ដោយៈ រ៉ាណេត
ប្រទេសរុស្ស៊ី គណៈប្រតិភូក្រសួងទេសចរណ៍កម្ពុជា បានចូលរួមកិច្ចប្រជុំគណៈកម្មការទេសចរណ៍ និងចីរភាព (Committee of Tourism and Sustainability) និងគណៈកម្មការទេសចរណ៍ ភាពប្រកួតប្រជែង (Committee of Tourism and Competition) នៃអង្គការទេសចរណ៍ពិភពលោក (UNWTO)។
កិច្ចប្រជុំនេះត្រូវបានធ្វើឡើងកាលពីថ្ងៃទី១០ ខែកញ្ញា ឆ្នាំ២០១៩ម្សិលមិញនេះ នៅក្នុងឱកាសមហាសិន្និបាទលើកទី២៣ នៃអង្គការ UNWTO នៅទីក្រុង Saint Petesburg ប្រទេសរុស្សី។
គណៈកម្មការទាំងពីរនេះបានពិភាក្សា និងសម្រេចលើចំណុចមួយចំនួនដើម្បីផ្ដល់ជាអនុសាសន៍ដល់ប្រទេសនានា ក្នុងពិភពលោកសម្រាប់អភិវឌ្ឍន៍វិស័យទេសចរណ៍របស់ខ្លួនប្រកបដោយចីរភាព និងបរិយាបន្ន ដូចជា ទី១ ការអភិវឌ្ឍទេសចរណ៍ប្រកបដោយចីរភាពទាមទារឲ្យបន្ស៊ីគ្នា រាល់ផែនការអភិវឌ្ឍន៍នានា ទី២ ត្រូវពង្រឹងតួនាទីរបស់វិស័យទេសចរណ៍ ក្នុងការចូលរួមសម្រេចនូវគោលដៅអភិវឌ្ឍន៍ប្រកបចីរភាពរបស់អង្គការសហប្រជាជាតិទាំង១៧។
ទី៣ ត្រូវមានគោលនយោបាយលើការប្រើប្រាស់ និងផលិតសម្រាប់វិស័យទេសចរណ៍ ទី៤ ការអភិវឌ្ឍទេសចរណ៍ដោយចីរភាព ត្រូវផ្តោតលើការអភិវឌ្ឍផលិតផល (Product) ការគិតគូរមូលធនមនុស្ស(People) និងការរៀបចំគោលនយោបាយ (Policies) ទី៥ អង្គការទេសចរណ៍ពិភពលោកជំរុញឲ្យប្រទេសជាសមាជិក មានយន្តការតាមដានការអភិវឌ្ឍទេសចរណ៍ ប្រកបដោយចីរភាពដោយប្រើប្រាស់សូចនាករ ឬរង្វាស់សមស្រប ។
ទី៦ UNWTO លើកទឹកចិត្តឲ្យប្រទេសជាសមាជិក ចូលរួមជាសមាជិកនៃបណ្ដាញអង្គភាពទទួលបន្ទុកតាមដានការអភិវឌ្ឍទេសចរណ៍ប្រកបដោយចីរភាព (International Network of Sustainable Tourism: INSTO ) (ក្រសួងទេសចរណ៍កម្ពុជា នឹងសហការជាមួយ UNWTO រៀបចំកិច្ចប្រជុំ INSTO នៅខែវិច្ឆិកា ២០១៩ នៅខេត្តសៀមរាប។ ទី៧ UNWTO បានស្នើឲ្យមានយន្តការគុណភាព តាមសង្វាក់ផ្គត់ផ្គង់ទេសចរណ៍ ទី៨UNWTO ស្នើឲ្យគោលនយោបាយទេសចរណ៍ត្រូវឆ្លើយតបនឹង SDG ទាំង១៧ ទី៩ នាពេលខាងមុខ UNWTO នឹងសិក្សាដកពិសោធន៍ថាតើពិភពលោក អាចពន្លឿនការដោះស្រាយនៃការបម្រែបម្រួលអាកាសធាតុតាមរយៈវិស័យទេសចរណ៍បានយ៉ាងណាខ្លះ?។
ទី១០ តាមការពិភាក្សា វិស័យទេសចរណ៍តាមរយៈការធ្វើដំណើរទេសចរជាតិ និងអន្តរជាតិ (តាមរថយន្តផ្ទាល់ខ្លួន រថយន្តក្រុង រថភ្លើង និងយន្តហោះ) នឹងបញ្ចេញឧស្ម័នការបូនឌីអុកស៊ីត (CO2) ស្មើនឹង៥,៣% នៅឆ្នាំ២០៣០ (ឆ្នាំ២០១៦ មានតែ៥%)។
បន្ទាប់ពីចូលរួមប្រជុំគណៈកម្មការ គណៈប្រតិភូបានជួបពិភាក្សាការងារជាមួយ លោក Xu Jing នាយកប្រចាំតំបន់អាស៊ីប៉ាស៊ីហ្វិកនៃ UNWTO អំពីការរៀបចំការងារសហប្រតិបត្តិការនៅថ្ងៃខាងមុខ។
គណៈប្រតិភូក៏បានចូលរួមវេទិកាជាន់ខ្ពស់ស្ដីពី ទេសចរណ៍សុខភាព និងព្យាបាលជំងឺ (Medical and Health Tourism ) ដោយ UNWTO បានណែនាំឲ្យប្រទេសជាសមាជិកត្រូវរៀបចំទទួលទេសចរណ៍នេះ ដែលមានការកើនឡើងយ៉ាងខ្លាំងនាពេលកន្លងមក និងទៅថ្ងៃអនាគត ដោយរយៈពេលប៉ុន្មានឆ្នាំចុងក្រោយនេះ មានកំណើនជាមធ្យមប្រមាណ២៥%ក្នុងមួយឆ្នាំ៕
