ដោយ ម៉ាណេត
វៀតណាមៈ មន្ត្រីទទួលបន្ទុកកិច្ចការខាងក្រៅប្រទេស មកពីរដ្ឋសភាវៀតណាម ឡាវ និងកម្ពុជាបានប្រមូលផ្តុំគ្នានៅខេត្ត Quang Ninh ភាគខាងជើងវៀតណាមនៅថ្ងៃទី ១៧ ខែសីហា ក្នុងសន្និសីទលើកទី ៧ របស់ពួកគេដែលផ្តោតលើតួនាទីរបស់សភាក្នុងការសម្រេចកិច្ចព្រមព្រៀង ដែលសម្រេចបានដោយប្រទេសទាំងបី នៅក្នុងតំបន់អភិវឌ្ឍន៍ត្រីកោណ។
ថ្លែងក្នុងពិធីនេះអនុប្រធានរដ្ឋសភាលោកស្រី Tong Thi Phong បានលើកឡើងថា ចំពេលមានការវិវឌ្ឍន៍ដ៏ស្មុគស្មាញ និងមិនអាចមើលឃើញទុកជាមុននៅក្នុងតំបន់ និងពិភពលោក វៀតណាម ឡាវ និងកម្ពុជាបានសម្របសម្រួលយ៉ាងសកម្ម និងគាំទ្រគ្នាដើម្បីភាពជាដៃគូរឹងមាំ។
លោកស្រីបានកត់សម្គាល់ថា គំនិតផ្តួចផ្តើមតំបន់អភិវឌ្ឍន៍ត្រីកោណ ដែលពាក់ព័ន្ធនឹងតំបន់ព្រំដែននៃប្រទេសទាំងបី បានមើលឃើញលទ្ធផលជាផ្លែផ្កា ក្នុងការទាញយកសក្តានុពល និងគុណសម្បត្តិរបស់មូលដ្ឋាន ដែលរួមចំណែកដល់កំណើននៅក្នុងប្រទេសនីមួយៗក៏ដូចជាសហគមន៍អាស៊ានផងដែរ។
លោកស្រី Phong បានកោតសរសើរចំពោះកិច្ចសហការ ក្នុងចំណោមគណៈកម្មាធិការ សម្រាប់ទំនាក់ទំនងខាងក្រៅនៃរដ្ឋសភាវៀតណាម ឡាវ និងកម្ពុជាក្នុងរយៈពេលប៉ុន្មានឆ្នាំកន្លងមកនេះ ដែលបានបង្ហាញនូវការប្តេជ្ញាចិត្តដ៏រឹងមាំ របស់រដ្ឋសភាទាំងបីក្នុងការជំរុញចំណងទាក់ទងរបស់ពួកគេ ក្នុងលក្ខណៈស៊ីជម្រៅ និងជាក់ស្តែង។
សន្និសីទរយៈពេល២ថ្ងៃ ដែលបានប្រារព្ធខួបលើកទី២០ នៃគំនិតផ្តួចផ្តើមនេះក៏មានគោលបំណងវាយតម្លៃប្រសិទ្ធភាព ក្នុងការអនុវត្តកិច្ចព្រមព្រៀងនានា ក្នុងចំណោមប្រទេសទាំងបី និងបង្ហាញទិសដៅសម្រាប់កិច្ចសហប្រតិបត្តិការនាពេលអនាគត។
លោក Phong បានគូសបញ្ជាក់ថា កិច្ចសហប្រតិបត្តិការតំបន់ត្រីកោណអភិវឌ្ឍន៍ក្នុងរយៈពេលពីរទសវត្សរ៍កន្លងមក បានជួយបង្រួមគម្លាតអភិវឌ្ឍន៍ និងពង្រឹងការអភិវឌ្ឍសេដ្ឋកិច្ចសង្គមនៅក្នុងប្រទេសទាំងបី ក៏ដូចជាពង្រឹងភាពជាអ្នកជិតខាងដ៏ជិតស្និទ្ធ។
ទោះបីជាមានទំហំសេដ្ឋកិច្ចតូចក៏ដោយ តំបន់អភិវឌ្ឍន៍ត្រីកោណទាំង១៣បានបង្ហាញពីការខិតខំប្រឹងប្រែង ក្នុងការកែលំអការរៀបចំរចនាសម្ព័ន្ធសេដ្ឋកិច្ច ប្រព័ន្ធហេដ្ឋារចនាសម្ព័ន្ធការអប់រំ ការថែរក្សាសុខភាព វប្បធម៌ និងការការពារបរិស្ថាន។
រហូតមកដល់ពេលនេះ ក្រុមហ៊ុនវៀតណាមបានបោះទុនវិនិយោគចំនួន ៣,៦ពាន់លានដុល្លារអាមេរិក ក្នុងគម្រោងចំនួន១១៦ នៅក្នុងស្រុកឡាវ និងកម្ពុជានៅតំបន់នោះ។
តំណាងមកពីប្រទេសកម្ពុជា និងឡាវបានឯកភាពគ្នាលើលទ្ធផលជាវិជ្ជមានក្នុងភាពជាដៃគូក្នុងចំណោមរដ្ឋសភានៃប្រទេសទាំងបី។
ទោះជាយ៉ាងណាក៏ដោយ អ្នកចូលរួមក្នុងព្រឹត្តិការណ៍នេះ បានចង្អុលបង្ហាញពីបញ្ហាមួយចំនួន ដែលត្រូវធ្វើឱ្យប្រសើរឡើងនៅក្នុងកិច្ចសហប្រតិបត្តិការ រួមមាន ការតភ្ជាប់ហេដ្ឋារចនាសម្ព័ន្ធ គុណភាពធនធានមនុស្សធនធានផ្សេងៗ និងគោលនយោបាយមិនស្ថិតស្ថេរស្ថានភាពសន្តិ សុខស្មុគស្មាញ និងការរត់ពន្ធ និងការក្លែងបន្លំពាណិជ្ជកម្ម។
ពួកគេបានសង្កត់ធ្ងន់លើភាពចាំបាច់ ដើម្បីវាយតម្លៃគុណសម្បត្តិ ក៏ដូចជា ការលំបាក និងបញ្ហាប្រឈមក្នុងការអនុវត្តកិច្ចព្រមព្រៀង ដូច្នេះរៀបចំផែនការ និងដំណោះស្រាយថ្មីៗ ដើម្បីឆ្លើយតបនឹងស្ថានភាពថ្មី និងជំរុញការវិនិយោគកិច្ច សហប្រតិបត្តិការពាណិជ្ជកម្ម និងការតភ្ជាប់ហេដ្ឋារចនាសម្ព័ន្ធនៅក្នុងតំបន់។
ជាមួយគ្នានេះដែរ គណៈកម្មាធិការជាតិទំនាក់ទំនងខាងក្រៅប្រទេស នៃរដ្ឋសភាប្រទេសទាំងបីគួរតែចែករំលែកបទពិសោធន៍ និងបង្កើនការផ្លាស់ប្តូរព័ត៌មានជាមួយគណៈកម្មាធិការសម្របសម្រួល តំបន់អភិវឌ្ឍន៍ត្រីកោណកម្ពុជា ឡាវ នឹងវៀតណាម។
តំបន់អភិវឌ្ឍន៍ត្រីកោណកម្ពុជា ឡាវ នឹងវៀតណាមមានក្រុមចំនួន១៣តំបន់ ដែលមានផ្ទៃដីសរុប១៤៤.៣០០ ម៉ែត្រក្រឡាស្មើនឹង១៩,៣ ភាគរយនៃតំបន់ធម្មជាតិសរុបរបស់ប្រទេសទាំង៣ និងមានប្រជាជនជាង៧លាននាក់។
រហូតមកដល់ពេលនេះ ប្រទេសទាំងបីបានធ្វើកិច្ចប្រជុំកំពូលចំនួន១០នៅកម្រិតនាយករដ្ឋមន្ត្រីនៅលើតំបន់នេះ រួមជាមួយកិច្ចប្រជុំថ្នាក់រដ្ឋមន្ត្រីចំនួន១២ ដែលបានបង្កើតលទ្ធផលប្រកបដោយផ្លែផ្កានៅក្នុងវិស័យជាច្រើន៕
