ដោយ ដែន ចែងចាំង
ភ្នំពេញ៖ សម្តេចតេជោលើកឡើងថា ប្រទេសកម្ពុជារំពឹងថាទទួលបានចំនួន១០ពាន់លានដុល្លារនៅឆ្នាំ២០៣០ ពីភ្ញៀវទេសចរណ៍ចំនួន១៥លាននាក់ ដែលនឹងមកទស្សនាកម្ពុជា។
សម្តេចបានមានប្រសាសន៍ ក្នុងពិធីបិទសន្និបាតការងារក្រសួងទេសចរណ៍ នល្ងាចថ្ងៃទី២៨ កុម្ភៈនេះថា វិស័យនេះនឹងផ្តល់ការងារដោយផ្ទាល់ជិត១លាននាក់ ហើយនៅឆ្នាំ២០៣០ នឹងទទួលបានភ្ញៀវទេសចរណ៍១៥លាននាក់ និងបង្កើតការងារ២លាននាក់ និងចំណូល១០ពាន់លានដុល្លារអាមេរិក។
សម្តេចបន្តថា “សន្តិភាព ស្ថេរភាពនយោបាយ និងសន្តិសុខជាធាតុដ៏សំខាន់ សម្រាប់ធានាថា កម្ពុជាជាគោលដៅទេសចរណ៍ប្រកបដោយភាពកក់ក្តៅ។សម្តេចបន្តថា “គ្មានទេសចរណ៍ណាទៅទស្សនាប្រទេសដែលមានសង្គ្រាមនោះឡើយ ហេតុនេះកម្ពុជាមិនត្រឹមតែទប់ស្កាត់ភេវរកម្មនោះឡើយ សូម្បីតែចោរកម្មក្នុងវិស័យទេសចរណ៍ក៏ត្រូវទប់ស្កាត់ផងដែរ។
ជាមួយនេះសម្តេចក៏បានលើកឡើងថា “កម្ពុជានឹងក្លាយជាគោលដៅទេសចរណ៍ជាមួយស្នាមញញឹម រួសរាយរាក់ទាក់របស់ប្រជាពលរដ្ឋខ្មែរ។
ភ្ញៀវទេសចរណ៍នឹងមកកម្សាន្តនៅកម្ពុជា កាន់តែច្រើនថែមទៀត នៅពេលមានការវិនិយោគលើវិស័យទេសចរណ៍កាន់តែច្រើន ជាពិសេសការតភ្ជាប់ផ្លូវវអាកាស ផ្លូវគោក និងផ្លូវទឹក។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌីបានថ្លែងថា ប្រសិនជាកម្ពុជានៅរក្សាបានស្ថិរភាពនយោបាយ កំនើនសេដ្ឋកិច្ច និងលំហូរភ្ញៀវទេសចរណ៍នៅតែមានសញ្ញាវិជ្ជមានបែបនេះ និងមិនមានហេតុការណ៍ឬមហន្តរាយធម្មជាតិនានា ឬបញ្ហាភេវរកម្ម ឬការផ្ទុះសង្គ្រាមនៅលើពិភពលោកណាមួយកម្ពុជា នឹងសម្រេចបានតាមអ្វីជាការព្យាករណ៍របស់សម្តេចតេជោហ៊ុន សែននាយករដ្ឋមន្ត្រីកម្ពុជា។
លោកបន្តថា “បច្ចុប្បន្នវិស័យផ្លូវអាកាសកម្ពុជា កំពុងតែមានសញ្ញាវិជ្ជមាន ដោយចំនួនការហោះហើរ កំនើននៃក្រុមហ៊ុនអាកាសចរណ៍មកកម្ពុជា នឹងធ្វើឲ្យលំហូរទេសចរណ៍អន្តរជាតិមកទស្សនាកម្ពុជាកាន់តែច្រើនថែមទៀត”៕
