ដោយដែន ចែងចាំង
ភ្នំពេញៈ ទីរួមខេត្តត្បូងឃ្មុំថ្មី ដែលបានរៀបចំឌីសាញឡើងប្រកបដោយស្តង់ដាអន្តរជាតិ លើហេដ្ឋារចនាសម្ព័ន្ឋលើនិងក្រោមដី ហាក់នៅតែមានភាពស្ងប់ស្ងាត់ ដោយសារតង់ស៊ីតេរបស់ប្រជាពលរដ្ឋ ចូលទៅរស់នៅទីក្រុងនេះនៅមានកម្រិត។
ក្រៅពីសកម្មភាពពុះដីឡូត៍លក់របស់ក្រុមហ៊ុនមួយចំនួន ស្ថិតនៅជុំវិញទីក្រុងនេះ និងក្រុមហ៊ុនចំនួនពីរ ដែលបានលើកស្លាកអភិវឌ្ឍន៍លំនៅដ្ឋាន ក៏មិនឃើញមានសកម្មភាពសាងសង់ណាមួយកើតមាននៅឡើយ។
កាលពីដើមឆ្នាំនេះ លោកឧកញ៉ាលី ហួរអគ្គនាយកក្រុមហ៊ុនលី ហួរគ្រុបបានអះអាងថា លោកគ្រោងនឹងវិនិយោគសាងសង់បុរី និងផ្សារនៅក្នុងទីក្រុងថ្មីនេះ ប៉ុន្តែវាត្រូវការពេលវេលា ដើម្បីសិក្សាពីទីផ្សារ និងស្ថានភាពភូមិសាស្រ្តលើទីក្រុងថ្មីនេះថាមានភាព អំណោយផល និងទាក់ទាញការចូលទៅរស់នៅរបស់ប្រជាពលរដ្ឋឬយ៉ាងណា។
លោកបន្តថា “ខ្ញុំគ្រោងនឹងអភិវឌ្ឍន៍នៅទីក្រុងថ្មីនេះ ដោយសារយើងមានដីសំរាប់ គំរោងរួចហើយ តែអ្វីៗទំនងជាត្រូវការពេលវេលា”។
ជាមួយនឹងភាពអំណោយផលនៃទីតាំងភូមិសាស្រ្ត ហេដ្ឋារចនាសម្ព័ន្ឋយ៉ាងល្អប្រសើរ ទីក្រុងនៃទីរួមខេត្តត្បូងឃ្មុំថ្មី ស័ក្តិសមសំរាប់ការសាងសង់ផ្ទះលំហែរកាយ ដោយសារទីក្រុងថ្មីនេះស្ថិតនៅលើខ្ពង់រាប មានព្រៃឈើ ពិសេសដើមម៉ៃសាក់ត្រឈឹងត្រឈៃ ។ជាមួយគ្នានេះទីក្រុងថ្មីនេះ ស្ថិតនៅចំចំណុចប្រសព្វស្រុក និងក្រុមចំនួនបី គឺស្រុកពញ្ញាក្រែក ក្រុងសួង និងស្រុកតំបែរ។
អនុប្រធានសមាគមអ្នកជំនាញអចលនទ្រព្យកម្ពុជា លោកយិន លាងគង់ដែលបានចុះសិក្សាពីសក្តានុពលនៃទីក្រុងថ្មីនេះបានមានប្រសាសន៍ឲ្យដឹងថា ហេដ្ឋារចនាសម្ព័ន្ឋល្អប្រសើរជារឿងមួយគួរឲ្យចាប់អារម្មណ៍ ប៉ុន្តែតង់ស៊ីតេរបស់ប្រជាពលរដ្ឋនៅក្រុងថ្មីនេះពិតជាមានកម្រិតខ្លាំងណាស់ ហេតុនេះការវិនិយោគសាងសង់បុរី ឬសំណង់លំនៅដ្ឋាននៅទីក្រុងថ្មីនេះ ទាមទារការបោះទុនច្រើន និងត្រូវការពេលវេលាយូរ ដើម្បីប្រមូលទុនត្រលប់មកវិញ ដែលនេះជាអ្វីដែលអ្នកវិនិយោគតែងតែពិចារណា។
លោកបន្តថា “ឧបសគ្គនៃភាពរីកចម្រើនរបស់ទីក្រុងថ្មីនេះ គឺដីមានតម្លៃថ្លៃ ដោយសារដីនៅក្នុងទីក្រុងនេះ ត្រូវបានទិញទុកដោយអ្នកមានអំណាច និងប្រាក់ច្រើន ហើយពួកគេទុកដីយកចំណេញ ជាជាងអភិវឌ្ឍន៍ជាគំរោងអ្វីមួយ”។ លោកបន្តថា “ការទាក់ទាញឲ្យប្រជាពលរដ្ឋចូលទៅរស់នៅក្នុងទីក្រុងនេះ ទាមទារឲ្យមានការដាក់ចេញគោលនយោបាយច្បាស់លាស់ពីរដ្ឋាភិបាល ក្នុងការលើកទឹកចិត្តវិស័យឯកជនឲ្យចូលទៅរស់នៅក្នុងទីក្រុងថ្មីនេះ”។
លោកបន្តថា អ្នកវិនិយោគរោងចក្រ សហគ្រាស គំរោងលំនៅដ្ឋាន និងមជ្ឈមណ្ឌលពាណិជ្ជកម្មនានា គួរទទួលបានការលើកទឹកចិត្តជាពិសេសពីរដ្ឋាភិបាល ដើម្បីទាក់ទាញការវិនិយោគ ពិសេសជំរុញ និងទាក់ទាញប្រជាពលរដ្ឋចូលទៅរស់នៅទីក្រុងថ្មីនេះ។
លោកបណ្ឌិតបេងហុង សុជាតិខេមរ៉ូអគ្គនាយកនៃអគ្គនាយកដ្ឋានលំនៅដ្ឋាន ក្រសួងរៀបចំដែនដី នគរូបនីយកម្មនិងសំណង់ និងជាស្ថាបត្យកររៀបចំគូរប្លង់លើហេដ្ឋារចនាសម្ព័ន្ឋទីក្រុងថ្មីនេះ ធ្លាប់បានមានប្រសាសន៍ឲ្យដឹងថា នាពេលអនាគតទីក្រុងថ្មីនេះនឹងមានភាពរីកចម្រើន និងតភ្ជាប់ជាមួយក្រុងសួង និងស្រុកពញ្ញាក្រែកដែលស្ថិតនៅក្បែរទីរួមខេត្តថ្មីនេះ ប៉ុន្តែវាត្រូវការពេលវេលា៥ទៅ១០ឆ្នាំ ទើបការរីកចម្រើននេះនឹងអាចឆ្លើយតបតាមចក្ខុវិស័យរបស់ប្លង់គោលទីក្រុង។
លោកបន្តថា “ខេត្តត្បូងឃ្មុំអាចប្រែក្លាយជាមជ្ឈមណ្ឌលកណ្តាល នៃកសិឧស្សាហកម្ម ដោយសារបណ្តាខេត្តជុំវិញនេះ សុទ្ឋតែជាខេត្តមានលក្ខណៈអំណោយផលផ្នែកកសិកម្ម”។ លោកបន្តថា “នាពេលអនាគតខ្សែរថភ្លើងតភ្ជាប់អាស៊ាន ចិនភាគខាងត្បូងអាចនឹងតភ្ជាប់និងមានចំណតឈប់សំរាកនៅទីក្រុងថ្មីនេះ ដែលជំរុញឲ្យទីក្រុងនេះមានភាពរីកចម្រើនលឿននាពេលអនាគត”។
ហេដ្ឋារចនាសម្ព័ន្ឋនៃទីក្រុងថ្មីនេះ ត្រូវបានរៀបចំយ៉ាងពិសេស ដោយមានការបែងចែកគ្នាដាច់រវាងប្រព័ន្ឋទឹកកខ្វក់ និងទឹកភ្លៀងមិនឲ្យមានភាពច្របល់ចូលគ្នានោះឡើយ៕
