ដោយ វុត្ថា
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានជំរុញឱ្យប្រទសមីយ៉ាន់ម៉ា ពិនិត្យមើលនូវកិច្ចព្រមព្រៀងនានារវាងកម្ពុជា-មីយ៉ាន់ម៉ាក្នុងការផ្តល់លទ្ធភាពកចុះហត្ថទ្វេភាគីដើម្បីបង្កើនសេដ្ឋកិច្ច និងពាណិជ្ជកម្ម ខណៈទំហំពាណិជ្ជកម្មនៃប្រទេសទាំងពីរនៅមានកម្រិតទាបនៅឡើយ។
សម្តេចតេជោ បានមានប្រសាសន៍នៅក្នុងជំនួបពិភាក្សាការងារជាមួយ លោក Thit Linn Ohn ឯកអគ្គរដ្ឋទូតមីយ៉ាម៉ាថ្មី ប្រចាំនៅកម្ពុជានាថ្ងៃទី ១០ ខែកញ្ញា ឆ្នាំ ២០១៩ នេះបានឱ្យដឹងថា ប្រទេសទាំងពីរ (កម្ពុជា-មីយ៉ាន់ម៉ា) គឺមានទំនាក់ ទំនងជាមួយគ្នាជាយូរលង់ណាស់មកហើយ ហើយនៅឆ្នាំក្រោយនេះក៏ជាខួបលើកទី៦៥ ឆ្នាំនៃការបង្កើតទំនាក់ទំនងរវាងប្រទេសយើងទាំងពីរផងដែរ។
សម្តេចតេជោបន្តថា “យើងគួរពិនិត្យមើល តើយើងគួរធ្វើសកម្មភាពអ្វីខ្លះ? ដើម្បីប្រារព្ធខួបអនុស្សាវរីយ៍លើកទី៦៥ ឆ្នាំនៃទំនាក់ទំនងនេះ។ ជាមួយគ្នានោះយើងគប្បីពិនិត្យមើលទៅលើកិច្ចព្រមព្រៀងខ្លះ ដែលអាចនឹងត្រូវចុះហត្ថលេខា ដើម្បីជំរុញនូវកិច្ចសហប្រតិបត្តិការនៅគ្រប់វិស័យ និងជំរុញកិច្ចព្រមព្រៀងដែលមានស្រាប់ផងដែរ ដើម្បីបង្កើននូវវិស័យសេដ្ឋកិច្ច ពាណិជ្ជកម្ម ការវិនិយោគ និងទេសចរណ៍ជាដើម”។
សម្ដេចតេជោបន្ថែមថា “ទំហំពាណិជ្ជកម្មរវាងប្រទេសយើងទាំងពីរនៅមានកម្រិតនៅឡើយ ដោយមិនទាន់សក្តិសមទៅនឹងសក្តានុពលដែលប្រទេសទាំងពីរមាននោះទេ។ ដូច្នេះ សូមឲ្យមានការជំរុញបន្ថែមទៀតក្នុងការបង្កើននៅកិច្ចសហប្រតិបត្តិការលើវិស័យផ្សេងៗជាច្រើនទៀត”។
សម្ដេចតេជោក៏បានជំរុញឲ្យការធ្វើពាណិជ្ជកម្មច្រើនបន្ថែមទៀតក្នុងតំបន់អាស៊ាន ដើម្បីបង្កើតទីផ្សារនៃប្រទេសទាំងពីរឲ្យកាន់តែទូលំទូលាយ ដោយជំរុញឲ្យមានការពិនិត្យមើល លើសកម្មភាពនានា ដើម្បីជំរុញឲ្យទំហំពាណិជ្ជកម្មនៃប្រទេសទាំងពីរកាន់តែមានទំហំធំឡើងនាពេលខាងមុខនេះ។
សម្តេចតេជោថា “ហើយយើងគួរតែពិនិត្យមើលទៅលើកិច្ចព្រមព្រៀងថ្មីបន្ថែមទៀតដូចជាកិច្ចព្រមព្រៀងទៅលើការមិនយកពន្ធត្រួតស៊ីគ្នា និងកិច្ចគាំពារវិនិយោគជាដើម ដែលទាំងអស់នេះ គឺជាកត្តាដែលជំរុញឲ្យអ្នកវិនិយោគមានការចាប់ អារម្មណ៍ខ្លាំង និងមានទំនុកចិត្ត ព្រមទាំងធ្វើឲ្យកិច្ចសហប្រតិបត្តិការនៃប្រទេសយើងទាំងពីរកាន់តែមានភាពស្អិតរមួតថែមឡើងទៀត”។
លោក Thit Linn Ohn ជាឯកអគ្គរដ្ឋទូតមីយ៉ាម៉ាថ្មី ប្រចាំនៅប្រចាំកម្ពុជា បានឱ្យដឹងថា សម្រាប់វត្តមានរូបលោកនៅក្នុងអាណត្តិនេះ និងបានចូលរួមចំណែកយ៉ាងសំខាន់ក្នុងការជំរុញបន្ថែមទៀតនូវទំនាក់ទំនងក៏ដូចជាកិច្ចសហប្រតិបត្តិការរវាងកម្ពុជា និងមីយ៉ាន់ម៉ា។
លោកថា “ខ្ញុំពិតជារីករាយដែលបានមកបំពេញបេសកកម្មការងារនៅក្នុងប្រទេសកម្ពុជា ហើយនឹងខិតខំប្រឹងប្រែងបំពេញការងារជាពិសេសលើទំនាក់ទំនងរវាងប្រទេសទាំងពីរឲ្យកាន់តែមានភាពល្អប្រសើរ”៕
