ដោយ វុត្ថា
ភ្នំពេញ៖ រាជរដ្ឋាភិបាលកម្ពុជា គ្រោងនឹងចំណាយថវិកាចំនួន៣០លានដុល្លារអាមេរិក សម្រាប់ការផលិតបន្លែក្នុងស្រុក ជាមួយនឹងគោលដៅដាក់ចេញចំនួន៩០.០០០តោនក្នុងមួយឆ្នាំ ដើម្បីឆ្លើយតបនឹងតម្រូវការទីផ្សារក្នុងស្រុក និងការកាត់បន្ថយការនាំចូលពីបរទេស។
រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោកវេង សាខុនបានមានប្រសាសន៍ឲ្យដឹងកាលពីម្សិលម៉ិញថា រដ្ឋាភិបាលនឹងផ្តល់ការគាំទ្រផ្នែកបច្ចេកទេស និងប្រព័ន្ធធារាសាស្រ្តសម្រាប់កសិករ។ បច្ចុប្បន្ននេះប្រទេសកម្ពុជាបាននាំចូលបន្លែពី២០០ ទៅ ៤០០ តោនក្នុងមួយថ្ងៃសម្រាប់ការផ្គត់ផ្គង់ទីផ្សារក្នុងស្រុក ដែលមានតម្លៃទឹកប្រាក់ប្រមាណជាង២០០លានដុល្លារក្នុងមួយឆ្នាំៗ។
លោកបន្តថា “ការនាំចូលភាគច្រើនគឺមកប្រទេសជិតខាង ដូចជាប្រទេសថៃ និងវៀតណាម ដើម្បីផ្គត់ផ្គន់តម្រូវការក្នុងទីផ្សារក្នុងស្រុក។ ការនាំចូលបន្លែមនេះ ត្រូវបានគេមើលឃើញថា បន្លែមួយចំនួនធំបានផ្ទុកនូវសារធាតុគីមីដែលធ្វើអោយប៉ះពាល់ដល់អ្នកប្រើប្រាស់”។
សម្តេចនាយករដ្ឋមន្ត្រី ហ៊ុន សែន ធ្លាប់បានថ្លែងកាលពីពេលថ្មីៗនេះថា កុំអោយប្រជាពលរដ្ឋប្រើប្រាស់បន្លែ ដែលមានផ្ទូកនូវសាធារតុគីមី ។ ការណ៍នេះ បានធ្វើឲ្យមានការប្រតិកម្មយ៉ាងខ្លាំង ពីសំណាក់អ្នកប្រើប្រាស់បន្លែ ដោយពួកគេលើកឡើងថា តើធ្វើដូចម្តេចទើបដឹងថា បន្លែមានផ្ទុកសារធាតុគីមី ឬមិនមាន? បើអជ្ញាធរពាក់ព័ន្ធមិននឹងអើពើចំពោះសុខភាពពលរដ្ឋផងនោះ។
ជាមួយគ្នានេះ អ្នកប្រើប្រាស់បន្លែ ក៏បានចោទប្រកាន់ខ្លាំងៗ ទៅលើអាជ្ញាធរនៅតាមព្រំដែន ដែលមិនបានត្រួតពិនិត្យឲ្យបានត្រឹមត្រូវ មុននឹងអោយគេនាំចូលមកលក់ក្នុងទីផ្សារក្នុងប្រទេសកកម្ពុជា៕
