ដោយ គង់ សូរិយា
ភ្នំពេញ៖ ស្របពេលបច្ចេកវិទ្យាមានការរីកចម្រើនយ៉ាងខ្លាំង ការចុះហត្ថលេខាលើលិខិតស្នាមនានា ត្រូវបានធ្វើឡើងតាមប្រព័ន្ឋកុំព្យូរទ័រ ដោយប្រើប្រាស់ប ច្ចេកវិទ្យា និងធានាបាននូវសុច្ចរឹតភាពសម្រាប់ការប្រើប្រាស់ផងដែរ។
ឆ្លើយតបនឹងបដិវត្តន៍បច្ចេកវិទ្យា ក្នុងវិស័យឧស្សាហកម្ម ក្រសួងប្រៃសណីយ៍ និងទូរគមនាគមន៍បានរៀបចំសិក្ខាសាលាផ្សព្វផ្សាយ អនុក្រឹត្យហត្ថលេខាឌីជីថល ដោយមានការចូលរួមពីបណ្ដាក្រសួង ស្ថាប័នពាក់ព័ន្ធ ប្រតិបត្តិករ និងបុគ្គលពាក់ព័ន្ធ និងវិស័យទូរគមនាគមន៍ ប្រតិបត្តិករវិស័យហិរញ្ញវត្ថុ និងវិស័យឯកជនពាក់ព័ន្ធផ្សេងទៀត។
យោងតាមសេចក្តីប្រកាសព៌តមានរបស់ក្រសួងប្រៃសណីយ៍ និងទូរគមនាគមន៍បានចែកជូនអ្នកសារព៌តមាននាព្រឹកថ្ងៃទី៣០ មករានេះបានឲ្យដឹងថា ហត្ថលេខាឌីជីថល ប្រៀបបានទៅនឹងអត្តសញ្ញាណរបស់អ្នកប្រើប្រាស់ ប្រតិបត្តិការអនឡាញ ឬអ៊ីនធឺណែត។ ហត្ថលេខាឌីជីថល ជាធាតុផ្សំសំខាន់ក្នុងការធ្វើឲ្យមានសន្តិសុខ និងសុវត្ថិភាព តាមរយៈយន្តការការបញ្ជាក់ពីភាពត្រឹមត្រូវ សុច្ចរិតភាពរក្សាការសម្ងាត់ និងការមិនអាចបដិសេធបាន។
រដ្ឋមន្រ្តីក្រសួងប្រៃសនីយ៍ និងទូរគមនាគមន៍លោកត្រាំ អ៊ីវតឹកបានថ្លែងក្នុង ពិធីបើកសិក្ខាសាលាផ្សព្វផ្សាយអនុក្រឹត្យស្តីពី ហត្ថលេខាឌីជីថល នាព្រឹកថ្ងៃទី ៣០ខែមករាថា អនុក្រឹត្យហត្ថលេខាឌីជីថលនេះ នឹងក្លាយជាធាតុផ្សំមួយសំខាន់ ក្នុងការចូលរួមចំណែកការពារសន្តិសុខ សុវត្ថិភាព និងភាពទុកចិត្តបាននៃប្រតិបត្តិការតាមប្រព័ន្ធអ៊ីនធរណេត ទាំងក្នុងរាជរដ្ឋាភិបាល វិស័យឯកជន និងអ្នកប្រើប្រាស់។
លោកបន្ថែមថា “វាជាចំណុចដំបូងនៃក្របខណ្ឌសន្តិសុខបច្ចេកវិទ្យា គមនាគមន៍ និងព៌តមាន ក្នុងការកសាងមូលដ្ឋាន នៃការប្រើប្រាស់អ៊ីនធណេតកម្ពុជា ប្រកបដោយទំនុកចិត្ត និងសន្តិសុខ សម្រាប់កិច្ចការធុរកិច្ច សម្រាប់ស្រាវជ្រាវនិងអភិវឌ្ឍន៍ និងសម្រាប់ទំនាក់ទំនងប្រចាំថ្ងៃ”។
អនុក្រឹត្យហត្ថលេខាឌីជីថលត្រូវបានរដ្ឋាភិបាល សម្រេចដាក់ឲ្យប្រើប្រាស់កាលពីថ្ងៃទី ២៩ ខែធ្នូ ឆ្នាំ២០១៧កន្លងមកនេះ៕
