ដោយ វុត្ថា
ភ្នំពេញៈ អ្នកជំនាញអះអាងថាចំការដូង ស្ថិតក្នុងខ័ណ្ឌដង្កោ បានក្លាយទៅជាបណ្តុំលំនៅឋានដ៏ពេញនិយមរបស់ទីក្រុងភ្នំពេញ ក្នុងរយៈពេលប៉ុន្មានឆ្នាំកន្លងមកនេះ ខណៈដែលគម្រោងរបស់ក្រុមហ៊ុនអភិវឌ្ឍល្បីៗជាច្រើន បានសម្រុកទៅកាន់ទីនោះ ហើយបានអភិវឌ្ឍស្របទៅនឹងផែនការអភិវឌ្ឍន៍ក្រុងរបស់រាជរដ្ឋាភិបាលកម្ពុជា។
អគ្គនាយកក្រុមហ៊ុនភ្នាក់ងារអចលនទ្រព្យ Kraty Realty Co., Ltd លោក ចក់ ស៊ីណាត បានប្រាប់គេហទំព័រ propertyarea.asia នៅថ្ងៃទី ២០ ខែឧសភា ឆ្នាំ ២០២០នេះឱ្យដឹងថា ចាប់ពីឆ្នាំ២០១៦ រហូតមកដល់ពេលបច្ចុប្បន្ននេះ តំបន់ចំការដូរបានរីកចំរើន និងប្រែក្លាយជាតំបន់លំនៅឋានយ៉ាងលឿន និងពេញនិយម បន្ទាប់ពីមានក្រុមហ៊ុនអភិវ ឌ្ឍន៍ធំៗទៅកាន់ទីនោះ។
លោកបន្តថា “បើកាលពីមុនយើងមិនមានឃើញក្រុមហ៊ុនអភិវឌ្ឍន៍ ណាទៅកាន់ធ្វើសកម្មភាពនៅទីនោះឡើយ ទើបតែចន្លោះពីឆ្នាំ២០១៦ និង២០២០នេះ មានក្រុមហ៊ុនអភិវឌ្ឍលំនៅឋានទៅអភិវឌ្ឍន៍ទីនោះ ដែលធ្វើឱ្យតម្លៃដីធ្លីកើន ប្រមាណ៤ទៅ៥ ដង ។ ចំណែកតម្លៃលំនៅឋានវិញ ប្រមាណ១០០ភាគរយទៅតាមប្រភេទ និងទីតាំង” ។
លោកសាវុធ ដាណា ម្ចាស់បុរីហេងណា បានឱ្យដឹងដែរថា តំបន់ចំការដូងនេះ មានហេដ្ឋារចនាសម្ព័ន្ធល្អ បើធៀបទៅនឹងតំបន់ផ្សេងទៀតរបស់ទីក្រុងភ្នំពេញ ស្របទៅនឹងផែនការការអភិវឌ្ឍន៍ក្រុង ។ ហើយតំបន់នេះទៀតសោតមានផ្លូវធំៗជាច្រើន និងផ្លូវខ្វាត់ខ្វែងផ្សេងទៀតបុកចេញចូលទៅកាន់ទីនោះ។
លោកថា “កត្តាទាំងនេះហើយទើបធ្វើឱ្យតំបន់នេះ មានសក្តានពល់ខ្ពស់ក្នុងវិនិយោគលើវិស័យលំនៅឋាន និងបុរីផ្សេង ៗក្នុងរយៈពេលប៉ុន្មានឆ្នាំកន្លងមកនេះ និងបន្តរីកចំរើនទៅមុខទៀត ជាពិសេសតំបន់នេះ នៅក្បែរនឹងភ្នំពេញ។លោកបន្តថា “ពីមុនយើងគិតថា ទួលពង្រមានការអភិវឌ្ឍន៍ខ្លាំង តែបើនិយាយជារួមតំបន់ព្រៃសរ និងតំបន់ចំការដូងមកកាន់ភ្នំពេញ ហាក់មានស្ថានភាពជិតជាង និងមានការអភិវឌ្ឍជាង ព្រោះវាមានគម្រោងធំៗទៅកាន់ទីនោះ ជាពិសេសបើទៅកាន់ផ្សារទំនើបអេអន៣ តាមផ្លូវ៥០ម៉ែត្រនៅជិតបង្កើយ” ។
លោកបញ្ជាក់ទៀថា “នៅតំបន់ចំការដូង រហូតដល់តំបន់ព្រៃសរ មានក្រុមហ៊ុនអភិវឌ្ឍន៍លំនៅឋានធំៗ មិនតិចជាង១០ នៅមានក្រុមហ៊ុនផ្សេងៗជាច្រើនទៀត បាននឹងកំពុងអភិវឌ្ឍន៍នៅក្នុងតំបន់នេះផងដែរ” ។
អគ្គនាយកក្រុមហ៊ុនអចលនទ្រព្យ Century21 Fortuna Investment លោក វ៉ា វិរៈ បានទទួលស្គាល់នូវភាពរីកចម្រើន និងសន្ទុះនៃការអភិវឌ្ឍគម្រោងលំនៅនៅជាច្រើននៅតំបន់ខាងលើនេះ ដោយលាកបានអះអាងថា រាល់គម្រោងអភិវឌ្ឍន៍នានាសុទ្ធតែត្រូវបានសិក្សាពីគម្រោង និងផែនការរបស់រដ្ឋាភិបាល ជាពិសេសនៅពេលដែលមានលំហូរប្រជាជនចូលទៅរស់នៅកាន់តែច្រើន។
លោកបានបញ្ជាក់ថា “មនុស្សអាចចូលទៅរស់នៅតំបន់ណាមួយបាន គឺទាល់តែតំបន់នោះ មានហេដ្ឋារចនាសម្ព័ន្ធគ្រប់គ្រាន់ និងងាយស្រួលប្រើប្រាស់ជាពិសេសផ្លូវថ្នល់ រួមជាមួយទីតាំងបម្រើសេវាសាធារណៈ” ។
លោកវ៉ា វីរៈបានបន្តទៀតថា សម្រាប់តំបន់ព្រៃស និងចំការដូងនៃ ខណ្ឌដង្កោ ពេលនេះស្ថិតនៅមិនឆ្ងាយពីក្រុងនោះទេ ជាពិសេសមានភាពងាយស្រួល ក្នុងការធ្វើដំណើរទៅទីតាំងផ្សេងៗ ដូចជាចេញចូលក្នុងរាជធានីភ្នំពេញ ចេញទៅផ្លូវជាតិលេខ៣ ចេញទៅផ្លូវជាតិលេខ២ ចេញទៅក្រុងតាខ្មៅ ក៏ដូចជាឆ្ពោះមកកាន់តំបន់ពាណិជ្ជកម្មពិសេស ដែលស្ថិតនៅតាមបណ្តោយផ្លូវ៦០ម៉ែត្រជាដើម។
លោកបានបញ្ជាក់ថា “វត្តមានរបស់ក្រុមហ៊ុនអភិវឌ្ឍន៍លំនៅឋាន ដែលចូលទៅកាន់តំបន់ខាងលើនេះនៅមិនទាន់គ្រប់គ្រាន់នោះទេ ព្រោះនឹងមានគម្រោងថ្មីៗចូលបន្ថែមទៀតនៅពេលខាងមុខនេះ ដោយសារតែទីតាំងតំបន់មានភាពល្អប្រសើរ ងាយស្រួលក្នុងការរស់នៅ និងប្រកបអាជីវកម្ម” ៕
