ដោយ វល័ក្ខ
ភ្នំពេញ៖ លោក Jeff Bezos បានចាប់ផ្ដើមបើកដំណើរការក្រុមហ៊ុនលក់ទំនិញតាមអនឡាញ Amazon ដំបូងបំផុតនៅឆ្នាំ១៩៩៤ ដោយនៅពេលនោះ គឺមានលក់តែសៀវភៅតែប៉ុណ្ណោះ ហើយទុនក្នុងការវិនិយោគដំបូង ក៏មិនមែនជាលុយផ្ទាល់ខ្លួនរបស់លោកផងដែរ។ តើនរណាជាអ្នកវិនិយោគដំបូងគេ?។
ក្រោយពីលាឈប់ការងារពីក្រុមហ៊ុន D.E Shaw នាចុងឆ្នាំ១៩៩៣ លោក Jeff Bezos បានចាប់ផ្ដើមរៀបចំបង្កើតក្រុមហ៊ុន Amazon ឡើង ដោយពេលនោះលោកបានសរសេរពីផែនការអាជីវកម្ម ប៉ុន្តែខ្វះទុនដើម្បីដំណើរការ ភ្លាមនោះឪពុកម្ដាយរបស់លោកក៏បានផ្ដល់លុយទុនវិនិយោគ ; ក្នុងទំហំទឹកប្រាក់មួយច្រើនគួរសម ដោយតាមការប៉ាន់ប្រមាណប្រហែលជា ៣០០,០០០ដុល្លារអាមេរិក។
-->
ក្រោយពីទទួលបានទុននេះហើយ លោក Jeff Bezos ក៏បានបញ្ជាក់ទៅកាន់ឪពុកម្ដាយលោក ដែលជាវិនិយោគិនដំបូងគេនេះវិញថា អាជីវកម្មរបស់លោក អាចនឹងបរាជ័យ ៧០ភាគរយ ព្រោះវាជាមុខជំនួញថ្មីសម្រាប់ពេលនោះ ប៉ុន្តែឪពុកម្ដាយលោកបានលើកទឹកចិត្ត និងជំរុញឱ្យលោកកុំអស់សង្ឃឹម ត្រូវតែធ្វើវាឱ្យជោគជ័យ។
យោងតាមរបាយការណ៍វាយតម្លៃរបស់ Market Realist បានឱ្យដឹងថា ក្រុមហ៊ុន Amazon មានតម្លៃរហូតដល់ជាង ៣១៥ពាន់លានដុល្លារ នៅក្នុងឆ្នាំ២០១៩ នេះ ហើយបើគិតពីប្រាក់ចំណូល នៅក្នុងឆ្នាំ២០១៨ មានរហូតដល់ជិត ២៣៣ពាន់លានដុល្លារ ខណៈដែលនៅពេលនេះលោក Jeff Bezos បានក្លាយជាកំពូលមហាសេដ្ឋីលេខ១ នៅលើពិភពលោកជាមួយនឹងទ្រព្យសម្បត្តិជាង១១០ពាន់លានដុល្លារ៕
