ក្រសួងពាណិជ្ជកម្មចាប់ផ្ដើមដាក់ចេញយុទ្ធសាស្ត្រក្នុងការធ្វើពាណិជ្ជកម្មតាមប្រព័ន្ធឌីជីថល
ដោយ ៖ រ៉ាណេត
ភ្នំពេញ ៖ ជាការសម្រួល និងជំរុញដល់ដំណើរការនៃការធ្វើអាជីវកម្ម និងពាណិជ្ជកម្មកាន់តែមានភាពល្អប្រសើរ និងលឿនរហ័សប្រកបដោយតម្លាភាព ក្រសួងពាណិជ្ជកម្មបានសម្រេចចាប់ផ្តើមរៀបចំយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក។
នៅក្នុងកិច្ចប្រជុំពិនិត្យ និងផ្ដល់សុពលភាពលើឯកសារទស្សនទានយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក នៅទីស្ដីការក្រសួងពាណិជ្ជកម្ម កាលពីថ្ងៃទី២ ខែកញ្ញា ឆ្នាំ២០១៩ ម្សិលមិញនេះ លោកស្រី តឹករ៉េត កំរង បានមានប្រសាសន៍ថា ការវិវឌ្ឍន៍ដ៏លឿននៃបច្ចេកវិទ្យា និងនវានុវត្ដន៍ឌីជីថល បានបង្កើតឡើងនូវកាលានុវត្តភាព ក៏ដូចជាការប្រឈមជាច្រើន ដែលទាមទារឱ្យមានការគិតគូរច្បាស់លាស់ លើការប្រព្រឹត្តទៅនៃការងារនានា ដែលពឹងផ្អែកបច្ចេកវិទ្យាជាមធ្យោបាយ។
-->
លោកស្រីបានបន្តទៀតថា “ការងារទាំងនេះ ត្រូវបានរំលេចយ៉ាងច្បាស់លាស់ ប្រកបដោយចក្ខុវិស័យវែងឆ្ងាយ នៅក្នុងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលអាណត្តិទី៦ ត្រង់មុំទី៣ ដែលតម្រូវឱ្យមានការពិនិត្យ និងត្រៀមខ្លួនសម្រាប់សេដ្ឋកិច្ចឌីជីថល និងឆ្លើយតបនឹងបដិវត្តន៍ឧស្សាហកម្មទី៤”។
ជាកិច្ចឆ្លើយតប និងចូលរួមវិភាគទានទៅលើការសម្រេចបាននូវគោលដៅអាទិភាពទាំងនោះ ក្រសួងពាណិជ្ជកម្មបានសម្រេចចិត្តធ្វើការរៀបចំយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក ដើម្បីជាផែនទីបង្ហាញផ្លូវមួយច្បាស់លាស់ដល់ការអភិវឌ្ឍវិស័យពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។
ការរៀបចំយុទ្ធសាស្ត្រនេះដែរ ក៏ជាតម្រូវការដ៏សំខាន់ និងឆ្លើយតបទៅនឹងអនុសាសន៍មួយចំនួនទៀត នៅក្នុងឯកសារ និងយុទ្ធសាស្ត្រផ្សេងៗ ដូចជា ឯកសារ Cambodia eTrade Readiness Assessment ដែលបានរៀបចំឡើងដោយអង្គការ UNCTAD នៅឆ្នាំ២០១៧ និងថ្មីៗនេះ នៅក្នុងយុទ្ធសាស្ត្រសមាហរណកម្មពាណិជ្ជកម្មកម្ពុជា ២០១៩-២០២៣ ជាពិសេសជំពូកទី១១ ស្ដីពីពាណិជ្ជកម្មអេឡិចត្រូនិក និងជំពូកទី១២ ស្ដីពីសេដ្ឋកិច្ចឌីជីថល និងបដិវត្តន៍ឧស្សាហកម្មទី៤។
លើសពីនោះទៀត យុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក ក៏ឆ្លើយតបទៅនឹងតម្រូវការរបស់វិស័យឯកជន ដែលត្រូវការឯកសារមួយសម្រាប់បញ្ជាក់ជូនអំពីចក្ខុវិស័យ និងគោលនយោបាយរបស់រដ្ឋាភិបាល ក្នុងការអភិវឌ្ឍវិស័យនេះ ដែលវិស័យឯកជនជាចលករមួយយ៉ាងសំខាន់ សំដៅជំរុញដល់ការប្រព្រឹត្តទៅនៃការធ្វើពាណិជ្ជកម្មតាមរយៈការប្រើប្រាស់បច្ចេកវិទ្យា។
ជាមួយគ្នានេះ លោកស្រី តឹករ៉េត កំរង បានបញ្ជាក់ថា ការរៀបចំយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិកនៅវេលានេះ ជាការមួយដ៏ត្រឹមត្រូវ គាប់ជួនជាមួយនឹងការជិតសម្រេចបាននូវច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិក ហើយសេចក្ដីព្រាងច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិក បានឆ្លងផុតកិច្ចប្រជុំជាមួយគណៈកម្មការជំនាញនៃរដ្ឋសភារួចហើយ នឹងត្រូវបញ្ជូនបន្តដើម្បីស្នើសុំការអនុម័តដោយរដ្ឋសភាក្នុងពេលដ៏ខ្លីខាងមុខនេះ៕
