ដោយ វុត្ថា
ភ្នំពេញ៖ ក្រសួងពាណិជ្ជកម្ម សហការជាមួយអាជ្ញាធរខេត្តរតនគិរី បានរៀបចំពិព័រណ៍ពាណិជ្ជកម្មលើកទី១ ឆ្នាំ២០១៨ ដើម្បីបង្ហាញសក្តានុពលសេដ្ឋកិច្ចរបស់ខេត្ត ក៏ដូចជាព្យាយាមទាក់ទាញអ្នកវិនិយោគ។
លោកញ៉ែម សំអឿន អភិបាលរងខេត្តរតនគិរីបានមានប្រសាសន៍ក្នុងពិធីបើកពិព័រណ៍កាលពីថ្ងៃម្សិលម៉ិញនេះថា ការរៀបចំពិព័រណ៍ពាណិជ្ជកម្មនេះ ក្នុងគោលបំណង បង្ហាញនូវផលិតផលសក្តានុពល និងសេវាកម្មដែលមាននៅក្នុងខេត្ត ដើម្បីបង្កើនការទាក់ទាញវិនិយោគ និងបង្កើតបរិយាកាសធុរកិច្ចនៅក្នុងខេត្ត ឲ្យកាន់តែល្អប្រសើរ និងដើម្បីផ្តល់លទ្ធភាពងាយស្រួល ជូនវិស័យឯកជនរបស់យើង ក្នុងការធ្វើពាណិជ្ជកម្ម និងពង្រីកទីផ្សារស្របតាមរបត់នៃសហគមន៍សេដ្ឋកិច្ចអាស៊ាន។
អនុរដ្ឋលេខាធិការក្រសួងពាណិជ្ជកម្មលោកវ៉េង សុធី បានមានប្រសាសន៍ថា ពិព័រណ៍ពាណិជ្ជកម្មខេត្តរតនគិរី គឺជាវេទិកាពាណិជ្ជកម្មមួយដ៏សំខាន់ សម្រាប់ឲ្យពាណិជ្ជករអាចសិក្សាស្វែងយល់ពិភាក្សាគ្នា និងផ្លាស់ប្តូរគំនិតទៅវិញទៅមកក្នុងប្រយោជន៍បង្កើតដៃគូពាណិជ្ជកម្ម និងចែករំលែកបទពិសោធន៍ ដើម្បីឈានទៅបង្កើតផលិតផលថ្មីៗ ដែលមានគុណភាពខ្ពស់ តម្លៃអាចប្រកួតប្រជែងបាន និងផ្គត់ផ្គង់ទីផ្សារក្នុងស្រុក ក៏ដូចជាទីផ្សារនាំចេញនាពេលអនាគត។
លោកបន្តថា “លទ្ធផលសំខាន់បំផុត ដែលលោកចង់បានពីពិព័រណ៍ពាណិជ្ជកម្មខេត្តរតនគិរីលើកទី១ ដែលមានរយៈពេល៥ថ្ងៃនេះ គឺការចុះកិច្ចសន្យាទិញ-លក់ និងការចុះកិច្ចព្រមព្រៀងពាណិជ្ជកម្មរួមគ្នា។ លោកបន្តថា “ខ្ញុំសូមជំរុញឲ្យអាជីវករ ពាណិជ្ជករទាំងអស់ ប្រើពេលវេលាដ៏មានតម្លៃនេះ ដើម្បីបង្កើតទំនាក់ទំនងពាណិជ្ជកម្មជាមួយគ្នាលក្ខណៈយូរអង្វែង។
ការរៀបចំពិព័រណ៍ពាណិជ្ជកម្មនេះ មានស្តង់សរុបចំនួន៧១ស្តង់ ដែលកំពុងប្រព្រឹត្តទៅចាប់ថ្ងៃទី១៤-១៨ ខែមីនា ឆ្នាំ២០១៨ នៅក្រុងបានលុង ខេត្តរតនគិរី៕