ដោយ ម៉ាណេត
ភ្នំពេញ៖ កម្ពុជា និងថៃបានព្រមព្រៀងពិចារណាលើការបើកកិច្ចពិភាក្សាឡើងវិញស្តីពីការអភិវឌ្ឍតំបន់ប្រេង និងឧស្ម័នត្រួតស៊ីគ្នា (OCA) នៅក្នុងឈូងសមុទ្រថៃដែលមានឧស្ម័នរហូតដល់៥០០លានបារ៉ែល។ នេះយោងតាមប្រសាសន៍របស់រដ្ឋមន្រ្តីក្រសួងថាមពលថៃ ចុះផ្សាយកាលនៅកាសែតថៃកាលពីពេលថ្មីៗនេះ។
ដំណោះស្រាយត្រូវបានបង្ហាញដោយ Sontirat Sontijirawong រដ្ឋមន្រ្តីក្រសួងថាមពលថៃ បន្ទាប់ពីកិច្ចប្រជុំជាមួយរដ្ឋមន្រ្តីក្រសួងរ៉ែ និងថាមពលនៅក្រៅកិច្ចប្រជុំរដ្ឋមន្រ្តីថាមពលអាស៊ានលើកទី៣៧នៅទីក្រុងបាងកក។ កិច្ចប្រជុំបានចាប់ផ្តើមនៅថ្ងៃ ច័ន្ទ ហើយគ្រោងនឹងបញ្ចប់នៅថ្ងៃសុក្រ។
នៅក្នុងកិច្ចពិភាក្សានេះ តំណាងមកពីប្រទេសទាំងពីរបានឯកភាពគ្នាថា តំបន់ត្រួតស៊ីគ្នាគួរតែត្រូវបានអភិវឌ្ឍតាមរបៀបមួយ ដែលផ្តល់ផលប្រយោជន៍ដល់ថៃ និងកម្ពុជា ហើយកិច្ចពិភាក្សាគួរតែត្រូវបានធ្វើឡើងឱ្យបានឆាប់បំផុត។
លោក Sontirat មានប្រសាសន៍ថា “យើងកំពុងស្វែងរកវិធីល្អបំផុត ដើម្បីបន្តការពិភាក្សាលើបញ្ហានេះ បន្ទាប់ពីមានការពន្យាពេលជាច្រើនទសវត្សរ៍”។លោកបានបន្តថា “ខណៈពេលដែលពេលវេលាជាក់លាក់មិនត្រូវបានព្រមព្រៀងគ្នា កម្ពុជានឹងត្រូវបានជូនដំណឹងនៅពេលដែលយើងគ្រប់គ្រង ដើម្បីលុបបំបាត់ឧបសគ្គនៅខាងយើងហើយសង្ឃឹមថា ការពិភាក្សាអាចនឹងបន្តឡើងវិញនៅពេលនោះ”។
លោក Sontirat ក៏បានមានប្រសាសន៍ថា ប្រទេសទាំងពីរបានឯកភាពជាគោលការណ៍ថា តំបន់ត្រួតស៊ីគ្នាគួរតែត្រូវបានអភិវឌ្ឍន៍ ដើម្បីផលប្រយោជន៍ទៅវិញទៅមក។
សិទ្ធិអភិវឌ្ឍន៍នៅលើតំបន់ត្រួតស៊ីគ្នាមានទំហំ២៦,០០០ គីឡូម៉ែត្រការ៉េរវាងកម្ពុជា និងថៃ និងជាតំបន់ជម្លោះដែលភាគីទាំងពីរបានទាមទាររៀងៗខ្លួន តាំងពីដើមទតវត្សរ៍ឆ្នាំ១៩៧០។
អនុស្សរណៈយោគយល់គ្នា ដើម្បីរុករករួមគ្នាក្នុងតំបន់ត្រូវបានចុះហត្ថលេខាកាលពីឆ្នាំ២០០១ តែក្រោយមករដ្ឋាភិបាលថៃបានទុកចោលនៅឆ្នាំ២០០៩។
តំបន់អះអាងត្រួតស៊ីគ្នាត្រូវបានប៉ាន់ប្រមាណថា មានប្រេងនិងឧស្ម័ន៥០០លានបារ៉ែលនៅក្រោមបាតសមុទ្រ។
លោកជៀប សួរ អ្នកនាំពាក្យក្រសួងរ៉ែ និងថាមពល បានប្រាប់កាសែតអន្តរជាតិមួយថា តាមផលទ្ធផលកិច្ចនៅទីក្រុងបាងកកកាលពីថ្ងៃ ៦ ខែកញ្ញានេះ កម្ពុជា និងថៃបានឯកភាពគ្នាបន្តពិភាក្សាឡើងវិញ ពីគម្រោងអភិវឌ្ឍន៍ថាមពេលនៅតំបន់ដែលអះអាងថាត្រួតស៊ីគ្នាដែលបានពន្យាពេលយូរមកហើយ។
លោកបានឱ្យដឹងទៀតថា “ក្នុងនាមជាប្រទេសមានសេដ្ឋកិច្ចរីកចម្រើនយ៉ាងឆាប់រហ័សទាំងថៃ និងកម្ពុជាត្រូវការប្រភពប្រេង និងឧស្ម័នបន្ថែមទៀតដើម្បីឆ្លើយតបនឹងតម្រូវការថាមពលក្នុងស្រុកដែលកំពុងកើនឡើង”។
លោករដ្ឋមន្រ្តីក៏បានលើកឡើងផងដែរថា លោកសង្ឃឹមថាថៃ និងកម្ពុជាអាចធ្វើកិច្ចព្រមព្រៀងដែលស្រដៀងគ្នា ទៅនឹងតំបន់អភិវឌ្ឍន៍រួមគ្នាម៉ាឡេស៊ី-ថៃ (JDA) ដែលអនុញ្ញាតឱ្យប្រទេសនីមួយៗទាមទារ៥០ភាគរយនៃទិន្នផលឧស្ម័នសរុបរបស់តំបន់នេះ។
លោក Sontirat បានលើកឡើងផងដែរថា ថៃបានស្នើសុំឱ្យកម្ពុជាបង្កើតវិធានការណ៍ដើម្បីទាក់ទាញក្រុមហ៊ុនថាមពលឯកជនថៃ ក៏ដូចជា ក្រុមហ៊ុនដែលគ្រប់គ្រងដោយរដ្ឋថៃឱ្យមកវិនិយោគនៅក្នុងវិស័យថាមពលនៅកម្ពុជា។
លោករដ្ឋមន្រ្តីបានឱ្យដឹងថា ថៃបានផ្តល់ការលក់អគ្គិសនីមួយចំនួន ដល់កម្ពុជាដែលនៅតែមិនអាចផលិតថាមពលអគ្គីសនីបានគ្រប់គ្រាន់ ដើម្បីឆ្លើយតបនឹងតម្រូវការក្នុងស្រុករបស់ខ្លួន។
លោក Sontirat បានមានប្រសាសន៍ថា “អាជ្ញាធរអគ្គិសនីថៃនឹងព្យាយាមចុះកិច្ចព្រមព្រៀងជាមួយកម្ពុជានាពេលអនាគតដ៏ខ្លីខាងមុខ”៕
