ដោយ Donald Lee
ពិភពលោក៖ អង្គការពាណិជ្ជកម្មពិភពលោក (WTO) បានព្យាករណ៍ថា កំណើនសេដ្ឋកិច្ចសកលបាន នឹងកំពុងឈមគ្រោះថ្នាក់ខ្លាំងសម្រាប់ឆ្នាំ២០១៩ និង ២០២០ និងបានព្រមានថាអាចនឹងធ្លាក់ចុះខ្លាំងថែមទៀត។
យោងតាមរបាយការណ៍ថ្មីមួយរបស់ WTO ដែលត្រូវបានចេញផ្សាយកាលពីថ្ងៃអង្គារម្សិលមិញនេះ បានឱ្យដឹងថា សង្រ្គាមពាណិជ្ជកម្មរវាងសហរដ្ឋអាមេរិក និងចិន ព្រមទាំងការធ្លាក់ចុះសេដ្ឋកិច្ចពិភពលោក ជាកត្តាចម្បងនៃការធ្លាក់ចុះនេះ។
របាយការណ៍ដដែលបន្តថា ការកើនឡើងភាពតានតឹងពាណិជ្ជកម្ម និងការធ្លាក់ចុះនៃសេដ្ឋកិច្ចពិភពលោក បានធ្វើឱ្យសេដ្ឋវិទូអង្គការពាណិជ្ជកម្មពិភពលោក ទម្លាក់ការព្យាករណ៍របស់ខ្លួន ចំពោះកំណើនពាណិជ្ជកម្មនៅឆ្នាំ២០១៩ និង២០២០ខាងមុខ។
អង្គការពាណិជ្ជកម្មពិភពលោក បានកែតម្រូវតួលេខចំពោះទំហំពាណិជ្ជកម្មទំនិញពិភពលោកពីកំណើន ២,៦ភាគរយ នៅក្នុងខែមេសា មកដល់ ១,២ ភាគរយ។ WTO ក៏បានព្រមានផងដែរថា ការព្យាករណ៍កំណើន ២,៧ ភាគរយសម្រាប់ឆ្នាំ២០២០ ដែលធ្លាក់ចុះពី ៣,០ភាគរយ ត្រូវបានគណនាក្រោមការសន្មតថា សង្គ្រាមពាណិជ្ជកម្មរវាងសហរដ្ឋអាមេរិក និងចិន នឹងវិលត្រឡប់ទៅរកទំនាក់ទំនងពាណិជ្ជកម្មធម្មតាវិញ។
លោក Roberto Azevêdo អគ្គនាយកអង្គការពាណិជ្ជកម្មពិភពលោក បានមានប្រសាសន៍ថា “ទស្សនវិស័យដ៏ខ្មៅងងឹតសម្រាប់ពាណិជ្ជកម្ម កំពុងតែឈានទៅរកវិបត្តិដោយមិននឹងស្មានដល់”។
លោកបន្ថែមថា “លើសពីផលប៉ះពាល់ដោយផ្ទាល់ និងជម្លោះពាណិជ្ជកម្មកាន់តែមានភាពមិនប្រាកដប្រជា កំពុងធ្វើឱ្យអាជីវកម្មមួយចំនួនពន្យារពេលការវិនិយោគ ក្នុងការបង្កើនផលិតភាពដើម្បីលើកកម្ពស់កម្រិតជីវភាព”។
លទ្ធផលនៃសង្រ្គាមពាណិជ្ជកម្មបាន និងកំពុងជួបមហន្តរាយ និងកំពុងទាញសេដ្ឋកិច្ចពិភពលោកឆ្ពោះទៅរកវិបត្តិសេដ្ឋកិច្ច។
របាយការណ៍របស់ Bloomberg បានប៉ាន់ស្មានកាលពីពេលថ្មីៗនេះថា សេដ្ឋកិច្ចពិភពលោក នឹងខាតបង់ជិត ៥៨៥ពាន់លានដុល្លារនៅឆ្នាំ២០២១ ដោយសារបញ្ហាសង្គ្រាមពាណិជ្ជកម្មដែលកំពុងកើតមាននាពេលបច្ចុប្បន្ន៕
