ដោយ ដែន ចែងចាំង
ភ្នំពេញ៖ អ្នកណាក៏ចង់ក្លាយជាអ្នកមានទ្រព្យសម្បត្តិច្រើនមែនទេ? ប៉ុន្តែការមិនដឹងពីវិធីសាស្ត្រដើម្បីក្លាយជាអ្នកមាន មិនមានចក្ខវិស័យច្បាស់លាស់ ការស្រម័យដើម្បីក្លាយជាអ្នកមានទ្រព្យធនច្រើន ប្រាកដជាមិនជោគជ័យនោះទេ។
គេហទំព័រ Propertyarea.asia សូមលើកយកប្រសាសន៍ និងវិធីសាស្ត្រអ្នក ជោគជ័យពីររូបមកបង្ហាញ ដែលពួកគាត់ជាឧកញ៉ាល្បីឈ្មោះក្នុងសង្គមកម្ពុជាផងដែរ។
លោកឧកញ៉ាលី ហួរអគ្គនាយកក្រុមហ៊ុនលី ហួរគ្រុបដែលលោកបានចាប់ផ្តើមអាជីវកម្មពីជ្រូកមួយក្បាល និងបច្ចុប្បន្នមានក្រុមហ៊ុនក្នុងដៃចំនួន៨បានមានប្រសាសន៍ឲ្យដឹងថា អ្នកចង់ធ្វើជាអ្នកមានត្រូវមានមហិច្ឆតាធំ និងត្រូវមានគោលដៅច្បាស់លាស់ថាខ្លួនចង់បានអ្វី និងធ្វើអ្វី ប៉ុន្តែមិនត្រូវធ្វើអ្វីដែលប្រាសចាកច្បាប់នោះទេ។
លោកឧកញ៉ាបន្តថា “យើងមិនត្រូវអស់សង្ឃឹមក្នុងជីវិត យើងត្រូវតែតស៊ូ និងត្រូវមានមហិច្ឆតា ព្រោះបើគ្មានមហិច្ឆតា យើងធ្វើអ្វីក៏អត់បានដែរ។
លោកឧកញ៉ាដែលល្បីឈ្មោះតំបូងពីហាងប្តូរប្រាក់លី ហួរនេះបានបន្តថា “កុំគិតទុទិដ្ឋិថាខ្លួនឯងធ្វើមិនបាន គេធ្វើបានក៏យើងធ្វើបានដែរ។ ត្រូវយល់ពីចំណុចនេះ។លោកបន្តថា “ទំរាំបានដូចសព្វថ្ងៃអាយុខ្ញុំជាង៦០ឆ្នាំហើយ ហើយអ្នកណាថាអ្នកមានស្រួល។
ចំណែកស្ត្រីដ៏មានឥទ្ឋិពលក្នុងពិភពជំនួញមួយរូបទៀត លោកជំទាវឧកញ៉ា លឹម ឈីវហូរ ក៏មានប្រវត្តិចាប់ផ្តើមការងារជំនួញពីតូចតាច រហូតដល់ក្លាយ ជាឧកញ៉ា និងមានក្រុមហ៊ុនជាបុត្រសម្ព័ន្ឋ នៃក្រុមហ៊ុនអ៊ែតវូដគ្រុបមិនតិចជាង១០នោះទេ។
លោកជំទាវបានមានប្រសាសន៍ឲ្យដឹងថា គ្មានអ្នកណាម្នាក់ កើតមានមានប្រាក់នោះទេ ដូច្នេះដើម្បីក្លាយជាអ្នកមានបាន គឺមានតែការសន្សំប្រាក់ប៉ុណ្ណោះ ឧទាហរណ៍ ពីរនាក់ប្តីប្រពន្ឋមានប្រាក់ខែចូលគ្នាបាន៥០០ទៅ១០០០ដុល្លារ ពួកគេអាចសន្សំសំចៃ និងដកប្រាក់ខ្លះទិញផ្ទះឬទិញដី ដើម្បីវិនិយោគឬសម្រាប់រស់នៅ ព្រោះសម័យនេះផ្ទះមានលក់បង់រំលោះ ហេតុនេះយើងបានបង់រំលោះបានងាយស្រួល។
លោកជំទាវបានបន្តថា“បើយើងសន្សំប្រាក់ និងបង់រំលោះផ្ទះក្នុងរយៈពេល៥ទៅ១០ឆ្នាំក្រោយ ផ្ទះនឹងឡើងថ្លៃ ពេលនោះយើងអាចមានលុយទាំងដុំកាន់ហើយ។លោកជំទាវបានបន្តថា “ប្អូនៗអាចចាយវាយ និងសន្សំដោយអត់ធ្មត់បន្តិច នឹងទទួលបានលុយហើយ ហើយ១០ឆ្នាំក្រោយ យើងអាចមានលុយដើម្បីវិនិយោគហើយ”៕
