ដោយ វុត្ថា
ខេត្តព្រះសីហនុៈ ក្រុមហ៊ុនRIC NATURAL DEVELOPMEBT PLC និងក្រុមហ៊ុនវិនិយោគបរទេសសឹង្ហបុរី និងម៉ាឡេស៊ីមានបំណងវិនិយោគ លើគម្រោងកែច្នៃសំរាមផលិតថាមពលអគ្គិសនី គម្រោងជីវឥន្ធនៈ និងអភិវឌ្ឍន៍កំពង់ផែទូកទេសចរណ៍ទំនើបនៅខេត្តព្រះសហនុ ព្រោះខេត្តព្រះសីហនុ កំពុងមានការទាក់ទាញភ្ញៀវទេសចរ ពិសេសភ្ញៀវទេសចរចិនច្រើនជាងគេ ក្នុងចំណោមភ្ញៀវទេសចរបរទេស។
លោក DATO MAH KASENG ក្រុមហ៊ុន RIC NATURAL DEVELOPMEBT PLC នៅក្នុងជំនួបជាមួយលោក គួច ចំរើន អភិបាលខេត្តព្រះសីហនុ កាលពីថ្ងៃទី២៦ ខែសីហា ឆ្នាំ ២០១៩ម្សិលមិញបានបញ្ជាក់ថា ក្រុមហ៊ុនរបស់លោក មានគម្រោងវិនិយោគលើការកែច្នៃសំរាម ផលិតថាមពលអគ្គិសនី ហើយក្រុមហ៊ុនកំពុងដាក់ឱ្យដំណើរការនៅប្រទេសថៃទទួលបានជោគជ័យ និងកំពុងបង្កើតរោងចក្រផលិតអគ្គិសនី ចេញពីសំរាមនៅក្នុងប្រទេសឡាវ។
-->
លោកបន្តថា ក្រុមហ៊ុនចង់មកធ្វើការកែច្នៃសំរាម ផលិតជាថាមពលអគ្គិសនីនៅ ខេត្ដព្រះសីហនុ ព្រោះការវិនិយោគក្នុងខេត្តព្រះសីហនុ មានសន្ទុះកើនឡើង សំរាមក៏វាមានការកើនឡើងផងដែរ ទន្ទឹមនឹងការកែច្នៃសំរាម ក៏មានគម្រោងវិនិយោគជីវឥន្ធនៈនៅខេត្តព្រះសីហនុ ដោយក្រុមហ៊ុន (ម៉ាឡេស៊ី) និងគម្រោងអភិវឌ្ឍន៍កំពង់ផែទូកទេសចរណ៍ទំនើបដោយក្រុមហ៊ុន (ប្រទេសសឹង្ហបុរី)។
លោក គួច ចំរើន អភិបាលខេត្តព្រះសីហនុ ស្វាគមន៍ចំពោះគម្រោងវិនិយោគនៅខេត្តព្រះសីហនុ ព្រោះសំរាមនាពេលបច្ចុប្បន្ន ក្នុងមួយថ្ងៃមានជាង ១.០០០តោន ហើយវានឹងអាចកើនឡើងបន្ថែមទៀត ក៏ប៉ុន្តែក្រុមហ៊ុនត្រូវសិក្សាគម្រោងឱ្យបានស៊ីជម្រៅអំពីទីផ្សារ ដើម្បីឈានទៅសម្រេចគោលដៅក្នុងការវិនិយោគកែច្នៃសំរាម ជាថាមពលអគ្គិសនីឱ្យមានប្រសិទ្ធិភាព ហើយមន្ត្រីរបស់យើងនឹងធ្វើការពិភាក្សាតាមជំនាញនីមួយៗ ដើម្បីឈានទៅអនុវត្តគម្រោងទាំង៣ខាងលើ។
លោកអភិបាលខេត្តបានបញ្ជាក់ថា ក្រុមហ៊ុនត្រូវសិក្សាអំពីសំរាម ដើម្បីផលិតថាមពលអគ្គិសនី១៥០មេហ្កាវ៉ាត់ តើត្រូវប្រើប្រាស់សំរាមប៉ុន្មានតោន ដើម្បីយើងមានមូលដ្ឋានក្នុងការប្រមូលសំរាម និងឈានទៅបង្កើតរោងចក្រកែច្នៃសំរាម ផលិតថាមពលអគ្គិសនី ពិសេសក្រុមហ៊ុន មានប្រភពសេដ្ឋកិច្ចក្នុងការសាងសង់ រោងចក្រកែច្នៃសំរាម ។ ដោយឡែកចំពោះក្រុមហ៊ុនជីវឥន្ទនៈ ត្រូវសិក្សាទីផ្សារ ដើម្បីធ្វើការក្រកួតប្រជែងជាមួយក្រុមហ៊ុននានា នៅកម្ពុជាឱ្យមានតម្លាភាព និងការអភិវឌ្ឍផែទូកទេសចរណ៍ទំនើប បន្តពិភាក្សាជាមួយមន្ត្រីមន្ទីរទេសចរណ៍៕
