ដោយ វុត្ថា
ភ្នំពេញ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានលើកឡើងថា សេចក្តីព្រាងច្បាប់ស្តីពីសំណង់ ដែលរដ្ឋសភាកំពុងពិនិត្យសិក្សា នឹងក្លាយជាច្បាប់ដ៏មានសារៈសំខាន់ ជាបទដ្ឋានគតិយុត្តថ្មី បន្ថែមលើអ្វីដែលមានស្រាប់ ក្នុងការជំរុញវិស័យសំណង់នៅកម្ពុជា ឲ្យកាន់តែរីកចម្រើន គោរពតាមបទដ្ឋានបច្ចេកទេស សុវត្ថិភាព សោភ័ណភាព និងបរិស្ថាន។
សម្តេចបានមានប្រសាសន៍នៅក្នុងពិធីបើកសិក្ខាសាលាស្តីពីការឈ្វេងយល់លើសេចក្តីព្រាងច្បាប់ស្តីពីសំណង់នៅថ្ងៃទី ២០ ខែកញ្ញា ឆ្នាំ ២០១៩ នេះ ថា សេចក្តីព្រាងច្បាប់ស្តីពីសំណង់ តាក់តែងឡើងក្នុងបរិបទវិស័យសំណង់ មានការរីកដុះដាលកាន់តែច្រើន មានលក្ខណៈកាន់តែធំ កាន់តែខ្ពស់។
-->
ជាពិសេសក្នុងពេលដែលវិស័យសំណង់បានចូលរួមចំណែកយ៉ាងខ្លំាង ក្នុងការលើកកម្ពស់កំណើនសេដ្ឋកិច្ចជាតិឲ្យរឹងមាំ និងមាននិរន្តរភាព ក្នុងចំណោមវិស័យផ្សេងទៀត ដែលមានដូចជា ទេសចរណ៍ ឧស្សាហកម្ម ពាណិជ្ជកម្ម និង កសិកម្ម ជាដើម។
សម្តេចបន្តថា បើនិយាយអំពីវិស័យសំណង់ គឺគេនឹកឃើញដល់ស្នាដៃបុព្វបុរសខ្មែរ ដែលបានកសាង ប្រាសាទអង្គរវត្ត និងប្រាសាទបាយ័ន និងប្រាសាទរាប់រយទៀតនៅពាសពេញប្រទេស។ ស្នាដៃស្ថាបត្យកម្ម និងវិស្វកម្មដ៏អស្ចារ្យរបស់បុព្វបុរសខ្មែរ បានល្បីល្បាញពាសពេញសកលលោក។
លោកស្រី និន សាផុន ប្រធាន គណៈកម្មការជំនាញនៃរដ្ឋសភាបានឱ្យដឹងដែរថា សេចក្តីព្រាងច្បាប់នេះ បានឆ្លើយតបនឹងគោលនយោបាយជាតិ ស្តីពីការរៀបចំទឹកដីនៃព្រះរាជាណាចក្រកម្ពុជា ចុះថ្ងៃទី៨ ខែមេសា ឆ្នាំ២០១១ ផែនការយុទ្ធសាស្រ្តអភិវឌ្ឍន៍ជាតិ២០១៩-២០២៣ និងយុទ្ធសាស្រ្តចតុកោណ ដំណាក់កាលទី៤ របស់រាជរដ្ឋាភិបាល ដើម្បីកំណើនការងារ សមធម៌ និងប្រសិទ្ធភាព កសាងមូលដ្ឋានគ្រឹះឆ្ពោះទៅសម្រេចបានចក្ខុវិស័យ ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលកម្រិតខ្ពស់នៅឆ្នាំ២០៥០។
លោកស្រីថា ជាងមួយទសវត្សរ៍ចុងក្រោយនេះ ទុនវិនិយោគវិស័យសំណង់មានកំណើនទៀងទាត់ និងនៅបន្តរីកចម្រើនជាលំដាប់ ជាពិសេសការសាង់សង់សំណង់ធំៗខ្ពស់ៗ ដូចជាអគារស្នាក់នៅរួម អគារលក់ទំនិញ ផ្សារទំនើប មជ្ឈមណ្ឌលពាណិជ្ជកម្ម អគារការិយាល័យ សណ្ឋាគារ អគារពហុមុខងារ សំណង់ទីក្រុងរណប បុរីលំនៅឋាន ។ល។
លោកស្រីសង្កត់ធ្ងន់ថា សំណង់កាន់តែធំ កាន់តែខ្ពស់ និងកាន់តែស្មុគស្មាញ កាន់តែទាមទារឲ្យមានការអនុវត្តឲ្យបានត្រឹមត្រូវ តាមបទដ្ឋានគតិយុត្ត បច្ចេកវិទ្យា ស្តង់ដារ និងបទប្បញ្ញត្តិបច្ចេកទេស ដើម្បីធានាភាពរឹងមាំ គុណភាព សោភណ្ឌភាព និងចីរភាព សំណង់។
លោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានលើកឡើងថា សេចក្តីព្រាងច្បាប់សំណង់ ដែលមាន២២ជំពូក និង១១១មាត្រា ត្រូវបានតាក់តែងឡើងតំាងពីឆ្នាំ២០១៧មកម្ល៉េះ ដោយមាន ការចូលរួមផ្តល់យោបល់ពីអ្នកជំនាញនៃក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃប្រទេសជប៉ុន។
លោកបន្តថា សេចក្តីព្រាងច្បាប់ នេះ មានគោលបំណង ក្នុងការពង្រឹងការគ្រប់គ្រងភាគីពាក់ព័ន្ធ និងការប្រតិបត្តិការងារទំាងឡាយក្នុងវិស័យសំណង់ ដើម្បីធានាសន្តិសុខ សុវត្ថិភាព និងសណ្តាប់ធ្នាប់សាធារណៈ ការពារផលប្រយោជន៍ម្ចាស់សំណង់ អ្នកប្រើប្រាស់ និងសាធារណជន។
ចូលរួមពង្រឹងការ គ្រប់គ្រងនគរូបនីយកម្ម ដោយអភិវឌ្ឍន៍ទីក្រុងឲ្យមានសោភ័ណ្ឌភាព និងបរិស្ថានល្អសម្រាប់ការរស់នៅប្រកបដោយចីរភាព សំដៅលើកកម្ពស់សុខុមាលភាពសាធារណៈ ជាដើម៕
