ដោយ វុត្ថា
ភ្នំពេញៈ អាមេរិកនៅតែជាទីផ្សារដ៏ធំរបស់កម្ពុជា ដោយទំហំនាំចេញរបស់កម្ពុជាទៅកាន់សហរដ្ឋអាមេរិក មានទឹកប្រាក់៣០៦៤លានដុល្លារ កើនឡើងជិត៩ភាគរយកាលពីឆ្នាំមុន។
យោងតាមទិន្នន័យក្រសួងពាណិជ្ជកម្ម ដែលទើបទទួលបានកាលពីថ្ងៃម្សិលម៉ិញបានបង្ហាញថា ប្រទេសកម្ពុជាបាននាំចេញមុខទំនិញនានាទៅលក់នៅសហរដ្ឋអាមេរិក បានកើនពី២.៨១៤លានដុល្លារអាម៉េរិកកាលពីឆ្នាំ២០១៦ ដល់ចំនួន៤០៦៤លានដុល្លារនៅឆ្នាំ២០១៧ កើនឡើង៨,៨៨ភាគរយ។
ទិន្នន័យដដែលបានបង្ហាញថា ទំនិញដែលនាំចេញពីកម្ពុជាទៅទីផ្សារអាម៉េរិក ភាគច្រើនជាផលិតផលវាយនភណ្ឌកាត់ដេរ និងស្បែកជើង ព្រមទាំងប្រភេទទំនិញ កាបូបយួរសម្រាប់អ្នកដំណើរជាដើម។ ដោយឡែកការនាំចូលមុខទំនិញនានារបស់កម្ពុជាពីសហរដ្ឋអាមេរិកវិញ មានតម្លៃទឹកប្រាក់ប្រមាណ៤០០លានដុល្លារអាម៉េរិក កើនឡើង១១ភាគរយ ពីទំហំទឹកប្រាក់៣៦០លានដុល្លារអាម៉េរិក។
មុខទំនិញសំខាន់ៗដែលកម្ពុជា នាំចូលពីសហរដ្ឋអាមេរិកមាន ដូចជា គ្រឿងអេឡិចត្រូនិក យានយន្ត គ្រឿងចក្រ ឱសថ និងបរិក្ខារពេទ្យ។ សហរដ្ឋអាមេរិក គឺជាទីផ្សារធំបំផុតលំដាប់ទី២សម្រាប់កម្ពុជា បន្ទាប់ពីទីផ្សារសហគមន៍អឺរ៉ុប ក្នុងនោះសហរដ្ឋអាមេរិក បានស្រូបយកក្នុងរង្វង់ពី២០ ទៅ៣០ភាគរយ នៃទំនិញសរុបដែលបាននាំចេញពីកម្ពុជា។
កាលពីឆ្នាំ្មមុន រដ្ឋាភិបាលសហរដ្ឋអាមេរិក បានផ្តល់ការអនុគ្រោះពាណិជ្ជកម្មពន្ធទាំងស្រុងដល់ប្រទេសកម្ពុជា សម្រាប់ប្រភេទកាបូបយូរអ្នកដំណើរចូលទៅកាន់ទីផ្សាររបស់ខ្លួន ដែលនេះគឺជាផ្នែកមួយជំរុញ ឱ្យការនាំចេញរបស់កម្ពុជាទៅសហរដ្ឋអាមេរិក មានសន្ទុះកើនឡើង។
យោងតាមស្មារតីនៃសេចក្តីប្រកាសរួម របស់សន្និសីទថ្នាក់រដ្ឋមន្ត្រីនៅទីក្រុងហុងកុង រដ្ឋាភិបាលសហរដ្ឋអាមេរិកបានសន្យាថា នឹងផ្តល់ឱ្យប្រទេសអភិវ ឌ្ឍន៍តិចតួច ក្នុងនោះរួមមានកម្ពុជាផងដែរ នូវការអនុគ្រោះពន្ធនាំចូលទៅកាន់ទីផ្សារសហរដ្ឋអាមេរិក ឱ្យបានយ៉ាងតិច៩៧ភាគរយ ក្នុងលក្ខខណ្ឌពន្ធគយសេរី-កូតាសេរី (GSP-DFQF) របស់អង្គការពាណិជ្ជកម្មពិភពលោក។ប៉ុន្តែគិតមកទល់នឹងពេលនេះ សហរដ្ឋអាមេរិកបានផ្តល់នូវការអនុគ្រោះពន្ធដល់កម្ពុជាត្រឹមតែ៨២,៦ភាគរយតែប៉ុណ្ណោះ។
រដ្ឋបាលលោកប្រធានាធិបតីដូណាល់ ត្រាំ បានដាក់ចេញគោលនយោបាយស្តីពី ការធ្វើពាណិជ្ជកម្មប្រកួតប្រជែង មានលក្ខណៈស្មើភាពគ្នា ខណៈសហរដ្ឋអាមេរិក មានឱនភាពពាណិជ្ជកម្មជាមួយបណ្តាប្រទេសមួយចំនួន ដូចជា ចិន ជប៉ុន កូរ៉េខាងត្បូង កាណាដា ម៉ិកស៊ិក ឥណ្ឌូណេស៊ី ថៃឡង់ដ៏ និងវៀតណាម ដែលមានតម្លៃចាប់ពី១០ ដល់៣០ប៊ីលានដុល្លារអាម៉េរិក។
សហរដ្ឋអាមេរិកនឹងធ្វើការចរចាឡើងវិញ នូវកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសដៃគូរបស់ខ្លួនទាំងនេះ។
បើតាមការបញ្ជាក់ពីមន្ត្រីជាន់ខ្ពស់អាមេរិក បានលើកឡើងនាពេលកន្លងមកថា សហរដ្ឋអាមេរិក គ្មានបំណងចាត់វិធានការណាថ្មីនោះទេ ពោលគឺរក្សាស្ថានភាពទាក់ទងពាណិជ្ជកម្មដដែល ព្រោះទំហំពាណិជ្ជកម្មដែលកម្ពុជា បាននាំចូលមកសហរដ្ឋអាមេរិក មានទឹកប្រាក់តែពី២០០០ទៅ៣០០០លានដុល្លារអាមេ រិកតែប៉ុណ្ណោះ៕