ដោយ ដែន ចែងចាំង
ភ្នំពេញ៖ ប្រទេសកូរ៉េបានសម្រេចទទួលយកពលករកម្ពុជា៤០០០នាក់បន្ថែមទៀត ទៅធ្វើការនៅប្រទេសរបស់ខ្លួន បើទោះបីជាប្រទេសនេះផ្តល់កូតាបន្ថែមដល់ប្រទេសថ្មីមួយទៀតក្តី តែមិនប៉ះពាល់ដល់ចំនួនពលករកម្ពុជា ដែលប្រទេសនេះទទួលយកនោះទេ។
ក្នុងជំនួបជាមួយលោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោកអូ ណាក់យ៉ុងឯកអគ្គរដ្ឋទូតកូរ៉េប្រចាំកម្ពុជាបានឲ្យដឹងកាលពីចុងសប្តាហ៍មុនថា នៅឆ្នាំ២០១៨នេះកូរ៉េ នឹងផ្តល់កូតាចំនួនប្រមាណ៤០០០នាក់ ដែលចំនួននេះមានប្រហាក់ប្រហែលនឹងឆ្នាំមុន។លោកបន្តថា ប្រទេសកូរ៉េបានសម្រេចទទួលយកពលករពីប្រទេសផ្សេង ប៉ុន្តែមិនប៉ះពាល់ដល់ចំនួនពលករកម្ពុជា ដែលប្រទេសកូរ៉េត្រូវទទួលយកនោះទេ។
យោងតាមមន្ត្រីជំនាញក្រសួងការងារបានឲ្យដឹងថា ពលករកម្ពុជាបានធ្វើការល្អជាងគេនៅប្រទេសកូរ៉េ ដោយសារ ពួកគេបានគោរពច្បាប់ការងារ មិនខ្ជិលច្រអូស និងជាពលករមានភាពឧស្សាហ៍ព្យាយាម ទើបប្រទេសកូរ៉េបានផ្តល់ចំនួនកូតាច្រើនដល់កម្ពុជា។
លោកអ៊ិត សំហេង បានមានប្រសាសន៍ឲ្យដឹងថា ចំនួនប្រទេសដែលទទួលបានប្រព័ន្ឋអនុគ្រោះ (PPS) នាពេលនេះបានកើនឡើងប្រទេសមួយថែមទៀត ដូច្នេះភាគីកូរ៉េនឹងកាត់កូតាពីក្នុងប្រទេសចាស់ៗ ដើម្បីបន្ថែមកូតាដល់ពលករទៅឲ្យប្រទេសថ្មី ប៉ុន្តែបញ្ហានេះក៏មិនប៉ះពាល់មកដល់កម្ពុជានោះទេ។ លោកបន្តថា កម្ពុជាបានស្នើរកូរ៉េជួយលើជំនាញសេវាកម្មបន្ថែមពីលើជំនាញបច្ចុប្បន្ន គឺជំនាញឧស្សាហកម្មនិងកសិកម្ម ហើយបញ្ហានេះ ភាគីកូរ៉េសុំពេលពិចារណាផងដែរ ខណៈដែលនៅប្រទេសកូរ៉េមិនទាន់បានគិតលើជំនាញនេះនៅឡើយ។
គិតមកទល់ពេលនេះពលករខ្មែរ ដែលបាននិងកំពុងធ្វើការ នៅសាធារណរដ្ឋកូរ៉េ មានចំនួនសរុបជាង៥៤,០០០នាក់៕
