ដោយ គង់ សូរិយា
ភ្នំពេញ៖ តើប្រមុខរដ្ឋាភិបាលកម្ពុជា និងចិនចុះហត្ថលេខាអ្វីខ្លះ ដើម្បីបង្កើនកិច្ចសហប្រតិបត្តិការរវាងប្រទេសទាំងពីរ ខណៈដែលកិច្ចព្រមព្រៀងចំនួន១៩នឹងត្រូវចុះហត្ថលេខានាថ្ងៃនេះ ក្រោមការចូលរូមជាអធិបតីភាពពីនាយករដ្ឋមន្រ្តីកម្ពុជា ចិន។
យោងតាមឯកសារទទួលបានបានឲ្យដឹងថា ឯកសារចំនួន១៩ នឹងត្រូវចុះហត្តលេខា ក្នុងដំណើរទស្សនកិច្ចរបស់លោកលី ខឺឈាងនៅកម្ពុជានាថ្ងៃទី១១នេះ រួមមាន ទី១ អនុស្សរណៈនៃការយោគយល់គ្នាស្ដីពី ការលើកកម្ពស់បន្ថែមការអភិវឌ្ឍន៍មជ្ឈមណ្ឌល ផ្ទេរបច្ចេកវិទ្យាកម្ពុជាចិន។ ទី២ អនុស្សរណៈនៃការយោគយល់គ្នា សម្រាប់កិច្ចការប្រតិបត្តិការ លើការលើកកម្ពស់គុណភាពផលិតផល។ ទី៣ កិច្ចព្រមព្រៀងស្ដីពី កិច្ចសហប្រតិបត្តិការសេដ្ឋកិច្ច និងបច្ចេកទេស។ ទី៤ លិខិតប្ដូរសារស្ដីពីគម្រោងជួសជុលរាជវាំងនៅអង្គរ ។ ទី៥ លិខិតប្ដូរសារស្ដីពីការផ្ដល់ជូនបរិក្ខារមួយកញ្ចប់។
ទី៦ អនុស្សារណៈនៃការយោគយល់គ្នាស្ដីពី គម្រោងដំណើរនៃក្ដីស្រឡាញ់ពីបេះដូងនៅកម្ពុជា ។ ទី៧ អនុស្សរណៈនៃការយោគយល់គ្នាស្ដីពី ការរៀបចំផែនការរួមលើការអភិវឌ្ឍកសិកម្មទំនើបនៅកម្ពុជា។ ទី៨ អនុស្សរណៈនៃការយោគយល់គ្នាស្តីពី កិច្ចសហប្រតិបត្តិការអង្គការស្រាវជ្រាវដំណាំស្រូវ។ ទី៩ កិច្ចព្រមព្រៀងស្ដីពី ការអនុវត្តគម្រោងការបង្កើតមជ្ឈមណ្ឌលបង្កាត់ និងអភិរក្សពូជឈើមានតម្លៃខ្ពស់នៅកម្ពុជា។ ទី១០ កិច្ចព្រមព្រៀងឥណទានសម្បទានសម្រាប់គម្រោងសាងសង់ខ្សែអគ្គិសនីតង់ស្យុងខ្ពស់ ២៣០គីឡូវ៉ុល ដំណាក់កាលទី២ ។
ទី១១ កិច្ចព្រមព្រៀងឥណទានសម្បទានសម្រាប់ គម្រោងពង្រីកនិងលើកកម្រិតផ្លូវជាតិលេខ៣ (ចោមចៅ បែកគូស ក្រុងកំពត) ។ ទី១២ អនុស្សារណៈនៃការយោគយល់គ្នាស្តីពី កិច្ចសហប្រត្តិការទៅវិញទៅមក។ ទី១៣ កិច្ចព្រមព្រៀងសម្បទាន សម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធផ្លូវល្បឿនលឿន ភ្នំពេញ ខេត្តព្រះសីហនុ។ ទី១៤ កិច្ចព្រមព្រៀងស្ដីពី វិស័យអប់រំ បណ្ដុះបណ្ដាលបច្ចេកទេសនិងវិជ្ជាជីវៈ ទី១៥អនុស្សរណៈនៃការយោគយល់គ្នាស្ដីពីពាណិជ្ជកម្មអង្ករ។ ទី១៦ កិច្ចសន្យាសម្រាប់គម្រោងសាងសង់ខ្សែបញ្ជូនអគ្គិសនី 500 kv ជាឆ្អឹងខ្នងសម្រាប់បណ្ដាញជាតិ និងភ្ជាប់អនុតំបន់។
ទី១៧ កិច្ចព្រមព្រៀងក្របខណ្ឌស្ដីពី កិច្ចសហប្រតិបត្តិការណ៍ហិរញ្ញប្បទាន សម្រាប់គម្រោងអាកាសយានដ្ឋានភ្នំពេញថ្មី ប្រទេសកម្ពុជា។ ទី១៨. កិច្ចព្រមព្រៀងក្របខណ្ឌស្ដីពី គម្រោងបាញ់បង្ហោះផ្កាយរណបតេជោ១ និងទី១៩ កិច្ចព្រមព្រៀងស្ដីពី គម្រោងវិនិយោគលើការសាងសង់ និងប្រតិបត្តិការកំពង់ផែស្ទឹងហាវ៕
