ដោយៈ រ៉ាណេត
ព្រះសីហនុៈ រយៈពេល៤ឆ្នាំចុងក្រោយនេះ លំហូរទុនវិនិយោគក្នុងវិស័យសំណង់នៅទូទាំងខេត្តព្រះសីហនុ បានកើនឡើងរហូតដល់ជាង៧ពាន់លានដុល្លារ ទៅគម្រោងសាងសង់សរុបចំនួន១៣៥៥ គម្រោង។
អភិបាលខេត្តព្រះសីហនុ លោក គួច ចំរើន នៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅការងារបន្តរបស់រដ្ឋបាលខេត្តព្រះសីហនុ នាព្រឹកថ្ងៃទី៩ ខែមិថុនា ឆ្នាំ២០២០ នៅទីស្ដីការគណរដ្ឋមន្ត្រីបានមានប្រសាសន៍ថា ពាក់ព័ន្ធទៅនឹងការគ្រប់គ្រង និងអភិវឌ្ឍន៍លើវិស័យសំណង់ នៅទូទាំងខេត្តព្រះសីហនុ គឺមានភាពរីកចម្រើនខ្លាំងគួរឱ្យកត់សម្គាល់ ជាពិសេសបានទាក់ទាញលំហូរទុនវិនិយោគ នៅក្នុងវិស័យនេះបានរហូតដល់ជាង៧ពាន់លានដុល្លារ។
ប្រធានមន្ទីររៀបចំដែនដី នគរូបនីយកម្ម និងសំណង់ និងសូរិយោដីលោក ចេង ស្រុង បានមានប្រសាសន៍ថា ការគ្រប់គ្រង និងអភិវឌ្ឍន៍វិស័យសំណង់នៅទូទាំងខេត្តព្រះសីហនុ ត្រូវបានបង្កើនការយកចិត្តទុកដាក់ ដែលគោរពទៅតាមវិធានការ និងការណែនាំរបស់រាជរដ្ឋាភិបាល ទៅលើការរឹតបណ្តឹងទៅលើគុណភាពសំណង់។
