ដោយ គង់ សូរិយា
ភ្នំពេញ៖ ដំណឹងល្អមកដល់ហើយ បន្ទាប់ពីការចំណាយពេលសាងសង់អស់រយៈពេលប្រមាណ២ឆ្នាំ សួនសត្វធំជាងគេនៅរាជធានីភ្នំពេញ ឬ Safari World Phnom Penh នឹងបើកដំនើរការជាផ្លូវការនៅថ្ងៃទី១ មេសាខាងមុខនេះហើយ។
សួនសត្វធំជាងគេនេះ ជាការរៀបចំនិងរើទីតាំងចេញពីខេត្តកោះកុង មកកាន់សង្កាត់ព្រែកតាសេក ខ័ណ្ឌជ្រោយចង្វារ រាជធានីភ្នំពេញ ពោលគឺស្ថិតក្នុងទីក្រុងរណបតេជោមរកត នៃគំរោងអភិវឌ្ឍន៍របស់ក្រុមហ៊ុនលី យ៉ុងផាត់គ្រុប។
លោកឧកញ៉ា លី យ៉ុងផាត់ ធ្លាប់បានមានប្រសាសន៍ឲ្យដឹងតាមទូរស័ព្ទកាលពីពេលថ្មីៗនេះថា ការរើសួនសត្វពីខេត្តកោះកុង មកកាន់រាជធានីភ្នំពេញនេះ ដោយសារនៅរាជធានីភ្នំពេញ មានភាពល្អប្រសើរជាង ព្រោះមានមនុស្សច្រើនជាង មានភ្ញៀវទេសចរណ៍មកទស្សនាច្រើនជាង និងរំពឹងទទួលបានជោគជ័យ។លោកបន្តថា ទុនវិនិយោគលើសួនសត្វថ្មីនេះ មានទំហំទឹកប្រាក់ប្រមាណ៩លានដុល្លារអាមេរិក ជាការវិនិយោគដែលផ្តោតលើការកម្សាន្តដ៏សម្បូរបែប សម្រាប់ឲ្យប្រជាពលរដ្ឋបានចូលទស្សនា។
សួនសត្វ Safari World Phnom Penh មានការសម្តែងរបស់ស្វាអូរ៉ង់អូតង់ ការសម្តែងរបស់សត្វសេកពីអាហ្វ្រិក ការសម្តែងរបស់ថនិកសត្វដទៃទៀត និងមានសេវាកម្មកំសាន្តដ៏សម្បូរបែបជាច្រើនទៀតផងដែរ។
ក្រៅពីសួនកម្សាន្តដ៏ធំនេះ ក្រុមហ៊ុនលី យ៉ុងផាត់គ្រុបក៏បាននិងកំពុងបោះទុនវិនិយោគ៣០លានដុល្លារអាមេរិក ដើម្បីបង្កើតសួនទឹកកម្សាន្តធំជាងគេនៅរាជធានីភ្នំពេញ និងធំជាងគេក្នុងតំបន់អាស៊ានដោយដាក់ឈ្មោះ Angkor Water Parkផងដែរ។
ការបើកសួនសត្វធំជាងគេនៅរាជធានីភ្នំពេញនេះ ក៏ជាផ្នែកមួយនៃការប ង្កើតរមណីយដ្ឋានកែច្នៃ ដើម្បីទាក់ទាញភ្ញៀវទេសចរណ៍ជាតិ និងអន្តរជាតិផងដែរ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោកហូ វណ្ឌីបានថ្លែងថា ការបង្កើតសួនសត្វថ្មីនេះ ជាផលិតផលទេសចរណ៍ថ្មីមួយ សម្រាប់រាជធានីភ្នំពេញ ដែលធ្វើឲ្យប្រតិបត្តិករទេសចរណ៍នានា អាចរៀបចំកញ្ចប់ទស្សនកិច្ចបានល្អប្រសើរ ដោយភ្ជាប់ពីតំបន់សួនសត្វដ៏ធំនេះ មកកាន់រមណីយដ្ឋាននិងតំបន់ប្រវត្តិសាស្ត្រកណ្តាលក្រុង និងភ្ជាប់ទៅកាន់សួនសត្វភ្នំតាម៉ៅ ស្ថិតក្នុងស្រុកបាទី ខេត្តតាកែវ។
លោកបន្តថា “វិស័យឯកជនតែងតែអំពាវនាវឲ្យមានការវិនិយោគរមណីយដ្ឋានកែច្នៃបែបនេះ ដើម្បីធ្វើពិពិធកម្មផលិតផលទេសចរណ៍ និងទាក់ទាញឲ្យភ្ញៀវទេសចរណ៍មកទស្សនាកម្ពុជាឲ្យបានច្រើនថែមទៀត”៕
