ដោយ ៖ រ៉ាណេ
ព្រះសីហនុ ៖ គម្រោងធ្វើឱ្យប្រសើរឡើងនូវវិថីសុវត្ថិភាពសម្ដេចសង្ឃរាជទេពវង្ស និងផ្លូវលេខ១៤៨ បំបែកចេញពីផ្លូវជាតិលេខ៤ ត្រង់គីឡូម៉ែត្រ១៧៨ +១៦៥ រង្វង់មូលសម្ដេចសង្ឃរាជទេពវង្សដល់រង្វង់មូលស្ទឹងហាវ រួចបន្តរហូតដល់កំពង់ផែ ដែលជាផ្លូវវាងក្រុងដ៏សំខាន់ កំពុងត្រូវបានជំរុញ និងពន្លឿនការសាងសង់ និងបញ្ចប់ក្នុងពេលដ៏ខ្លីខាងមុខនេះ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី៣១ ខែឧសភា ឆ្នាំ២០២០ បានចុះមើលវឌ្ឍនភាពសាងសង់ផ្លូវលេខ ១៤៦បេ ឬវិថីសុវត្ថិភាពសម្ដេចសង្ឃរាជទេពវង្ស និងផ្លូវលេខ១៤៨ ដើម្បីពិនិត្យគុណភាពនៃការសាងសង់ សំដៅធានាឱ្យបានតាមស្តង់ដាដែលអាចទទួលយកបាន ពោលគឺធ្វើផ្លូវឱ្យមានគុណភាពរឹងមាំ អាចប្រើប្រាស់ជាប់បានយូរអង្វែង។
លោកទេសរដ្ឋមន្ត្រីបានបញ្ជាក់ថា “កំណាត់ផ្លូវនេះគឺជាផ្លូវវាងក្រុងដ៏មានសក្ដានុពលសម្រាប់បម្រើឱ្យការដឹកជញ្ជូនទំនិញនាំចេញ-ចូលតាមនាវា កសិផល និងជលផលរបស់បងប្អូនប្រជាពលរដ្ឋ នៅស្រុក ស្ទឹងហាវ ក៏ដូចជាបងប្អូនរស់នៅតំបន់ទំនប់រលកចាស់នៃក្រុងព្រះសីហនុ ទៅកាន់ទីផ្សារ កាន់តែមានលក្ខណៈងាយស្រួល ឆាប់រហ័ស និងចំណាយតិច និងបានចូលរួមចំណែកយ៉ាងច្រើនដល់ការកាត់បន្ថយការកកស្ទះចរាចរណ៍តាមផ្លូវជាតិលេខ៤ ចំពោះរថយន្តដឹកជញ្ជូនទំនិញធុនធ្ងន់ដូចជាកុងទីន័រ ជាដើម” ។
គម្រោងធ្វើឱ្យប្រសើរឡើងកំណាត់ផ្លូវខេត្តលេខ១៤៦បេ ឬវិថីសុវត្ថិភាពសម្ដេចសង្ឃរាជ ទេព វង្ស និងផ្លូវលេខ១៤៨ មានប្រវែងសរុប ៤៣,០២៥ គីឡូម៉ែត្រ ចាប់ពីបំបែកផ្លូវជាតិលេខ៤ ត្រង់គីឡូម៉ែត្រលេខ ១៧៨+១៦៥ ស្ថិតនៅភូមិវាលធំ ឃុំវាលរេញ ស្រុកព្រៃនប់ ដល់រង្វង់មូលស្ទឹងហាវ ស្ថិតនៅភូមិ១ ឃុំអូរត្រេះ ស្រុកស្ទឹងហាវ និងបន្តរហូត ដល់កំពង់ផែក្រុងព្រះសីហនុ ខេត្តព្រះសីហនុ។
ផ្លូវទាំងនេះ សាងសង់ដោយចាក់បេតុងកៅស៊ូ AC ទទឹងសរុប ១១ម៉ែត្រកម្រាស់៩សង់ទីម៉ែត្រ និងចិញ្ចើមគ្រួសក្រហម ០,៥០ ម៉ែត្រសងខាង ចាប់ពីរង្វង់មូលសម្ដេចសង្ឃរាជទេពវង្ស PK០+០០០ ដល់ PK២០+៦៧៨ ប្រវែង២០,៦៧៨គីឡូម៉ែត្រ និងចាក់បេតុងសរសៃដែកទទឹង ១១ម៉ែត្រកម្រាស់២៦សង់ទីម៉ែត្រប្រវែង ២២,៣៤៧ គីឡូម៉ែត្រនិងចិញ្ចើមគ្រួសក្រហម ០,៥០ម៉ែត្រ សងខាងចាប់ពី PK២០+៦៧៨ ដល់ PK៤៣+០,២៥។
កំណាត់ផ្លូវនេះសាងសង់ដោយក្រុមហ៊ុនសាជីវកម្មស្ពានថ្នល់ចិន (CRBC) ត្រួតពិនិត្យបច្ចេកទេសដោយនាយកដ្ឋានផ្លូវថ្នល់ នាយកដ្ឋានហេដ្ឋារចនាសម្ព័ន្ធសាធារណ: និងនាយកដ្ឋានបច្ចេកទេសសាធារណការ និងដឹកជញ្ជូន នៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន ប្រើប្រាស់រយ:ពេលសាងសង់ចំនួន ២៨ ខែ ដោយគិតចាប់ពីថ្ងៃបើកការដ្ឋានសាងសង់នាថ្ងៃទី១៧ ខែមេសា ឆ្នាំ២០២០ ដែលជាការចំណាយថវិកាសន្សំរបស់ជាតិ៕
