ដោយវុត្ថា
ភ្នំពេញៈ បច្ចុប្បន្នទីផ្សារដីធ្លី មានសកម្មភាពកើនឡើងdគួរឲ្យកត់សម្គាល់ នៅក្នុងភូមិសាស្ត្រនានានៅទូទំាងប្រទេសកម្ពុជា។ ការទិញ-លក់ដីទាំងនោះ ភាគច្រើនធ្វើឡើង តាមរយៈលិខិតផ្ទេរសិទ្ធិកាន់កាប់ដីធ្លី ដែលមិនទាន់ចុះបញ្ជី (ប្លង់ទន់) វាស់វែងដោយគណៈកម្មការក្រុង-ស្រុក និងមានភ្ជាប់គំនូសបង្ហាញទីតាំង ដែលបញ្ជាក់ទទួលស្គាល់ដោយរដ្ឋបាលសុរិយោដី ដើម្បីយកទៅបង់ពន្ធប្រថាប់ត្រា។
ប្រការនេះ បានធ្វើឱ្យរដ្ឋាភិបាលអនុវត្តន៍ ចំពោះការអនុវត្តនីតិវិធី នៃការវាស់វែងដីផ្ទេរសិទ្ធិ កាន់កាប់អចលនទ្រព្យ ដែលមិនទាន់ចុះបញ្ជី (ប្លង់ទន់)ដើម្បីចៀសវាងបញ្ហាវិវាទផ្សេងៗ ក្នុងការទិញលក់។ និតិវិធីដែលរដ្ឋាភិបាលត្រូវអនុវត្តមានដូចជា ទី១៖ រាល់ការស្នើសុំផ្ទេរសិទ្ធិ ដីធ្លីដែលមិនទាន់ចុះបញ្ជី ត្រូវអនុវត្តនីតិវិធីដូចការស្នើសុំចុះបញ្ជីដីធ្លីមានលក្ខណៈ ដាច់ដោយដុំដែរ ដោយត្រូវធ្វើការជូនដំណឹងស្តីពី ការវាស់វែងដល់អ្នកស្នើសុំ និងអ្នកជាប់ព្រំឲ្យមកចូលរួម និងត្រូវធ្វើការបិទផ្សាយជាសាធារណៈយ៉ាងតិច៧ថ្ងៃ។
ក្រោយពេលធ្វើការវាស់វែង ប្រមូលទិន្នន័យរួច ត្រូវចេញលិខិតជូនដំណឹង នៃការបិទផ្សាយទិន្ន័យដែលប្រមូលបាន បិទផ្សាយជាសាធារណៈនៅសាលាឃុំ-សង្កាត់ និងនៅការិយាល័យរៀបចំដែនដី នគរូបនីយកម្ម សំណង់ និងភូមិបាល ក្រុង-ស្រុក រយៈពេល ១៥ថ្ងៃទៀត ដើម្បីឲ្យស្របតាមអនុក្រឹត្យ១២១អនក្រ.បក ចុះថ្ងៃទី០៩ ខែមិថុនា ឆ្នាំ២០១៦ ស្តីពីការចុះបញ្ជីដីមានលក្ខណៈដាច់ដោយដុំ។
ទី២ ទម្រង់ពាក្យស្នើ សុំផ្ទេរសិទ្ធិកាន់កាប់ ដីធ្លីដែលមិនទាន់ចុះបញ្ជី អនុវត្តគំរូទម្រង់លិខិត ដូចពាក្យស្នើសុំចុះបញ្ជីដីធ្លីមានលក្ខណៈដាច់ដោយដុំ៕
