ដោយ វុត្ថា
ភ្នំពេញ៖ តើចិនតភ្ជាប់បណ្តាញគមនាគមន៍យ៉ាងដូចម្តេច ពិសេសខ្សែរថភ្លើងឆ្លងកាត់តំបន់ ដើម្បីពង្រីកគោលនយោបាយផ្លូវសូត្រ (ខ្សែក្រវ៉ាត់មួយ ផ្លូវមួយ)របស់ខ្លួន។
តាមការពិតបណ្តាញដឹកជញ្ជូនតាមផ្លូវដែករបស់ចិន កំពុងបោះជំហានទៅមុខ និងជួយសម្រួលដល់ការផ្លាស់ប្តូរទំនិញឆ្លងដែនថ្មី ចាប់តាំងពីរដ្ឋាភិបាលនៃប្រទេសចិនដាក់ឲ្យដំណើរគោលនយោបាយ ផ្លូវមួយ និងខ្សែក្រវ៉ាត់ (Belt and Road Initiative) កាលពីឆ្នាំ២០១៣។
យោងតាមសាជីវកម្មផ្លូវដែករបស់ប្រទេសចិនបានឱ្យដឹងថា គិតចាប់ពីខែកញ្ញា ឆ្នាំ២០១៧រថភ្លើងដឹកទំនិញជាង២០គ្រឿង បានរត់ជារៀងរាល់ថ្ងៃរវាងតំបន់អាស៊ីកណ្តាល និងប្រទេសចិន ហើយចាប់តាំងពីឆ្នាំ២០១៣ មកប្រទេសចិនបានដាក់ដំណើរការតភ្ជាប់ បណ្តាញពាណិជ្ជកម្មជាង៥០ជាមួយបណ្តាប្រទេសនៅអាស៊ីកណ្តាល និងអឺរ៉ុបដើម្បីបង្កើនពាណិជ្ជកម្ម និងពង្រឹងការតភ្ជាប់សេដ្ឋកិច្ច។
ប្រធានាធិបតីនៃប្រទេសចិន លោក Xi Jinping បាននិយាយកាលពីកន្លងទៅថា “យើងសូមស្វាគមន៍គ្រប់ប្រទេសទាំងអស់ នៅតាមបណ្តោយផ្លូវទាំងនៅក្នុងតំបន់អាស៊ី មិត្តភក្រ និងដៃគូទាំងអស់នៅក្នុងពិភពលោក ចូលរួមជាមួយគោលនយោបាយ Belt and Road Initiative (BRI) សម្រាប់តភ្ជាប់សេដ្ឋកិច្ច ដើម្បីទទួលបានការផលប្រយោជនស្មើរៗគ្នា”។
លោកប្រធានាធិបតីចិនដ៏មានឥទ្ឋិពលរូបនេះបានបន្តថា BRI នឹងជួយប្រទេសនានា ឱ្យរៀបចំយុទ្ធសាស្រ្តអភិវឌ្ឍន៍ និងបង្កើតផែនការបន្ថែមដោយគ្មានចេតនានៃការជំនួសយន្តការ ឬគំនិតផ្តួចផ្តើមសម្រាប់កិច្ចសហប្រតិបត្តិការក្នុងតំបន់ និងពិភពលោក។
ក្នុងរយៈពេល៥ឆ្នាំកន្លងមកនេះ BRI បានក្លាយទៅជាការពិតដោយ គិត
ត្រឹមខែធ្នូឆ្នាំ២០១៧ប្រទេសចិន បានចុះហត្ថលេខាលើកិច្ចព្រមព្រៀងសហប្រតិបត្តិការជាង១០០ជាមួយបណ្តាប្រទេសចំនួន៨៦ និងអង្គការអន្តរជាតិនានាជាច្រើនទៀត៕
