ដោយ វុត្ថា
ភ្នំពេញ៖ ក្រុមហ៊ុនម៉ុងឬទ្ធីគ្រុប ដែលគ្រប់គ្រង់ដោយមហាសេដ្ឋីកសិកម្មល្បីឈ្មោះប្រចាំនៅកម្ពុជា លោក ឧកញ៉ា ម៉ុង ឬទ្ធី បានបន្តនាំស្វាយទៅចែកចាយក្នុងទីផ្សារអឺរ៉ុបរាប់រយគីឡូបន្ថែមទៀត កាលពីម្សិលមិញនេះ ក្រោយពីទទួលបានជោគជ័យក្នុងការនាំស្វាយទៅលក់ក្នុងទីផ្សារដ៏ធំមួយនេះ។
លោកឧញ៉ា ម៉ុងឬទ្ធី បានសរសេរក្នុងបណ្តាញទំនាក់ទំនងសង្គមហ្វេសបុកថា “ថ្ងៃអង្គារទី ០៩ ខែមករា ឆ្នាំ២០១៨ ក្រុមការងាររបស់ក្រុមហ៊ុន KFI ដែលជាបុត្រសម្ព័ន្ធ របស់ក្រុមហ៊ុនម៉ុង ឫទ្ធីគ្រុប បានប្រមូលទិញផ្លែស្វាយកែវរមៀត ពីកសិករម្ចាស់ចំការ ដែលមានទីតាំងស្ថិតនៅក្នុងស្រុកត្រាំកក់ ខេត្ត តាកែវ បានរៀបចំវេចខ្ចប់ដើម្បីនាំចេញទៅកាន់ប្រទេសបារាំង និង ប្រទេសរុស្សី និងបន្ដការចែកចាយទៅសហគមអ៊ឺរ៉ុប សម្រាប់ជើងទី១២ ឆ្នាំ២០១៧-២០១៨ ទំនិញទាំងអស់នេះ នឹងត្រូវបញ្ជូនតាមជើងយន្តហោះ កាតា QATAR ឆ្ពោះទៅកាន់ទីក្រុងប៉ារីស ប្រទេសបារាំង ដែលហោះនៅម៉ោង ៤ និង៥០នាទីល្ងាចនេះ QR0971 មានចំនួន៦ប៉ាឡែត ៤២០កាតុង ស្មើនឹងបរិមាណផ្លែស្វាយសរុប ២៣០០គីឡូក្រាម”។
លោកឧញ៉ាសរសេរបន្តថា “ចំណែកស្វាយរុស្សីគឺមានចំនួន ៨០កញ្ច្រែង ស្មើនឹងចំនួនផ្លែស្វាយ” ១១០០គីឡូក្រាម។
ក្រុមហ៊ុនម៉ុងឬទ្ធីគ្រុប បាននាំស្វាយទៅចែកចាយក្នុងទីផ្សារអឺរ៉ុបមានរយៈពេល ២ទៅ ៣ ឆ្នាំមកហើយ មកដល់ពេលនេះ ។ ស្វាយដែលនាំចេញពីកម្ពុជាត្រូវគេគាំទ្រ និង បញ្ជាទិញជាបន្តបន្ទាប់ព្រោះស្វាយមានគុណភាពល្អ៕
