ដោយ វុត្ថា
ឥណ្ឌូនេស៊ី៖ ក្រុមហ៊ុនធំៗជាច្រើនរបស់ប្រទេសឥណ្ឌូនេស៊ី បានសន្យានឹងមកពិនិត្យលទ្ធភាពពង្រីកការវិយោគ និងកិច្ចសហប្រតិបត្តិការលើវិស័យហេដ្ឋារចនាសម្ព័ន្ធដឹកជញ្ជូននៅក្នុងប្រទេសកម្ពុជា ស្របនឹងតម្រូវការនៃគម្រោងអភិវឌ្ឍន៍ប្រព័ន្ឋផ្លូវដែកនៅកម្ពុជា។
យោងតាមការចុះផ្សាយរបស់ក្រសួងសាធារណៈការ និងដឹកជញ្ជូននៅថ្ងៃទី ២៣ ខែកញ្ញា នេះបានឱ្យដឹងថា ការសន្យានេះ ត្រូវបានធ្វើឡើងក្នុងដំណើរទស្សនកិច្ចការងារ របស់ លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន រយៈពេល៤ថ្ងៃនៅសាធារណរដ្ឋឥណ្ឌូនេស៊ី ដែលបានស្នើដល់តំណាងក្រុមហ៊ុនទាំងនោះ ធ្វើដំណើរមកកម្ពុជា ដើម្បីស្វែងរកឱកាសនិងដៃគូអាជីវកម្មនិងវិនិយោគ។
ក្រុមហ៊ុនធំៗទំាងនោះរួមាន៖
១) ក្រុមហ៊ុនឧស្សាហកម្ម INKA (Indonesian Railway Industry) ដែលជាក្រុមហ៊ុនឧស្សាហកម្មផ្លូវដែករដ្ឋ ដ៏ធំរបស់សាធារណរដ្ឋឥណ្ឌនេស៊ី ដែលត្រូវបានបង្កើតឡើងនៅក្នុងឆ្នាំ១៩៨១ និងជាក្រុមហ៊ុនផលិតរថភ្លើង គ្រឿងបង្គំធំ លក់ និងផ្តល់សេវាមុនគេបង្អស់នៅអាស៊ីអគ្នេយ៍ ដើម្បីពិនិត្យលទ្ធភាពពង្រីកកិច្ចសហប្រតិបត្តិការលើវិស័យដឹកជញ្ជូនផ្លូវដែក។ ក្រុមហ៊ុន ឧស្សហកម្មផលិតរថភ្លើងឥណ្ឌូនេស៊ីនេះ ដែលមានសមត្ថភាពពង្រីកអាជីវកម្មជាមួយប្រទេស អូស្ត្រាលី បង់ក្លាដេស ម៉ាឡេស៊ី ហ្វីលីពីន សឹង្ហបូរី ថៃ និងអាហ្រិក។
លោកទេសរដ្ឋមន្ត្រី បានស្នើឲ្យក្រុមហ៊ុនឧស្សាហកម្មផ្លូវដែកឥណ្ឌូនេស៊ី មកជួបពិភាក្សាជាមួយស្ថាប័ន និងក្រុមហ៊ុនពាក់ព័ន្ធ ដើម្បីធ្វើការសិក្សាលទ្ធភាពវិនិយោគនៅកម្ពុជា ហើយក្រុមហ៊ុននេះបានសន្យាថានឹងបញ្ជូនគណៈប្រតិភូមកពិនិត្យលទ្ធភាពពង្រីកកិច្ចហប្រតិបត្តិការលើវិស័យផ្លូវដែកនៅកម្ពុជានាពេលដ៏ខ្លីខាងមុខ។
២) ក្រុមហ៊ុនកំពង់ផែ PAL Indonesia ដែលជាក្រុមហ៊ុនកំពង់ផែរដ្ឋធំជាងលំដាប់ទី២ របស់ឥណ្ឌូនេស៊ី បន្ទាប់ពីក្រុមហ៊ុនកំពង់ផែក្រុងហ្សាកាតា និងត្រូវបានបង្កើតតាំងពីជំនាន់រដ្ឋការឥណ្ឌូនេស៊ីត្រួតត្រា ដោយប្រទេសហូឡង់នៅក្នុងឆ្នាំ១៩៣៩។
ក្រុមហ៊ុន PAL Indonesia ជាក្រុមហ៊ុនកំពង់ផែលំដាប់ពិភពលោក ដែលមានក្រុមហ៊ុនសាខាជាច្រើន ហើយក្រៅពីមាននាទីជាកំពង់ផែ ក្រុមហ៊ុននេះមានអាជីវកម្មចំបងៗ មួយចំនួនទៀត ដូចជា អាជីវកម្មផលិតនាវាដឹកទំនិញ ផលិតនាវាចម្បាំង និងនាវាមុជទឹកចម្បាំង (Submarine) នាវាសណ្តោង ផលិតនាវាផលិតថាមពលអគ្គីសនី ផលិតគ្រឿងឧបករណ៍សម្រាប់កំពង់ផែនិងចំណតនាវា វិស្វកម្មទូទៅ និងផ្តល់សេវាថែទាំ ជួសជុល និងរុះរើនាវា។ល។
លោកទេសរដ្ឋមន្ត្រីស៊ុនចាន់ថុល ស្នើដល់កំពង់ផែ PAL Indonesia នេះ ពិភាក្សាជាមួយកំពង់ផែកម្ពុជា ដើម្បីបង្កើតនូវកិច្ចសហប្រតិបត្តិការ លើវិស័យកំពង់ផែរវាងភាគីទាំងពីរដោយផ្អែកលើកិច្ចសហប្រតិបត្តិការផ្នែកអាជីវកម្ម នាវារវាង ភាគីទាំងពីរទៅអនាគត។ ក្រៅពីនេះ លោកទេសរដ្ឋមន្ត្រីបានជួបជាមួយនឹងថា្នក់ដឹកនាំ និងតំណាងក្រុមហ៊ុនរបស់ប្រទេសឥណ្ឌេស៊ីជាច្រើនផ្សេង ក្នុងបង្ហាញពីឪកាសវិនិយោគរបស់កម្ពុជា។
ទំនាក់ទំនងពាណិជ្ជកម្ម និងវិនិយោគរវាងប្រទេសឥណ្ឌូនេស៊ី និងកម្ពុជានៅមានទំហំតូចនៅឡើយ បើប្រៀបធៀបជាមួយប្រទេសមួយចំនួននៅក្នុងតំបន់។ នៅក្នុងឆ្នាំ២០១៨ ពាណិជ្ជកម្មទំនិញសរុបរវាងប្រទេសទាំងពីរមានតែ៥៥៨ លានដុល្លារអាមេរិក មានការកើនឡើងចំនួន៣% ក្នុងនោះការនាំចេញរបស់កម្ពុជាទៅឥណ្ឌូនេស៊ីមានតែ ៣៣ លានដុល្លារអាមេរិក និងនាំចូលពីឥណ្ឌូនេស៊ីចំនួន ៥២៥ លានដុល្លារអាមេរិក។ ចំពោះវិនិយោគវិញនៅមានកំរិតតិចតួចនៅឡើយ។
លោកទេសរដ្ឋមន្ត្រីស៊ុន ចាន់់ថុលបានឲ្យដឹងថា ប្រទេសទាំងពីរមានសក្តានុលពលធំធេងសម្រាប់បង្កើនកិច្ចសហប្រតិបត្តិការ ប៉ុន្តែកន្លងមកទំនាក់ទំនងពាណិជ្ជកម្ម និងវិនិយោគ ក៏ដូចជា ការតភ្ជាប់រវាងប្រទេសទាំងពីរនៅមានកំរិត រួមជាមួយការទទួលបាននូវព័ត៌មានមិនល្អពីប្រទេសកម្ពុជា ដែលបានបង្ករឲ្យមិនសូវមានវិនិយោគ និងទេសចរពីឥណ្ឌូនេស៊ី មកកាន់កម្ពុជា៕
