ដោយ វុត្ថា
ភ្នំពេញ៖ ស្របពេលដែលវិស័យទេសចរណ៍ និងសេដ្ឋកិច្ចក្នុងប្រទេសកម្ពុជាមានការកើនឡើងពីមួយឆ្នាំទៅមួយឆ្នាំ បានធ្វើអោយអ្នកធ្វើជំនួញលើផ្នែកវិស័យអាកាសចរណ៍ស៊ីវិល បាននិងកំពុងចាប់អារម្មណ៍យ៉ាងខ្លាំងចំពោះវិស័យនេះ ពីមួយឆ្នាំទៅមួយឆ្នាំ ។
យោងតាមមជ្ឈមណ្ឌលអាកាសចរណ៍អាស៊ីប៉ាស៊ីហ្វិក (CAPA) បានចេញរបាយការណ៍បញ្ជាក់កាលពីពេលថ្មីៗនេះថា វិស័យអាកាសចរណ៍ស៊ីវិលនៅកម្ពុជា នឹងបន្តការកើនឡើងក្នុងឆ្នាំ២០១៨នេះបន្ថែមទៀត។ បច្ចុប្បន្នមានក្រុមហ៊ុនអាកាសចរណ៍ចំនួន៧ និងក្រុមហ៊ុនជាច្រើនទៀត នឹងចាប់ផ្តើមប្រតិបត្តិការនៅកម្ពុជាក្នុងឆ្នាំ២០១៨ ។
របាយការណ៍ដដែលបានបញ្ជាក់ថា “វិស័យអាកាសចរណ៍របស់ប្រទេសកម្ពុជា កំពុងរីកចម្រើនយ៉ាងឆាប់រហ័ស ដែលនាំឱ្យមានការពង្រីកយ៉ាងលឿនដល់វិស័យនេះនៅកម្ពុជា។របាយការណ៍បញ្ជាក់ថា“មានក្រុមហ៊ុនអាកាសចរណ៍ថ្មីចំនួន៣បន្ថែមទៀត គ្រោងនឹងចាប់ផ្តើមប្រតិបត្តិការនៅឆ្នាំ២០១៨នេះ ខណៈដែលក្រុមហ៊ុនអាកាសចរណ៍ មួយចំនួនដែលកំពុងដំណើរការហោះហើរ និងបន្តពង្រីកបន្ថែមទៀត។
ក្រុមហ៊ុន JC International Airlines ដែលបានដំណើរការមិនទាន់បានមួយឆ្នាំស្រួលបួលផងនោះ អាចនឹងក្លាយជាក្រុមហ៊ុនដឹកអ្នកដំណើរ តាមអាកាសក្នុងស្រុកដ៏ធំជាងគេនៅក្នុងចុងឆ្នាំ២០១៨ នេះ ។ ខណៈបច្ចុប្បន្ននេះ មានក្រុមហ៊ុន ពីរដែលធំជាងគេ បាននិងកំពុងប្រតិបត្តិការ ដឹកអ្នកដំណើរក្នុងស្រុកធំជាងគេ គឺ Cambodia Angkor Air និង Sky Angkor Air ដែលទទួលជោគជ័យខ្លាំង។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោកហូ វណ្ឌីបានថ្លែងថា បច្ចុប្បន្នវិស័យអាកាសចរណ៍ពិតជាមានការរីកចម្រើន ដោយសារចំនួនអ្នកធ្វើដំណើរតាមផ្លូវអាកាសច្រើនជាងតាមផ្លូវគោក និងផ្លូវទឹក។ កំនើនវិស័យអាកាសចរណ៍មួយឆ្នាំកើនប្រមាណ១០ភាគរយ ឬច្រើនជាងនេះ ដោយសារការកើនឡើងនូវចំនួនភ្ញៀវទេសចរណ៍ អ្នកវិនិយោគ និងអ្នកធ្វើដំណើរនានា។
លោកបន្តថា “ការរីកចម្រើនវិស័យនេះ ដោយសារគោលនយោបាយបើកចំហជើងមេឃរបស់រដ្ឋាភិបាល ការរីកចម្រើននៃការវិនិយោគ ការបើកចំហទីផ្សារសេរី ដែលធ្វើឲ្យអ្នកវិនិយោគជាតិ អន្តរជាតិបោះទុនកាន់តែច្រើន។លោកបន្តថា “ការប្រកួតប្រជែងក្នុងតំបន់ និងក្នុងប្រទេស និងកំនើនប្រាក់ចំណូលរបស់ប្រជា ពលរដ្ឋ ក៏រួមចំណែកយ៉ាងសំខាន់ដល់វិស័យនេះផងដែរ”៕
