ផ្លូវដែកដឹកជញ្ជូនទំនិញឆ្លងកាត់ស្ពានមិត្តភាពឡាវ-ថៃ (Thai-Lao Friendship Bridge) តភ្ជាប់ពីស្ថាននីយ៍រថភ្លើងថៃ Nong Khai ទៅកាន់ព្រំប្រទល់ឡាវ។
មន្ត្រីជាន់ខ្ពស់នៃដឹកជញ្ជូនផ្លូវដែកថៃ លោក Worawut Mala បានឱ្យដឹងកាលពីកន្លងទៅថ្មីៗនេះ ថាការដាក់ឱ្យដំណើរផ្លូវដែកដឹកជញ្ជូនទំនិញនេះ គឺស្របទៅនឹងផែនការអភិវឌ្ឍរបស់ប្រទេសទាំងពីរ លើវិស័យដឹកជញ្ជូនពីកំពង់ផែ Laem Chabang ទៅកាន់មជ្ឈមណ្ឌលផ្ទុកកុងទីណ័រ Container Yard Center នៅស្ថានីយ៍ Tha Na Laeng ក្នុងទីក្រុងវៀងច័ន្ទ។
លោក Worawut បានបន្តថា សេវាកម្មរថភ្លើងដឹកទំនិញត្រូវបានគេចាត់ទុកថា ជាការដឹកជញ្ជូនផ្លូវដែកដែលទទួលបានជោគជ័យ និងអាចរក្សាទំនាក់ទំនងប្រទេសជិតខាងទាំងពីរ និងស្របនឹងផែនការប្រែក្លាយរបស់ប្រទេសថៃទៅជាមជ្ឈមណ្ឌលពាណិជ្ជកម្ម និងដឹកជញ្ជូនសម្រាប់ប្រទេសនៅមហាអនុតំបន់មេគង្គ។
-->
លោក Worawut បានបន្ថែមទៀតថា រថភ្លើងឆ្លងកាត់ព្រំដែនដែលរត់លើផ្លូវប្រវែង ៣.៥គីឡូម៉ែត្រ ដែលធ្លាប់តែដឹកអ្នកដំណើរ តែចាប់ពីពេលនេះទៅអាចដឹកទំនិញបានផងដែរដោយមានរថភ្លើងចំនួន ៤ ធ្វើដំណើរជារៀងរាល់ថ្ងៃ។
មន្ត្រីមកពីនាយកដ្ឋានផ្លូវដែកឡាវ លោក Sengthavisay Malivanh បានឱ្យដឹងដែរថា នេះគឺជាកិច្ចសហប្រតិបត្តិការផ្នែកដឹកជញ្ជូន និងសេដ្ឋកិច្ចរវាងរដ្ឋាភិបាលឡាវនិងថៃ។ រថភ្លើងនេះនឹងដំណើរការសេវាកម្មប្រចាំថ្ងៃឆ្លងកាត់ទន្លេមេគង្គហើយកុងទីណ័រប្រហែលពី ១០ ទៅ ២០ គ្រឿងនឹងត្រូវដឹកជញ្ជូនចេញចូលទៅក្នុងប្រទេសឡាវ។
យោងតាមកិច្ចព្រមព្រៀងកិច្ចសហប្រតិបត្តិការដឹកជញ្ជូនរវាងរដ្ឋាភិបាលឡាវ និងទីភ្នាក់ងារអភិវឌ្ឍន៍សេដ្ឋកិច្ចប្រទេសជិតខាង (NEDA) របស់ប្រទេសថៃបានឱ្យដឹងថា ការសាងសង់ផ្លូវដែកពីតំបន់ Thanaleng ទៅស្ថានីយ៍វៀងចន្ទន៍ដែលមានប្រវែងជាង ៧.៥ គីឡូម៉ែត្រត្រូវបានចុះហត្ថលេខាកាលពីថ្ងៃទី ២៨ ខែកក្កដាឆ្នាំ ២០១៩កន្លងមកនេះនឹងចាប់ផ្តើមនៅខែតុលាឆ្នាំ ២០១៩ និងបញ្ចប់នៅខែធ្នូឆ្នាំ ២០២១ ។
នាយកដ្ឋានដឹកជញ្ជូននៃប្រទេសទាំងពីរបានសម្របសម្រួលគ្នាយ៉ាងជិតស្និតដើម្បីសម្រួលដល់គម្រោងដែលចាំបាច់សម្រាប់សេវាកម្ផ្លូវដែកដឹកជញ្ជូនទំនិញចិន-ឡាវ និងចិន-ថៃដែលនឹងមកដល់បន្ទាប់ពីផ្លូវដែកដឹកជញ្ជូនទំនិញចិន-ឡាវនឹងត្រូវបញ្ចប់នៅខែធ្នូឆ្នាំ ២០២១៕
