ដោយគង់ សូរិយា
ភ្នំពេញៈ វីរៈស្ថាបត្យករកម្ពុជា លោកវណ្ណ ម៉ូលីវណ្ណបានបន្សល់ស្នាដៃជាច្រើនមុនពេលលោកបានលាកម្ពុជាដោយគ្មានថ្ងៃត្រលប់ រាប់ទាំងស្តាតអូឡាពិក សាលសន្និសីទចតុមុខ អាគារខ្យល់ក្នុងវិទ្យាស្ថានភាសាបរទេសជាដើម។
តើគេហដ្ឋានវីរៈស្ថាបត្យករវណ្ណ ម៉ូលីវណ្ណដែលដាក់លក់តម្លៃ៧លានដុល្លារមានលក្ខណៈពិសេសបែបណា?
ជាមួយនឹងមរណៈភាពរបស់លោកយ៉ាងងស្ងៀមស្ងាត់មិនបានប៉ុន្មានឆ្នាំ ស្រាប់តែកាលពីពេលថ្មីៗនេះ ក្រុមហ៊ុនអចលនទ្រព្យIPS Cambodiaបានទទួលសិទ្ឋពីគ្រួសារ របស់លោកវណ្ណ ម៉ូលីវណ្ណដើម្បីលក់គេហដ្ឋានផ្ទាល់របស់លោក ដោយដាក់លក់តម្លៃ៧លានដុល្លារអាមេរិក។
គេហដ្ឋានស្ថាបត្យករដ៏ល្បាញល្បីរូបនេះ មានទីតាំងស្ថិតនៅលើមហាវិថី ម៉ៅ សេទុង ក្បែរភោជនីយដ្ឋានទន្លេបាសាក់នៅកណ្តាលរាជធានីភ្នំពេញ។
ក្រុមហ៊ុនអចលនទ្រព្យ IPS Cambodia បានប្រកាសដាក់លក់គេហដ្ឋានស្ថាបត្យករល្បី លោក វណ្ណ ម៉ូលីវណ្ណ នៅភ្នំពេញក្នុងតម្លៃ៧លានដុល្លារអាមេរិក។ ដីទាំងមូលនៃគេហដ្ឋាននេះមានទំហំជាង៩០០ម៉ែត្រក្រឡា។ តាំងពីការប្រកាសដាក់លក់មក មានអតិថិជនសាកសួរ ជាបន្តបន្ទាប់ផងដែរប៉ុន្តែនៅតែមិនទាន់ត្រូវថ្លៃគ្នា។
យោងតាមប្រភពស្និទ្ធបំផុតជាមួយលោកវណ្ណ ម៉ូលីវណ្ណ បានបង្ហើបថា គេហដ្ឋានលោកវណ្ណ ម៉ូលីវណ្ណ បានកសាងឡើងនៅឆ្នាំ១៩៦៥ និងសាងសង់រួចរាល់ហើយតែម្តងនៅឆ្នាំ១៩៦៦។
ប្រភពដដែលបានបញ្ជាក់ទៀតថា សំណង់គេហដ្ឋានលោកនៅមានសភាពរឹងមាំល្អ ដែលគុណភាពអាគារអាចប្រើប្រាស់ បានរហូតដល់១០០ឆ្នាំទៀត។
លោកស្ថាបត្យករ វណ្ណ ម៉ូលីវណ្ណ កើតនៅឆ្នាំ១៩២៦ នៅក្នុងខេត្តកំពត។ លោក វណ្ណ ម៉ូលីវណ្ណ គឺជាសិស្សទី១ដែលបានប្រឡងជាប់បាក់ឌុបនៅវិទ្យាល័យស៊ីសុវត្ថិនៅឆ្នាំ១៩៤៤។ នៅឆ្នាំ១៩៤៧–១៩៥៦ លោកបានទៅសិក្សាផ្នែកស្ថាបត្យកម្មនៅទី ក្រុងបារីសប្រទេសបារាំង៕
