ដោយ ដែន ចែងចាំង
ភ្នំពេញ៖ ប្រធានសមាគមទីភ្នាក់ងារទេសចរណ៍កម្ពុជា (CATA) លោកស្រី ឆាយ ស៊ីវលីន បានអំពាវនាវឲ្យអ្នកវិនិយោគជាតិ និងអន្តរជាតិចូលរួមវិនិយោគភោជនីយដ្ឋានខ្នាតធំ ដើម្បីអាចទទួលភ្ញៀវទេសចរណ៍អន្តរជាតិជាក្រុមបាន។
លោកស្រីបានថ្លែងឲ្យដឹងកាលពីសប្តាហ៍មុនថា បច្ចុប្បន្ននៅខេត្តកំពត កែប ខេត្តកោះកុង មិនទាន់មានភោជនីយដ្ឋានស្តង់ដាអន្តរជាតិ និងមានទំហំធំសម្រាប់ទទួលភ្ញៀវទេសចរណ៍ជាតិ អន្តរជាតិសម្រាប់ក្រុមធំៗនៅឡើយទេ។ហេតុនេះ ទាមទារឲ្យមានការវិនិយោគភោជនីយដ្ឋានខ្នាតធំ ដែលអាចដាក់ភ្ញៀវចន្លោពី៣០០ទៅ១០០០នាក់បាន ដើម្បីឲ្យខេត្តទាំងនោះកាន់តែមានភាពទាក់ទាញ និងក្រុមប្រតិបត្តិករទេសចរណ៍ អាចរៀបចំកញ្ចប់ទេសចរណ៍បានងាយស្រួល។
លោកស្រីឆាយ ស៊ីវលីនបានបន្តថា “បច្ចុប្បន្ននៅខេត្តតាមតំបន់ឆ្នេរទាំងបួន មានតែខេត្តព្រះសីហនុមួយប៉ុណ្ណោះ ដែលមានភោជនីយដ្ឋានស្តង់ដាអន្តរជាតិ និងអាចទទួលភ្ញៀវទេសចរណ៍បានច្រើន”។លោកស្រីបន្តថា “ខ្ញុំគិតថាយើងនៅតែទាមទារឲ្យមានការវិនិយោគបន្ថែមទៀត ដើម្បីទាក់ទាញភ្ញៀវទេសចរណ៍ឲ្យស្នាក់នៅយូរ និងចំណាយប្រាក់ច្រើននៅកម្ពុជា”។
រដ្ឋមន្រ្តីក្រសួងទេសចរណ៍លោកថោង ខុនធ្លាប់បានអំពាវនាវបែបនេះផងដែរ ដើម្បីឲ្យអ្នកវិនិយោគទុនជាតិ និងអន្តរជាតិវិនិយោគលើវិស័យបដិសណ្ឋារកិច្ច ដូចជា ភោជនីយដ្ឋាន និងសណ្ឋាគារនៅខេត្តព្រះសីហនុ និងខេត្តជាប់តំបន់ឆ្នេរដទៃទៀត ដោយសារខេត្តជាប់តំបន់ឆ្នេរមានសក្តានុពល និងចំនួនភ្ញៀវទេសចរណ៍បានកើនឡើងជាប់ជាប្រចាំ ដែលធ្វើឲ្យចំនួនបន្ទប់សណ្ឋាគារ និងផ្ទះសំណាក់មានការខ្វះខាត។
ប៉ុន្តែលោករដ្ឋមន្រ្តីក៏អំពាវនាវឲ្យមានការគិតគូរដល់បញ្ហាបរិស្ថាន ជាចំបងផងដែរ ដើម្បីធ្វើឲ្យការអភិវឌ្ឍន៍ធានាបាននូវនិរន្តរភាព៕