ដោយ ៖ ប៊ី
ភ្នំពេញ ៖ កម្លាំងទិញខុនដូរបស់ប្រជាជនក្នុងស្រុក ពិសេសយុវជន ចាប់ផ្តើមមានការកើនឡើងគួរឱ្យកត់សម្គាល់ ខណៈមានព័ត៌មានអប់រំពីអត្ថប្រយោជន៍នៃការប្រើប្រាស់ខុនដូសម្រាប់ប្រជាជននៅក្នុងស្រុកចាប់ផ្ដើមផុសផុលច្រើន ដែលជាកត្តាជំរុញឱ្យមានការកើនឡើងនៃការតម្រូវការក្នុងស្រុក។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានប្រាប់គេទំព័រ Propertyarea.asia នៅថ្ងៃទី១១ ខែមិថុនា ឆ្នាំ២០២០ ថា បច្ចុប្បន្នកម្លាំងទិញខុនដូរបស់យុវជនខែ្មរចាប់ផ្តើមមានការកើនឡើងគួរកត់សម្គាល់ ដោយសារមានព័ត៌មានអប់រំពីអត្ថប្រយោជន៍នៃការប្រើប្រាស់ខុនដូសម្រាប់ប្រជាជននៅក្នុងស្រុកចាប់ផុសផុលច្រើន។
លោកបានថ្លែងថា “ចំនួនអ្នកប្រើប្រាស់ក្នុងស្រុកកាន់តែច្រើនឡើងៗ ហើយអ្នកប្រើប្រាស់ទាំងនោះគឺជាយុវជន មិនមែនប្រជាជនចាស់ៗ។ យុវជនឱ្យតែគាត់រៀបការហើយថ្មីថ្មោង ឬដល់វ័យដែលគាត់បែកផ្ទះចេញពីគ្រួសារភាគច្រើនគឺគាត់ប្រើខុនដូមួយរយៈចុងក្រោយនេះ”។
លោកបានឱ្យដឹងទៀតថា “ជារួម យើងបានពិពិធកម្មទីផ្សាររួចហើយដើម្បីចាប់យកទីផ្សារអ្នកទិញស្រុក តែវាត្រូវការពេលវេលាខ្លះ ព្រោះយើងមិនអាចធ្វើភ្លាម បានភ្លាមនោះទេ។ ដូច្នេះនាពេលខាង នៅពេលយើងមានលទ្ធភាព យើងនឹងទិញពីបរទេសត្រឡប់មកវិញ។ ប្រភេទខុនដូដែលពេញនិយមសម្រាប់ទីផ្សារគឺប្រភេទខុនដូ១ និង២បន្ទប់គេង ខណៈតម្លៃរបស់វាចណ្លោះពី ៧ម៉ឺន ទៅ១៣ម៉ឺនដុល្លារ”។
