ដោយ គង់ សូរិយា
ភ្នំពេញ៖ ទឹកប្រាក់សរុប៤,២០០លានដុល្លារអាមេរិក ត្រូវបានស្រោចស្រពក្នុងសេដ្ឋកិច្ចកម្ពុជា ដែលមនុស្សជិត១,៨លាននាក់កំពុងតែសកម្ម ក្នុងសកម្មភាពសេដ្ឋកិច្ចជាតិ
ទេសាភិបាលធនាគារជាតិនៃកម្ពុជា លោកជា ចាន់តូបានមានប្រសាសន៍ ក្នុងពិធីបើកសិក្ខាសាលាផ្សព្វផ្សាយស្ដីពី “វិស័យមីក្រូហិរញ្ញវត្ថុនៅកម្ពុជា ” ដែលរៀបចំឡើងដោយធនាគារ ជាតិនៃកម្ពុជានៅថ្ងៃទី១២ ខែកុម្ភៈឆ្នាំនេះថា ឥណទានសរុបចំនួនជាង១៧ទ្រីលានរៀល ឬប្រហែល៤២០០លានដុល្លារនេះ បានផ្តល់ ដោយគ្រឹះស្ថានមីក្រូហិរញ្ញវត្ថុនៅកម្ពុជាចំនួន៧៦ និងប្រតិបត្តិករឥណទានជនបទចំនួន៣០២ រួមទាំបណ្តាញប្រតិបត្តិការ ដែលបានធ្វើប្រតិបត្តិការនៅទូទាំងផ្ទៃប្រទេសផងដែរ។
យោងតាមទិន្នន័យរបស់ធនាគារជាតិនៃកម្ពុជា បានបង្ហាញឲ្យដឹងផងដែរថា ប្រជាពលរដ្ឋពេញវ័យបាន និងកំពុងប្រើប្រាស់សេវាហិរញ្ញវត្ថុ ផ្លូវការបានកើនពីប្រមាណ៨,៧ភាគរយកាលពីឆ្នាំ២០០៦។វិស័យមីក្រូហិរញ្ញវត្ថុ ក៏បាននិងកំពុងផ្តល់សេវារបស់ខ្លួនយ៉ាងទូលំទូលាយ ទូទាំងផ្ទៃប្រទេសកម្ពុជារហូតដល់ថ្នាក់ឃុំ-ភូមិទៀតផង។
លោក ជា ចាន់តូ បានបន្តទៀតថា នៅឆ្នាំ២០១៧កន្លងទៅនេះ ទំហំនៃបា្រក់បញ្ញើក៏មានការកើនឡើងផងដែរ ដែលមានទំហំទឹកប្រាក់ប្រមាណ១,៩៥០ លានដុល្លារអាមេរិក និងទទួលបានពីអ្នកផ្ញើប្រាក់ជាង១,៧លាននាក់។
លោកបន្តថា “ការរីកចម្រើនរបស់វិស័យមីក្រូហិរញ្ញវត្ថុកម្ពុជា នាពេលនេះ ជាការឆ្លុះបញ្ចាំងឲ្យឃើញ ពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា”។
លោកបណ្ឌិតម៉ី កល្យាណទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ទំហំឥណទាន និងប្រាក់បញ្ញើរក្នុងវិស័យហិរញ្ញវត្ថុកម្ពុជា មានសញ្ញាវិជ្ជមាន និងស្ថិតក្រោមលក្ខខ័ណ្ឌមួយដែលអាចគ្រប់គ្រងបាន ក្នុងសេដ្ឋកិច្ចជាតិ។លោកបន្តថា ការដាក់ចេញបទបញ្ញត្តិជាបន្តបន្ទាប់របស់ធនាគារជាតិ នៃកម្ពុជាជាការធ្វើយ៉ាងណា ដើម្បីទប់ស្កាត់លំហូរឥណទានខ្ពស់ពេក ព្រោះនៅពេលឥណទានកើនខ្ពស់ពេក ធៀបនឹងប្រាក់ចំណូលជាតិសរុប នឹងធ្វើឲ្យមានវិបត្តិសង្គម និងហានិភ័យដល់សេដ្ឋកិច្ចជាតិ។
លោកបន្តថា “ឥណទានប្រៀបបីដូចជាខ្លាញ់ក្នុងខ្លួនមនុស្ស មនុស្សត្រូវការខ្លាញ់ក្នុងរាងកាយ ប៉ុន្តែបើខ្លាញ់ច្រើនពេក ក៏រាងកាយដំណើរការមិនបានល្អប្រសើរផងដែរ”៕