ដោយ វុត្ថា
ភ្នំពេញៈ ក្នុងរយៈពេល៥ឆ្នាំចុងក្រោយនេះ រដ្ឋាភិបាលអូស្ត្រាលីបានផ្តល់ហិរញ្ញប្បទានប្រមាណ ៥៦លានដុល្លារអាមេរិក ក្នុងមួយឆ្នាំដល់កម្ពុជាដែលបានរួមចំណែកក្នុងការអភិវឌ្ឍសង្គម និងសេដ្ឋកិច្ចរបស់កម្ពុជា។
យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា (CDC) ចេញផ្សាយកាលពីកន្លងមកនេះបានឱ្យដឹងថា ផែនការហិរញ្ញប្បទានថ្មីរបស់អូស្ត្រាលី សម្រាប់ការវិនិយោគនៅកម្ពុជា នឹងបន្តចូលរួមគាំទ្ររាជរដ្ឋាភិបាល ដើម្បីចាកចេញពីក្រុមប្រទេសមានអភិវឌ្ឍតិចតួច និងសម្រេចគោលដៅជាប្រទេសមានចំណូលមធ្យម កម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
-->
លោកឈៀង យ៉ាណារ៉ា រដ្ឋមន្ដ្រីប្រតិភូអមនាយករដ្ឋមន្ដ្រី និងជាអគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា នៅក្នុងជំនួបជាមួយ លោក Luke Arnold អនុប្រធានបេសកកម្ម នៃស្ថានទូតអូស្ដ្រាលីប្រចាំនៅកម្ពុជា កាលពីកន្លងទៅថ្មីៗនេះ បានផ្លាស់ប្ដូរយោបល់លើសេចក្ដីព្រាង ឯកសារទស្សនទានស្ដីពី ផែនការហិរញ្ញប្បទានសម្រាប់វិនិយោគនៅកម្ពុជា ឆ្នាំ២០២០-២០២៤។
សេចក្ដីព្រាងឯកសារទស្សនទាននេះ ជារបៀបវារៈសំខាន់មួយសម្រាប់ការពិភាក្សាក្នុងកិច្ចប្រជុំពិគ្រោះយោបល់ថ្នាក់ឧត្ដមមន្ដ្រីកម្ពុជា-អូស្ដ្រាលី លើកទី១ (Senior Officials’ Talks) ដែលនឹងប្រព្រឹត្ដទៅនាថ្ងៃទី១៦-១៧ ខែកញ្ញាឆ្នាំ២០១៩ នៅទីក្រុងខេនបេរ៉ា ប្រទេសអូស្ដ្រាលី។
លោកបានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ភាគីអូស្ត្រីលី ក្នុងការរៀបចំសេចក្តីព្រាងឯកសារទស្សនទាននេះ ដែលបានផ្តល់មូលដ្ឋានសម្រាប់ពិភាក្សា និងរៀបចំផែនការ ហិរញ្ញវប្បទានសម្រាប់ការវិនិយោគនៅកម្ពុជា សម្រាប់ឆ្នាំ ២០២០-២០២៤។
ភាគីទាំងពីបានឯកភាពជាគោលការណ៍លើគោលដៅ និងគោលបំណង ដូចបានរំលេចក្នុងឯកសារទស្សនទាននេះ។ គោលដៅ និងគោលបំណងទាំងនេះ គឺមានសង្គតិភាពជាមួយអាទិភាពរបស់រាជរដ្ឋាភិបាល ដូចមានចែងក្នុងយុទ្ធសាស្ត្រចតុកោណដំណាក់កាលទី៤ និងផែនការយុទ្ធសាស្ត្រអភិវឌ្ឍន៍ជាតិ ឆ្នាំ ២០១៩-២០២៣៕
