ដោយគង់ សូរិយា
ភ្នំពេញ សណ្ឋាគារកម្រិតផ្កាយប្រាំ ខ្ពស់ជាងគេលើកតំបូងនៅរាជធានីភ្នំពេ ញIntercontinental Hotel បានសម្រេចប្តូរឈ្មោះជាផ្លូវការហើយ ចាប់ពីថ្ងៃទី១ កុម្ភៈ ឆ្នាំ២០១៨នេះ។
សណ្ឋាគារកំពស់១៥ជាន់ និងបានប្រើប្រាស់Franchise លំដាប់ពិភពលោកគឺIntercontinental រយៈពេលប្រមាណ២០ឆ្នាំកន្លងមកនេះ បានប្តូរមកជាឈ្មោះសណ្ឋាគារGreat DUKEវិញ។ សណ្ឋាគារនេះ មានទីតាំងនៅចំណុចប្រសព្វរវាងមហាវិថីព្រះមុនីរ៉េត និងមហាវិថីម៉ៅ សេទុង ពោលគឺស្ថិតនៅភាគខាងត្បូងផ្សារដើមគរ សព្វថ្ងៃនេះ។
នាយកផ្នែកលក់នៃសណ្ឋាគារនេះកញ្ញាសេង គីមស័របានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៣១ មករានេះថា សណ្ឋាគារនេះបានសម្រេចប្តូរឈ្មោះចាប់ពីថ្ងៃទី១ កុម្ភៈខាងមុខនេះ ដោយម្ចាស់សណ្ឋាគារនេះបានសម្រេចប្រើប្រាស់ឈ្មោះ ដែលបង្កើតដោយខ្លួនឯង ប៉ុន្តែសេវាកម្មទាំងអស់នៅសណ្ឋាគារកម្រិតផ្កាយប្រាំដ៏ប្រណីតនេះ គឺរក្សានៅដដែល និងរក្សាបាននូវសន្តិសុខ និងសេវាកម្មពេញលេញដូចពីមុន។
កញ្ញាបន្តថា “ខ្ញុំគិតថាការប្តូរឈ្មោះនេះ មិនប៉ះពាល់ដល់អាជីវកម្មសណ្ឋាគារនេះនោះទេ ព្រោះគ្រប់សេវាកម្មនៅតែរក្សាគុណភាពដើម និងមានលក្ខណៈពិសេសដែលច្នៃប្រឌិតឡើងដោយអ្នកវិនិយោគសណ្ឋាគារនេះ”។កញ្ញាបន្តថា “អ្វី
ដែលយើងផ្តោតខ្លាំងនៅទីនេះ គឺសេវាកម្មសន្តិសុខ និងសេវាកម្មផ្សេងៗទៀតជាសេវាកម្មលំដាប់ពិភពលោក ដើម្បីផ្តល់ឲ្យអ្នកស្នាក់នៅមានផាសុខភាព និងទទួលអារម្មណ៍ថា ការស្នាក់នៅសណ្ឋាគារនេះ ទទួលបាននូវបទពិសោធន៍ដ៏ល្អ សម្រាប់ជីវិត”។
សណ្ឋាគារនេះបានបើកដំណើរការកំឡុងឆ្នាំ១៩៩៥ ឬ១៩៩៦ សណ្ឋាគារនេះមានកំពស់១៥ជាន់ និងមានបន្ទប់សរុបចំនួន៣៤៥បន្ទប់។
ជាន់ក្រោមដីនៃសណ្ឋាគារនេះជាហាងលក់ទំនិញតូចៗ ជាន់ទី១ ជាភោជនីយដ្ឋាន បន្ទប់ប្រជុំ កន្លែងទទួលភ្ញៀវ។ ជាន់ទី២ ជាការិយាល័យសម្រាប់ជួល និងជាទីតាំងសម្រាប់ប្រជុំធំ។ ជាន់ទី៣ ជាកន្លែងហាត់ប្រាណ អាងហែលទឹក និងបន្ទប់ប្រជុំផងដែរ។ (មិនមានជាន់ទី៤) ចំណែកជាន់ទី៥ ជាអាផាតម៉ិន ដែលមានបន្ទប់ធំៗ សម្រាប់ជួល និងចាប់ពីជាន់ទី៦ដល់ជាន់ទី១៥ ជាបន្ទប់សណ្ឋាគារដែលមានសរុបចំនួន៣៤៥បន្ទប់។
លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងថា សណ្ឋាគារនេះមានសេវាកម្មល្អប្រសើរ ហើយមានកេរ្ត៍ឈ្មោះល្អ ដោយសារសណ្ឋាគារនេះ អាចទទួលមេដឹកនាំពិភពលោកធំៗ ចូលរួមកិច្ចប្រជុំធំៗនៅរាជធានីភ្នំពេញ និងស្នាក់នៅក្នុងសណ្ឋាគារនេះ។ ហេតុនេះ គុណភាព សេវាកម្មសណ្ឋាគារនេះមានស្តង់ដាលំដាប់ពិភពលោក ដែលមានការទទួលខុសត្រូវនិងស្របតាមស្តង់ដាអន្តរជាតិ។
នៅពេលសួរពីការប្តូរឈ្មោះសណ្ឋាគារនេះអាចប៉ះពាល់ដល់ទំនុកចិត្ត និងអាជីវកម្មសណ្ឋាគារនេះឬទេ លោកហូ វណ្ឌីបានបដិសេធមិនអត្ថាធិប្បាយ៕
លោកធួន ស៊ីណានប្រធានសមគមទេសចរណ៍អាស៊ីប៉ាស៊ីហ្វិកបានថ្លែងថា ការផ្លាស់ប្តូរឈ្មោះសណ្ឋាគារនេះ ប្រហែលមិនប៉ះពាល់ដល់អាជីវកម្មរបស់ គាត់ធ្ងន់ធ្ងរនោះទេ ដោយសារសណ្ឋាគារនេះ ពឹងផ្អែកលើសេវាកម្មពីរដ្ឋាភិបាលច្រើន ប៉ុន្តែស្របពេលការប្រកួតប្រជែងកើនឡើង ក្នុងរាជធានីភ្នំពេញ អាចធ្វើឲ្យការលក់បន្ទប់មិនបានតម្លៃដើមនោះទេ ព្រោះបើគាត់លែងប្រើប្រាស់ឈ្មោះIntercontinental ការលក់បន្ទប់អាចមានតម្លៃធ្លាក់ចុះជាងមុន៕