ដោយ ដែន ចែងចាំង
ភ្នំពេញ៖ ដើម្បីបង្កបរិយាកាសសប្បាយរីករាយ ដល់អតិថិន ម្ចាស់ផ្សាររាត្រីកុងទីណ័រ ”ភូមិមូល” នឹងរៀបចំកម្មវិធីពិសេសមួយ ដោយមានការចូលរួមសម្តែងពីតារាល្បីៗ ក្រុមបង្ហាញម៉ូត និងក្រុមម៉ូតូធំនាថ្ងៃចុងសប្តហ៍នេះ។
លោកសោម កែវម៉ាលីដា តំណាងម្ចាស់ផ្សាររាត្រីកុងទំណ័រ”ភូមិមូល” ស្ថិតនៅលើបណ្តោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខ័ណ្ឌសែនសុខ(ទល់មុខសាកលវិទ្យាល័យលឹមកុកវីង) បានមានប្រសាសន៍ឲ្យដឹង តាមទូរស័ព្ទនាល្ងាចថ្ងៃទី២៣ មិនានេះថា ផ្សាររាត្រីកុងទំណ័រ “ភូមិមូល”នៅតែបើកដំណើរការធម្មតា ចាប់ពីម៉ោង៦ ដល់១២យប់។ លោកបន្តថា ផ្សារនេះតែងតែមានកម្មវិធីពិសេសៗ សម្រាប់បំរើការកំសាន្តសប្បាយរបស់អតិថិជន ជាក់ស្តែងនៅថ្ងៃទី២៤ និងថ្ងៃទី២៥មិនានេះ ផ្សាររាត្រីកុងទំណ័រនឹងមានការចូលរួមសម្តែងពីតារាចម្រៀងសាន ផានិត ក្រុមបង្ហាញម៉ូត និងក្រុមម៉ូតូធំ។
ចំណែកថ្ងៃទី២៥ មិនាចាប់ពីម៉ោង៦ដល់១២យប់ នឹងមានការចូលរួមសម្តែងរបស់តារាចម្រៀងOriginal Song ក្រុម DJ មកពីប្រទេសថៃ និងក្រុមម៉ូតូធំផងដែរ។
លោកសោម កែវម៉ាលីដាបានបន្តថា ផ្សាររាត្រីកុងទីណ័រភូមិមូលបានចាប់ផ្តើមបើកដំណើរការចាប់ពីថ្ងៃទី២៨ ខែធ្នូ ឆ្នាំ២០១៧ រហូតមកទល់ពេលនេះទទួលបានការគាំទ្រយ៉ាងខ្លាំងពីអតិថិជន ដែលភាគច្រើនជាប្រជាជនមានជីវភាពថ្នាក់កណ្តាល និងក្រុមយុវជន ដែលនិយមទៅទទួលទានអាហារ និងភេសជ្ជៈនានាក្នុងផ្សារដ៏ទាក់ទាញមួយនេះ។
ផ្សាររាត្រីកុងទីណ័រភូមិមូល ស្ថិតនៅលើផ្ទៃដី២៤០០ម៉ែត្រការ៉េ ចែកចេញជាស្តង់ចំនួន៧២ ដោយមានអាហារពិសេសៗដូចជា បបរកង្កែប មីហិរ ភោជនីយដ្ឋានចម្រុះ បារ៍កម្សាន្តអារម្មណ៍ជាដើម៕