ដោយ វុត្ថា
ភ្នំពេញ៖ ប្រទេសកូរ៉េខាងត្បូងបាន និងកំពុងធ្វើដំណើរឆ្ពោះមកតំបន់ភាគខាងត្បូង ដែលស្ថិតក្នុងតំបន់អាស៊ីអាគ្នេយ៍ ដើម្បីពង្រឹងនិងពង្រីកឥទ្ឋិពល និងបង្កើនទំហំពាណិជ្ជកម្មជាមួយតំបន់អាស៊ាន។
ឯកអគ្គរដ្ឋទូតនៃសាធារណរដ្ឋកូរ៉េប្រចាំកម្ពុជាលោក Oh Nak Young បានថ្លែងក្នុងជំនួបជាមួយលោកឡុង ឌីម៉ង់ឯកអគ្គរាជទូតកម្ពុជាប្រចាំប្រទេសកូរ៉េខាងត្បូងនាព្រឹកថ្ងៃទី១៩ កុម្ភៈនេះថា នយោបាយបាយរបស់កូរ៉េ កំពុងឆ្ពោះមក កាន់ទិសខាងត្បូង ដែលសុទ្ធសឹងតែជាគោលនយោបាយ ដើម្បីពង្រីក និងពង្រឹងទំនាក់ទំនងល្អ ជាមួយប្រទេសក្នុងតំបន់អាស៊ាន រួមទាំងកិច្ចសហប្រតិបត្តិការ មេគង្គ-កូរ៉េ ជាដើម ដែលត្រូវពង្រីកពីកម្រិតរដ្ឋមន្រ្តីការបរទេស ឲ្យទៅជាកម្រិតរដ្ឋាភិបាល។
អាស៊ានមានសមាជិកចំនួន១០ប្រទេស និងមានប្រជាពលរដ្ឋប្រមាណជាង៦៣០លាននាក់។ ចំណែកសាធារណៈរដ្ឋកូរ៉េខាងត្បូង មានប្រជាពលរដ្ឋប្រមាណជា៥១លាននាក់។
ជាមួយគ្នានេះដែរ ឯកអគ្គរដ្ឋទូតកូរ៉េខាងត្បូង បានថ្លែងឲ្យដឹងផងដែរថា កូរ៉េបាន និងកំពុងចាប់ដៃគូពាណិជ្ជកម្ម និងបង្កើនការផ្លាស់ប្តូរទំហំពាណិជ្ជកម្ម ព្រមទាំងបង្កើនទេសចរណ៍ ឲ្យកើនឡើងទ្វេរដងរវាងអាស៊ាន កូរ៉េ ចាប់ពីឆ្នាំនេះតទៅ ដើម្បីឈានទៅសម្រេចតាមផែនការពាណិជ្ជកម្មរបស់ខ្លួនក្នុងតំបន់ឲ្យកើននូវទឹកប្រាក់២០០ពាន់លានដុល្លារនៅត្រឹមឆ្នាំ២០២០ និងមានភ្ញៀវទេសចរណ៍កូរ៉េមកទស្សនានៅក្នុងតំបន់នេះ ឲ្យកើនដល់១០លាននាក់ក្នុងមួយឆ្នាំៗ។
លោក ឡុង ឌីម៉ង់ ឯកអគ្គរាជទូតប្រទេសកម្ពុជា ប្រចាំនៅសាធារណៈកូរ៉េខាងត្បូងបានសរសេរលើ បណ្តាញទំនាក់ទំនងសង្គមរបស់លោកថា “ពេលបាយថ្ងៃត្រង់ជាមួយអនុរដ្ឋមន្ត្រីការបរទេសកូរ៉េ និងបណ្តាទូតអាស៊ានថ្ងៃនេះ កូរ៉េបានប្តេជ្ញានឹងបង្កើន ការផ្លាស់ប្តូរទំហំពាណិជ្ជកម្មរវាងកូរ៉េ និងអាស៊ានក្នុងឆ្នាំ២០២០នេះឲ្យដល់២០០ពាន់លានដុល្លា (បច្ចុប្បន្ន ១២០ពាន់លានដុល្លា) និងជម្រុញភ្ញៀវទេសចរណ៍កូរ៉េ មកអាស៊ានឲ្យបាន១០លាននាក់ក្នុងមួយឆ្នាំ (បច្ចុប្បន្ន ៧លាននាក់ ក្នុងមួយឆ្នាំ)។
លោកបន្តថា “នេះជាសក្តានុពលមួយបន្ថែមទៀត សម្រាប់តំបន់របស់យើង ដូច្នេះកម្ពុជាត្រូវខឹតខំប្រឹងប្រែងទៀត ដើម្បីស្រូបយកប្រយោជន៏ពីកិច្ចសហការតំបន់នេះឲ្យបានច្រើនជាអតិបរមា”៕
