ដោយ ប៊ី
ភ្នំពេញ៖ ក្រុមហ៊ុនចំនួន៧របស់ជប៉ុនបានស្វែងរកឱកាសវិនិយោគ លើគម្រោងថាមពលកកើតឡើងវិញ ប្រព្រឹត្តិកម្មសំណល់រឹង-រាវ ឧស្សាហកម្មឈើ អាហារសុខភាព និងការថែទាំមនុស្សចាស់នៅកម្ពុជា។ នេះបើតាមការបញ្ជាក់របស់ក្រសួងបរិស្ថានចេញផ្សាយកាលពីម្សិលមិញនេះ។
លោក សាយ សំអាល់ រដ្ឋមន្រ្តីក្រសួងបរិស្ថានបានអនុញ្ញាតឱ្យប្រតិភូវិនិយោគិនជប៉ុន ដែលមានតំណាងក្រុមហ៊ុនចំនួន៧ ចូលជួបពិភាក្សាការងារ កាលពីថ្ងៃអាទិត្យ ថ្ងៃទី២២ ខែកញ្ញា ឆ្នាំ២០១៩ នៅទីស្តីការក្រសួងបរិស្ថាន។
-->
លោកសាយ សំអាល់ បានជម្រាបជូនភ្ញៀវ អំពីសក្តានុពលសេដ្ឋកិច្ចរបស់កម្ពុជា និងគោលនយោបាយរាជរដ្ឋាភិបាល ក្នុងការគាំទ្រអ្នកវិនិយោគបរទេស រួមទាំងគម្រោងគ្រប់គ្រងបរិស្ថាន ការការពារ និងអភិរក្សជីវៈចម្រុះនៅកម្ពុជា។ លោករដ្ឋមន្រ្ដីបានលើកឡើងពីលទ្ធភាព រៀបចំសំណើគម្រោងវិនិយោគនៅក្រោម “យន្តការឥណទានកាបូនរួមគ្នា” (Joint Crediting Mechanism: JCM) ផងដែរ។
កម្ពុជាបានចូលរួមក្នុង JCM តាំងពីឆ្នាំ២០១៤ ហើយបច្ចុប្បន្នកំពុងអនុវត្តន៍ដោយជោគជ័យនូវគម្រោង ដែលប្រើបច្ចេកវិទ្យាជប៉ុនទំនើបៗចំនួន៦ ទាក់ទងនឹងការបំភ្លឺផ្លូវសាធារណៈ ការផលិតអគ្គិសនីពីពន្លឺព្រះអាទិត្យ ប្រសិទ្ធភាពថាមពល ការការពារ និងអភិរក្សធនធានធម្មជាតិ។ ជាមួយគ្នានេះដែរ លោកប្រធានតំណាងក្រុមហ៊ុន Green Power Techno បានប្រគល់ជូន លោករដ្ឋមន្ត្រីក្រសួងបរិស្ថាននូវម៉ាស៊ីនចំហេះក្រៅ “sterling engine” ចំនួន២គ្រឿង ក្រុមហ៊ុន Angkor Bio Cogen បានប្រគល់ជូននូវវិញ្ញាបនបត្រឥណទានកាបូនដែលមានតម្លៃ២.០០០តោន សមមូលឧស្ម័នកាបូនិកផងដែរ។
ការវិនិយោគរបស់ជប៉ុននៅកម្ពុជា បានឈរលំដាប់ទី៤ក្នុងចំណោមបណ្តាប្រទេសដែលបានវិនិយោគនៅកម្ពុជា។ ប្រទេសវិនិយោគច្រើនជាងគេទី១នៅកម្ពុជា គឺប្រទេសចិន កូរ៉េ សឹង្ហបុរី និងលេខរៀងបន្ទាប់គឺប្រទេសជប៉ុន៕
