ដោយ វុត្ថា
ព្រះសីហនុៈ បើទោះជាបញ្ហាផ្សេងៗ ត្រូវបានដោះស្រាយជាបន្តបន្ទាប់ដោយជោគជ័យ ការបន្តហូរចូលនៃក្រុមហ៊ុនវិនិយោគមកខេត្ត នេះទាមទារអោយរដ្ឋបាលខេត្តបន្តសិក្សា វាយតម្លៃស្ថានភាពក្នុងមូលដ្ឋាន ដោយកំណត់នូវប្រភពបញ្ហាអោយបានច្បាស់លាស់ ហើយបន្តបំពេញការងារបម្រើប្រជាជនឱ្យបានសកម្ម និងប្រកបដោយប្រសិទ្ធភាពជាងមុន។នេះ គឺជាការលើកឡើងរបស់ លោក ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា នៅក្នុងកិច្ចប្រជុំជុំជាមួយរដ្ឋបាលខេត្តព្រះសីហនុ។
លោកហ៊ុន ម៉ានី បានមានប្រសាសន៍ក្នុងជំនួបជាមួយ អភិបាលខេត្តព្រះសីហនុ លោកគួច ចំរើននាថ្ងៃទី ថ្ងៃទី២៥ ខែកញ្ញា ឆ្នាំ២០១៩នេះ ដោយបានវាយតម្លៃខ្ពស់ចំពោះកិច្ចខិតខំប្រឹងប្រឹងរបស់អាជ្ញាធរខេត្ត ក្នុងការដោះស្រាយនូវបញ្ហាបន្ទាន់ៗមួយចំនួនដើម្បីឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ ក៏ដូចជាការអនុវត្តកម្មវិធីនយោបាយរបស់រាជរដ្ឋាភិបាល។
-->
លោកបន្តថា “បើទោះបីជាមានមតិលើកឡើងលើចំណុចផ្សេងៗ ដែលកើតមានក្នុងខេត្ត តាមបណ្តាញសង្គមក្តី តែក្នុងនោះក៍មានសកម្មភាពជាច្រើន ដែលឆ្លុះបញ្ចាំងពីការប្រឹងប្រែងយ៉ាងសកម្មរបស់រដ្ឋបាលខេត្ត ក្នុងការដាក់ចេញជាវិធានការទាន់ពេលវេលា និងយ៉ាងហ្មត់ចត់ ដើម្បីឆ្លើយតបកង្វល់ប្រជាជន ក៏ដូចជាសម្រួលការបម្រើសេវាសាធារណៈក្នុងខេត្តទាំងមូលផងដែរ”។
បច្ចុប្បន្នរាជរដ្ឋាភិបាលបានចាត់ទុកខេត្តព្រះសីហនុ ជាតំបន់សេដ្ឋកិច្ចគំរូពហុបំណងស្របតាមគោលនយោបាយអភិវឌ្ឍន៍វិស័យឧស្សាហកម្មឆ្នាំ ២០១៥-២០២៥ ។ ខេត្តមានសក្កានុពល ខាងវិស័យកសិកម្ម ពាណិជ្ជកម្ម ឧស្សាហកម្ម ទេសចរណ៍ និងសំណង់ ដែលជាវិស័យសំខាន់ក្នុងការអភិវឌ្ឍសេដ្ឋកិច្ច ក្នុងនោះមានកំពង់ផែទឹកជ្រៅ ផ្លូវដែក ព្រលានយន្តហោះ តំបន់សេដ្ឋកិច្ច ឆ្នេរ កោះ និងតំបន់ឧទ្យានជាតិ។
ម្យ៉ាងទៀតលំហូរអ្នកវិនិយោគគិនចិន និងទេសចរណ៍ចិនយ៉ាងកំហុគមកកាន់ខេត្តព្រះសីហនុ ធ្វើឱ្យខេត្តមានការអភិវឌ្ឍយ៉ាងឆាប់រហ័សនាពេលបច្ចុប្បន្ននេះ និងមានបញ្ហាជាច្រើនរួមមានអសន្តិសុខ សណ្តាប់ធ្នាប់សធារណៈមិនមានរបៀបរយ និងហេដ្ឋារចនាសម្ព័ន្ធមិនទាន់ល្អជាដើម។
លោក គួច ចំរើន អភិបាល នៃគណៈអភិបាលខេត្តព្រះសីហនុ ធ្លាប់មានប្រសាសន៍ថា ខេត្តព្រះសីហនុមានវិនិយោគិន ពាណិជ្ជករ អាជីវករ ប្រកបរបររកស៊ីកាន់ តែច្រើន បង្កើននូវទំនុកចិត្តពីភ្ញៀវទេសចរ ដែលមកសម្រាកកម្សាន្តនៅខេត្ត កាន់តែសប្បាយរីករាយ និងមានសុវត្ថិភាពនៅលើទឹកដីខេត្តព្រះសីហនុ ដោយបច្ចុប្បន្នអ្នកវិនិយោគចិន ស្ថិតលំដាប់លេខ១ដែលមកបណ្ដាក់ទុន។
លោកបន្តថា ប៉ុន្មានឆ្នាំចុងក្រោយនេះ ខេត្តព្រះសីហនុ មានការបណ្ដាក់ទុនយ៉ាងច្រើនសន្ធឹកសន្ធាប់ ពីសំណាក់វិនិយោគិន ពិសេសវិនិយោគចិន ជាហេតុធ្វើឲ្យខេត្តព្រះ សីហនុ មានការរីកចម្រើនយ៉ាងឆាប់រហ័ស ផ្អែកលើគ្រប់វិស័យនិងបានជម្រុញ ឱ្យមានកំណើនប្រជាពលរដ្ឋ នៅតាមបណ្ដាខេត្តផ្សងៗមកធ្វើការងារ និងប្រកបរបរទៅតាមជំនាញ និងសមត្ថភាពដែលខ្លួនមាន៕
