ដោយនៅ វឌ្ឈនា
ភ្នំពេញៈ ក្រុមប្រឹក្សាអភិវឌ្ឍន៍កម្ពុជាបានដាក់ឲ្យដំណើរការនូវ “តុចិន” ដែលសំដៅដល់ការិយាល័យពិសេសមួយ សំរាប់ផ្តល់ព៌តមាននិងគាំទ្រដល់ការវិនិយោគរបស់ចិននៅកម្ពុជា។
កម្ពុជាបានដាក់ការិយាល័យពិសេស “តុចិន” សម្រាប់ផ្តល់ព័ត៌មាន និងការគាំទ្រដល់ការវិនិយោគចិននៅកម្ពុជា
លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា និងលោកនីង ជីចឺ អនុប្រធានគណៈកម្មាធិការជាតិអភិវឌ្ឍន៍និងកំណែទម្រង់ចិន កាលពីចុងសប្តាហ៍កន្លងមកនេះ បានកិច្ចប្រជុំដើម្បីពិនិត្យលើវឌ្ឍនភាព និងជំរុញការអនុវត្តអនុស្សារណៈយោគយល់គ្នាស្តីពី កិច្ចសហប្រតិបត្តិការសមត្ថភាពផលិតកម្ពុជា-ចិន។
លោកបន្តថា “កម្ពុជាបានផ្តល់ការគាំទ្រ និងត្រៀមលក្ខណៈផ្តល់កិច្ចសម្រួល ដល់រាល់សកម្មភាពរបស់វិនិយោគិនចិននៅកម្ពុជា តាមរយៈការដាក់ឱ្យដំណើរការនូវ “តុចិន” ដែលជាការិយាល័យសម្រាប់ផ្តល់ព័ត៌មាន និងការគាំទ្រដល់ការវិនិយោគចិននៅកម្ពុជា។
លោកបន្តថា “ប្រទេសកម្ពុជា ចិនបានប្តេជ្ញារួមគ្នាជំរុញ និងសម្រួលការវិនិយោគប្រកបដោយគុណភាពឱ្យដល់កំរិត និងគោលដៅ ដែលប្រមុខរដ្ឋ/រដ្ឋាភិបាលនៃប្រទេសទាំងពីរបានឯកភាពគ្នាកន្លងមក ក្នុងន័យផ្តល់ផលប្រយោជន៍ឱ្យបានជាអតិបរិមាដល់ប្រទេសទាំងពីរ។
យោងតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា អង្គប្រជុំបានកត់សម្គាល់នូវវឌ្ឍនភាព ដែលសម្រេចបានគួរជាទីមោទន តាមរយៈការទាក់ទាញបាននូវលំហូវិនិយោគចិន មកកម្ពុជាកាន់តែច្រើនឡើង ឆ្លុះបញ្ចាំងពីកំណើនវិនិយោគចិននៅកម្ពុជាក្នុងរយៈពេលបីឆ្នាំកន្លងមក។
CDC បានឲ្យដឹងបន្តថា ដើម្បីសម្រេចបាននូវគោលដៅនេះ ភាគីចិនបានប្តេជ្ញាសាជាថ្មីថា នឹងខិតខំជំរុញសហគ្រាសចិនឱ្យបណ្តាក់ទុន ក្នុងគម្រោងវិនិយោគដែលមានគុណភាពខ្ពស់ទៅកម្ពុជា ឱ្យកាន់តែច្រើនថែមទៀត៕
