ដោយៈ រ៉ាណេត
ភ្នំពេញៈ រដ្ឋាភិបាលបានសម្រេចគាំទ្រលើគម្រោងអភិវឌ្ឍន៍តំបន់ពាណិជ្ជកម្ម និងរមណីយដ្ឋានទេសចរណ៍ លើផ្ទៃដីសរុបទំហំ ១០៦៦ហិកតា ដែលមានទីតាំងភូមិសាស្រ្តសង្កាត់កោះរ៉ុងសន្លឹម ខណ្ឌព្រះសីហនុ ក្រុងព្រះសីហនុ។
រដ្ឋាភិបាលសម្រេចឲ្យក្រុមហ៊ុនធំមួយអភិវឌ្ឍន៍តំបន់ពាណិជ្ជកម្ម និងរមណីយដ្ឋានទេសចរណ៍នៅកោះរ៉ុងសន្លឹម
បន្ទាប់ពីបានឆ្លងកាត់កិច្ចប្រជុំអន្តរក្រសួង ដែលដឹកនាំដោយលោកសាបូ អូហ្សាណូ រដ្ឋលេខាធិការនៃក្រសួងបរិស្ថាន ជាមួយនឹងមន្ត្រីក្រសួងរៀបចំដែនដីនគរូបនីយកម្ម និងសំណង់ ក្រសួងសេដ្ឋកិច្ច និងហិរញ្ញវត្ថុ ក្រសួងធនធានទឹក ក្រសួងសាធារណៈការ និងដឹកជញ្ជូន ក្រសួងបណ្តុះបណ្តាលវិជ្ជាជីវៈ មន្ត្រីតំណាង CDC រួមជាមួយមន្ត្រីអជ្ញាធរ កាលពីថ្ងៃទី ២៦ ខែសីហា ម្សិលមិញនេះ បានឱ្យដឹងថា គម្រោងអភិវឌ្ឍន៍តំបន់ពាណិជ្ជកម្ម និងរមណីយដ្ឋានទេសចរណ៍នេះ ត្រូវបានសម្រេចគាំទ្រទាំងស្រុង។
គម្រោងអភិវឌ្ឍមួយនេះជារបស់ក្រុមហ៊ុន KOH RONG SANLOEM ISLAND RESORTS CO., LTD. ដែលត្រូវបានសិក្សា និងវាយតម្លៃដោយក្រុមហ៊ុនទីប្រឹក្សា អ ស៊ី ប៊ី ស៊ី ស៊ី។ ជាលទ្ធផល នៃអង្គប្រជុំ បានសម្រេច ដូចខាងក្រោម ទី១.ជារួម អង្គប្រជុំមានការគាំទ្រសម្រាប់គម្រោង។ ទី២. ក្រុមហ៊ុនត្រូវរក្សាទុកព្រៃកោងកាងទាំងអស់ទៅតាមសំណើរបស់រដ្ឋបាលជលផល ព្រោះផ្ទៃដីព្រៃកោងកាង ហើយនាយកដ្ឋានវាយតម្លៃហេតុប៉ះពាល់បរិស្ថាន ត្រូវធ្វើលិខិតជូនដំណឹងស្ដីពី គម្រោងអភិវឌ្ឍន៍ទៅអគ្គនាយកដ្ឋានរដ្ឋបាលការពារ និងអភិរក្ស និងតំបន់ឆ្នេរ ដើម្បីពិនិត្យ និងមានមតិយោបល់ជាមុនសិន។
ទី៣.ក្រុមហ៊ុនម្ចាស់គម្រោង ត្រូវរង់ចាំការឯកភាព និងអនុញ្ញាតទៅលើប្លង់មេស្ដីពីការសាងសង់ពីក្រសួងដែនដី នគរូបនីយកម្ម និងសំណង់ ជាមុនសិន មុននឹងចាប់ផ្ដើមសកម្មភាពសាងសង់ផ្សេងៗ។ ទី៤.ក្រុមហ៊ុន ត្រូវអនុវត្ត និងគោរពតាមច្បាប់គ្រប់គ្រងតំបន់ការពារតំបន់ឆ្នេរ។ ទី៥.កិច្ចគាំពារបរិស្ថាននៅតំបន់កោះរ៉ុងសន្លឹមនេះ បញ្ហាសំខាន់គឺការគ្រប់គ្រងសំណល់រឹង និងសំណល់រាវ។
ដូចនេះស្នើសុំឱ្យនាយកដ្ឋានគ្រប់គ្រងសំណល់រឹង ពិនិត្យមើលទៅលើបទដ្ឋានបច្ចេកទេសទុកដាក់ និងដឹកជញ្ជូនពីកោះរ៉ុងសន្លឹមមកដីគោក។ ចំពោះសំណល់រាវ យើងគាំទ្រឱ្យមានអាងប្រព្រឹត្តកម្មសំណល់រាវ ប៉ុន្ដែក្នុងដំណាក់កាលដំបូងដែលអាងប្រព្រឹត្តកម្មធំមិនទាន់សាងសង់រួច ក្រុមហ៊ុនត្រូវមានអាងប្រព្រឹត្តកម្មខ្នាតតូច ដែលទទួលស្គាល់ដោយមន្ទីរបរិស្ថានខេត្តព្រះសីហនុ។ ក្រុមហ៊ុនមិនត្រូវបង្ហូរសំណល់រាវចូលសមុទ្រដោយមិនបានឆ្លងកាត់អាងប្រព្រឹត្តកម្មឡើយ។
និង៦. ក្រុមហ៊ុនម្ចាស់គម្រោង ត្រូវគិតគូរអំពីការរៀបចំបណ្ណ័ ប.ស.ស ជូនបុគ្គលិក និងកម្មករក្នុងគម្រោង៕
