ដោយ គង់ សូរិយា
ភ្នំពេញ ការរៀបចំបុណ្យទន្លេលើកទី៤ ដែលនឹងប្រារពធ្វើឡើងនីក្រុងតាខ្មៅ ខេត្តកណ្តាល បាននិងកំពុងចាប់ផ្តើមយ៉ាងសស្រាក់សស្រាំ ស្របពេលមានការរំពឹងទុកថា ចំនួនមនុស្សជាង១លាននាក់ នឹងចូលរួមព្រឹត្តិការណ៍ទេសចរណ៍ប្រចាំឆ្នាំនេះ។
រដ្ឋមន្ត្រីក្រសួងទេសចរណ៍ លោកថោង ខុនបានថ្លែងឲ្យដឹងក្នុងការចុះពិនិ ត្យដំណើរការរៀបចំកម្មវិធីបុណ្យទន្លេ ដែលនឹងចាប់ផ្តើមចាប់ពីថ្ងៃទី៩ ដល់១១ មិនាខាងមុខនេះថា ការរៀបចំឲ្យមានជាកម្មវិធីបុណ្យទន្លេ ជាការជម្រុញរួមគ្នាថែរក្សានូវបរិស្ថាន និងជីវចម្រុះនៅតាមដងទន្លេ ដើម្បីនាំផលប្រយោជន៍ដល់ប្រជាជនកម្ពុជា។លោកបន្តថា ការរៀបចំឲ្យមានបុណ្យទន្លេនេះ គឺកម្ពុជាបានអនុវត្តន៍ទៅតាមក្របខណ្ឌ សហប្រតិបត្តិការសេដ្ឋកិច្ចជាច្រើន រួមមាន ក្របខណ្ឌសេដ្ឋកិច្ចមហាអនុតំបន់មេគង្គ មហាសេដ្ឋកិច្ចនៅក្នុងឡានឆាងមេគង្គ មេគង្គគង្គា កិច្ចសហការមេគង្គជប៉ុន និងកិច្ចសហការសេដ្ឋកិច្ច ចំពោះវិស័យនៅក្នុងអាស៊ានផងដែរ ក្នុងនោះគឺគោលបំណង ឲ្យប្រជាពលរដ្ឋ និងផ្នែកពាក់ព័ន្ធទាំងអស់រក្សា ឲ្យបាន ដើម្បីជម្រុញការអភិវឌ្ឍន៍នៅតាមដងទន្លេរ ។
លោកបន្តថា “បុណ្យទន្លេមានសារសំខាន់ណាស់ ព្រោះទន្លេមេគង្គមានប្រភពដ៏វែងឆ្ងាយ ដោយបានឆ្លងកាត់ប្រទេសចំនួន៥ ដែលមានប្រវែងជាង៤ពាន់គីឡូម៉ែត្រ និងឆ្លងកាត់ កម្ពុជាមានចំនួនជាង៥០០គីឡូម៉ែត្រ ក្នុងនោះទន្លេមេគង្គ នាំមកនូវផលប្រយោជន៍ជូនប្រជាជន នៅតាមដងទន្លេជាច្រើនផងដែរ។
អភិបាលខេត្តកណ្តាលលោកម៉ៅ ភិរុនបានថ្លែងឲ្យដឹងផងដែរថា ការរៀបចំបុណ្យទន្លេដែល រាជរដ្ឋាភិបាលបានជ្រើសរើសយកខេត្តកណ្តាលរៀបចំកម្មវិធីនេះ ពិតជាមានសារៈសំខាន់ណាស់ ក្នុងការផ្សព្វផ្សាយបន្ថែមទៀតនូវសក្តនុពលរបស់ខេត្ត ដូចជា វិស័យទេសចរណ៍ វិស័យសេដ្ឋកិច្ច និងវប្បធម៌ ដែលខេត្តកណ្តាលមានរាបរយឆ្នាំមក ហើយ ។ ក្នុងនោះការរៀចំពិធីបុណ្យនេះ សាលាខេត្តក៏បានសហការជាមួយក្រសួងពាក់ព័ន្ធ ក្នុងការរៀបចំផែនការជាច្រើន ដើម្បីឲ្យកម្មវិធីនេះប្រព្រិត្តទៅដោយរលូន និងដោយជោគជ័យ។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោកហូ វណ្ឌីបានថ្លែងថាបុណ្យទន្លេជាផលិតផលទេសចរណ៍ថ្មីមួយ ដែលវិស័យឯកជនតែងតែស្វាគមន៍និងរួមសហការ ព្រោះព្រឹត្តិការណ៍បែបនេះ ជាការលើកមុខមាត់ ក៏ដូចជាផ្សព្វផ្សាយសក្តានុពលនៅតាមដងទន្លេ និងការថែររក្សាបរិស្ថាន និងជីវចម្រុះនៅតាមដងទន្លេឲ្យមាននិរន្តរភាព និងទាក់ទាញទេសចរណ៍ជាតិ អន្តរជាតិបានកាន់តែច្រើន។
លោកបន្តថា “វាជាព្រឹត្តិការណ៍មួយជួយរំញោច ពីសក្តានុពលតាមដងទន្លេ និងធ្វើឲ្យពលរដ្ឋកាន់តែមានការយល់ដឹង និងចូលរួមថែររក្សាជីវចម្រុះនិងសក្តានុពលតាមដងទន្លេឲ្យកាន់តែល្អប្រសើរថែមទៀត”៕