ដោយ Donald Lee
ភ្នំពេញៈ រដ្ឋាភិបាលកាណាដា បានតែងតាំងឯកអគ្គរដ្ឋទូតថ្មី ប្រចាំប្រទេសចិន ខណៈទំនាក់ទំនងខ្លួនជាមួយចិន បានប្រែទៅជាវិបត្តិនៅឆ្នាំនេះ បន្ទាប់ពីការចាប់ខ្លួននាយកប្រតិបត្តិក្រុមហ៊ុន Huawei តាមសំណើរបស់រដ្ឋាភិបាលអាមេរិក ដែលនាំឱ្យមានការបណ្តេញឯកអគ្គរដ្ឋទូតមួយរូបចេញពីចិន។
រដ្ឋាភិបាលបានតែងតាំងលោក Dominic Barton ឱ្យកាន់តំណែងអ្នកការទូតជាន់ខ្ពស់នៅក្នុងប្រទេសចិន ដើម្បីជំនួសលោកឯកអគ្គរដ្ឋទូត John McCallum ដែលត្រូវបានបណ្តេញចេញកាលពីខែ មករា ពីបទធ្វើអត្ថាធិប្បាយប្រឆាំង នឹងការសម្រេចចិត្តរបស់រដ្ឋាភិបាលកាណាដា ក្នុងការចាប់ខ្លួនលោកស្រី Meng Wanzhou ដែលជានាយកប្រតិបត្តិកំពូលរបស់ក្រុមហ៊ុនបច្ចេកវិទ្យាយក្ស Huawei និងជាកូនស្រីរបស់សេដ្ឋីស្ថាបនិកតាមសំណើរបស់អាមេរិក។
-->
លោកស្រី Wanzhou នៅតែស្ថិតនៅក្នុងកាណាដា ដែលជាប់នៅក្នុងសមរភូមិផ្លូវច្បាប់ ដើម្បីប្រយុទ្ធប្រឆាំងនឹងការធ្វើបត្យាប័ននាងទៅកាន់អាមេរិក។
ក្រុមអ្នកច្បាប់របស់លោកស្រី Wanzhou បានថ្លែងថា “ការចាប់ខ្លួន និងការធ្វើបត្យាប័នលោកស្រី ត្រូវបានបញ្ជាដោយរដ្ឋាភិបាលអាមេរិក ដើម្បីបន្តផលប្រយោជន៍នយោបាយ និងសេដ្ឋកិច្ចរបស់ខ្លួននៅក្នុងសង្គ្រាមពាណិជ្ជកម្មរវាងអាមេរិក និងចិននៅឆ្នាំនេះ”។
ឯកសាររបស់តុលាការកាណាដា បានលើកឡើងអំពីករណីផ្លូវច្បាប់របស់លោកស្រីថា “អាមេរិកកំពុងព្យាយាមប្រើនីតិវិធីបត្យាប័នទាំងនេះ ដើម្បីកេងចំណេញផ្នែកសេដ្ឋកិច្ច និងនយោបាយ”។
អាមេរិកបានចុះក្នុងបញ្ជីខ្មៅក្រុមហ៊ុន Huawei នៅឆ្នាំនេះ ដោយសារភាពតានតឹងសង្គ្រាមពាណិជ្ជកម្មបានកើនឡើង។
ជាការសងសឹកចំពោះការចាប់ខ្លួននាយកប្រតិបត្តិក្រុមហ៊ុន Huawei ចិនបានចាប់ខ្លួនជនជាតិកាណាដាលោក Michael Kovrig និងលោក Michael Spavor យ៉ាងរហ័ស ហើយបានធ្វើពហិការ ចំពោះការទិញផលិតផលកសិកម្មសំខាន់ៗ របស់កាណាដាដូចជាប្រេង Canola និងសាច់។
ឯកអគ្គរដ្ឋទូតថ្មី Barton បានចំណាយពេលជាច្រើនឆ្នាំ នៅទីក្រុងស៊ាងហៃ និងទីក្រុងសេអ៊ូល ក្នុងនាមជាអ្នកពិគ្រោះយោបល់ផ្នែកហិរញ្ញវត្ថុ មុនពេលក្លាយជាដៃគូនៅក្រុមហ៊ុនប្រឹក្សាពិភពលោក McKinsey។
ចាប់តាំងពីពេលនោះមកលោក Barton បានក្លាយជាទីប្រឹក្សាសេដ្ឋកិច្ច ដែលអាចទុកចិត្តបានរបស់លោកនាយករដ្ឋមន្រ្តី Justin Trudeau។
នៅក្នុងសេចក្តីប្រកាសព័ត៌មានលោក Barton បានសរសេរថា “វាជាកិត្តិយសណាស់ ដែលត្រូវបានតែងតាំងជាឯកអគ្គរដ្ឋទូតកាណាដាប្រចាំប្រទេសចិន”។
លោក Barton បានបន្ថែមថា “ទំនាក់ទំនងរវាងកាណាដា និងចិនគឺជាទំនាក់ទំនងដ៏សំខាន់មួយ ហើយខ្ញុំនឹងខិតខំធ្វើជាតំណាងឲ្យប្រទេសដ៏អស្ចារ្យរបស់យើង និងដោះស្រាយនូវបញ្ហាប្រឈមនានាដែលកំពុងកើតមាន”៕
