ដោយ វុត្ថា
ភ្នំពេញ៖ នៅក្នុងផែនការអភិវឌ្ឍន៍ហេដ្ឋារចនាសម្ព័ន្ឋជាមួយតំបន់ និងពិភព លោក បណ្តាប្រទេសក្នុងតំបន់នានាកាន់តែខិតជិតគ្នាបន្ថែមទៀត ដែលនាពេលអនាគតនឹងមានផ្លូវហាយវ៉េ ឥណ្ឌា-មីយ៉ាន់ម៉ា-ថៃ នឹងត្រូវតភ្ជាប់មកកម្ពុជា ។
ប្រមុខរដ្ឋាភិបាលកម្ពុជា និងឥណ្ឌាក្នុងដំណើរទស្សនកិច្ចទៅកាន់ប្រទេសឥណ្ឌាកាលពីពេលថ្មីៗនេះ របស់សម្តេចតេជោហ៊ុន សែន ប្រមុខរដ្ឋាភិបាលប្រទេសទាំងពីរ បានសម្តែងការពេញចិត្តចំពោះវឌ្ឍនភាព នៃកិច្ចប្រឹងប្រែងធ្វើការតភ្ជាប់ក្នុងតំបន់ ដូចជាផ្លូវហាយវ៉េត្រីភាគី ឥណ្ឌា-មីយ៉ាន់ម៉ា-ថៃ និងបានឯកភាពរិះរកលទ្ធភាព ដើម្បីពង្រីកបន្តផ្លូវហាយវ៉េនេះឲ្យមកដល់កម្ពុជា និងហួសពីកម្ពុជាទៅទៀត។
ផ្លូវហាយវ៉េត្រីភាគី ឥណ្ឌា-មីយ៉ាន់ម៉ា-ថៃ គឺតភ្ជាប់ពីក្រុង Moreh ក្នុងរដ្ឋ Manipur ប្រទេសឥណ្ឌារហូតដល់ក្រុង Mae Sot ប្រទេសថៃ ដោយឆ្លងកាត់ប្រទេសមីយ៉ាន់ម៉ា ហើយបើតាមគម្រោងផ្លូវហាយវ៉េនេះ នឹងពង្រីកដល់កម្ពុជា ឡាវ និងវៀតណាម។
រដ្ឋមន្រ្តីដឹកជញ្ជូនឥណ្ឌា លោក Nitin Gadkari បានបញ្ជាក់កាលពីពេលថ្មីៗនេះថា ផ្លូវហាយវ៉េឥណ្ឌា-មីយ៉ាន់ម៉ា-ថៃ នឹងអាចដំណើរការបាននៅខែធ្នូ ឆ្នាំ២០១៩ ដែលផ្លូវប្រវែងប្រហែល១៤០០គីឡូម៉ែត្រនេះ ដែលនឹងជួយជំរុញដល់វិស័យពាណិជ្ជកម្ម សុខភាព អប់រំ និងទេសចរណ៍ ក្នុងប្រទេសទាំង៣នេះ៕
