ដោយ វុត្ថា
ភ្នំពេញ៖ អ្នកឧកញ៉ាម៉ុង រិទ្ឋីដែលមានរហ័សនាមស្តេចកសិកម្មបានឲ្យដឹងថា អ្នកវិនិយោគតៃវ៉ាន់ នឹងមកវិនិយោគដាំដើមផាស៊ិន (Passion) នៅកម្ពុជានាពេលខាងមុខនេះ។
លោកឧកញ៉ាម៉ុង រិទ្ឋីអគ្គនាយកក្រុមហ៊ុនម៉ុង រិទ្ឋីគ្រុបបានសរសរលើទំព័របណ្តាញទំនាក់ទំនងសង្គមរបស់លោកនាថ្ងៃទី១៧ មករានេះថា ពេញមួយថ្ងៃពុធទីខែធ្នូ១៧ ខែមករា ឆ្នាំ២០១៨ គណប្រតិភូកម្ពុជាយើង បានមកពិនិត្យសិក្សាស្វែងយល់ នៅក្នុងកសិដ្ឋានបណ្តុះពូជបន្លែ ផ្លែឈើ និងជីធម្មជាតិនៅលើផ្ទៃដី១៥ហិកតា សម្រាប់លក់ចែកចាយជូនកសិករនៅជុំវិញកសិដ្ឋាន ដែលមានទីតាំងស្ថិតនៅក្នុងស្រុកណានថូវ ភាគកណ្តាលកោះតៃវ៉ាន់។
លោកបន្តថា “ខ្ញុំលើកយកតែដំណាំមួយមុខក្នុងចំណោមរាប់សឹបមុខ គឺផ្លែប៉ាស់សិន (Passion Fruit) ដែលអាចទទួលផលបានជាមធ្យម៦០ទៅ៨០តោន ក្នុងមួយហិកតា ហើយបើគិតជាលុយ គឺបានរហូតដល់ដប់ម៉ឺនដុល្លារក្នុងមួយឆ្នាំ តែកសិករនៅក្នុងតំបន់នេះភាគច្រើន ជួលដីគេក្នុងមួយឆ្នាំចាប់ពី១០,០០០ដល់១៥,០០០ក្នុងមួយឆ្នាំ។
លោកឧកញ៉ាបានបន្តថា ក្រោយពីបានពិភាក្សាគ្នារួចមក (ជាមួយអ្នកវិនិយោគតៃវ៉ាន់) ពួកគាត់យល់ព្រមមកបោះទុនវិនិយោគ នៅក្នុងព្រះរាជាណាចក្រ កម្ពុជាយើងនាពេលខាងមុខនេះ៕
