ដោយ Donald Lee
ភ្នំពេញៈ ក្រុមហ៊ុន Fast Retailing ដែលមានមូលដ្ឋាននៅប្រទេសជប៉ុន និងជាក្រុមហ៊ុនមេរបស់ក្រុមហ៊ុនសម្លៀកបំពាក់យីហោUniqlo និងជាក្រុមហ៊ុនផលិតសម្លៀកបំពាក់ធំជាងគេទីបីនៅលើពិភពលោក កំពុងស្វែងរកការផ្លាស់ប្តូរខ្សែសង្វាក់ផ្គត់ផ្គង់របស់ខ្លួនចេញពីប្រទេសចិនមកកាន់កម្ពុជា និងវៀតណាម បន្ទាប់ពីពន្ធរបស់អាមេរិកលើការនាំចូលសម្លៀកបំពាក់ចិនត្រូវបានអនុម័តកាលពីថ្ងៃអាទិត្យ។
ក្រុមហ៊ុន Fast Retailing មានការសហការជាច្រើនរួចហើយ ជាមួយរោងចក្រកាត់ដេរជាច្រើន ដែលកំពុងប្រតិបត្តិការនៅខេត្តកំពង់ឆ្នាំង កណ្តាល តាកែវ បាវិត ខេត្តកំពង់ស្ពឺ និងភ្នំពេញ។
ការពិភាក្សាអំពីការចាកចេញពីចិនកំពុងកើតឡើង នៅពេលដែលរដ្ឋាភិបាលអាមេរិក បានដំឡើងពន្ធលើទំនិញចិន ដែលរួមមានវិស័យសម្លៀកបំពាក់រហូតដល់ទៅ១៥ ភាគរយ។
នាយកប្រតិបត្តិ Fast Retailing និយាយក្នុងលក្ខខណ្ឌមិនបញ្ចេញឈ្មោះជាមួយកាសែត Nikkei ជប៉ុនថា “នាយកប្រតិបត្តិអាមេរិករបស់យើងបានមកដល់ជប៉ុន ដូច្នេះយើងអាចពិភាក្សាពីកម្រិតនៃផលប៉ះពាល់ និងវិធីឆ្លើយតប”។
ប្រភពអនាមិកមួយផ្សេងទៀត នៅក្នុងក្រុមហ៊ុនជប៉ុនបាននិយាយថា “យើងនៅតែពឹងផ្អែកចិនសម្រាប់វត្ថុធាតុដើម ដូច្នេះយើងអាចមើលឃើញថ្លៃដើមខ្ពស់ ក្នុងការផ្គត់ផ្គង់ និងក្នុងការដឹកជញ្ជូនផលិតផលសម្រេចទៅអាមេរិក”។
យោងតាមទិន្នន័យរបស់ក្រុមហ៊ុន Fast Retailing បានឱ្យដឹងថា អាមេរិកគឺជាទីផ្សារដ៏សំខាន់មួយ សម្រាប់ក្រុមហ៊ុន Fast Retailing ដែលបានផ្តល់ប្រាក់ចំណូលជិត ៨៥០លានដុល្លារដល់ក្រុមហ៊ុននេះ។
ក្រុមហ៊ុនលក់រាយ និងក្រុមហ៊ុនលក់រាយធំៗនៅអាមេរិក បានបន្តថ្កោលទោសចំពោះការបន្តធ្វើពាណិជ្ជកម្មរបស់ប្រធានាធិបតីអាមេរិកលោក Donald Trump ដោយបញ្ជាក់ថា វាកំពុងធ្វើឱ្យប៉ះពាល់ដល់សេដ្ឋកិច្ច និងអ្នកប្រើប្រាស់អាមេរិក។
លិខិតមួយពីបណ្តាក្រុមហ៊ុន Amercans for Free Trade ដែលជាសម្ព័ន្ធភាពរបស់ក្រុមហ៊ុនធំៗអាមេរិក ដែលបានផ្ញើរទៅកាន់ប្រធានាធិបតីសហរដ្ឋអាមេរិក បានលើកឡើងថា “យើងយល់ពីការអាក់អន់ចិត្តរបស់អ្នកជាមួយប្រទេសចិន ហើយប្រឆាំងនឹងពន្ធដែលរដ្ឋាភិបាលចិនបានដាក់ផងដែរ។ ប៉ុន្តែក្រុមហ៊ុនអាមេរិក កម្មករដែលពួកគេជួល និងអ្នកប្រើប្រាស់ដែលពួកគេបម្រើឱ្យពន្ធថ្មី និងមិនធ្លាប់មានពីមុន នាំយើងមិនទទួលបានកិច្ចព្រមព្រៀងណាមួយឡើយ”។
លិខិតនេះបានបន្ថែមថា “ការបញ្ជាឱ្យក្រុមហ៊ុនចាកចេញពីចិន ដែលជាប្រទេសមានសេដ្ឋកិច្ចលំដាប់ទី២នៅលើពិភពលោក មិនមែនជាដំណោះស្រាយទេ ហើយមិនមានភាពប្រាកដប្រជា”៕
