ដោយៈ រ៉ាណេត
ភ្នំពេញៈ វិស័យអចលនទ្រព្យនៅតែជាគោលដៅសំខាន់ របស់មនុស្សជាច្រើនដដែល ទោះជាកំពុងប្រឈមនឹងវិបត្តិសេដ្ឋកិច្ចសាកល ដែលបច្ចុប្បន្នមានទាំងអ្នកបណ្តាក់ទុនវិនិយោគ អ្នកអភិវឌ្ឍន៍ ក៏ដូចជាអ្នកចាប់អាជីពជាភ្នាក់ងារទិញ-លក់-ជួល ជាដើមក្នុងគោលបំណងទទួលបានផលប្រយោជន៍ពីវិស័យមួយនេះ។
លោកលី សុខឆាយ អគ្គនាយកក្រុមហ៊ុនLSCG Real Estate Co, Ltd ដែលត្រូវបានអ្នកជំនួញជាច្រើន ជាពិសេសអ្នកប្រឡូកនៅក្នុងវិស័យអចលនទ្រព្យស្គាល់ថា ជាអគ្គនាយកក្រុមហ៊ុនអចល នទ្រព្យលេចធ្លោមួយរូប ដែលបានអភិវឌ្ឍន៍ខ្លួនចេញពីបុគ្គលិក បម្រើការងារជាអ្នករត់តុគុយទាវនោះ បានលើកឡើងថា ការចូលប្រឡូកនៅក្នុងវិស័យអចលនទ្រព្យ ជារឿងល្អ និងងាយស្រួល ប៉ុន្តែចង់ទទួលបានផលចំណេញច្រើនមិនងាយស្រួលនោះទេ។
លោកបានមានប្រសាសន៍ “គ្រប់ក្រុមហ៊ុនទាំងអស់ ដែលមានភាពរីកចម្រើន ទទួលបានទំនុកចិត្តច្រើនពីអតិថិជន និងមានក្រុមហ៊ុនពាក់ព័ន្ធជាច្រើនធ្វើជាដៃគូ គឺដោយសារតែក្រុមហ៊ុននោះបានផ្តល់នូវសេវាកម្មល្អ”។លោកបន្តថា “ការមានជំនាញច្បាស់លាស់ រួមនឹងភាពស្មោះត្រង់ ជាពិសេសលទ្ធភាពខ្ពស់ក្នុងការផ្តល់នូវប្រយោជន៍ ជាក់ស្ដែងដល់អតិថិជន រួមទាំងក្រុមហ៊ុនជាដៃគូ”។
អ្នកជំនាញអចលនទ្រព្យ ដែលបានឆ្លងកាត់ការបណ្តុះបណ្តាលជាច្រើន ពិសេសជំនាញពីCIPS លោកបានបន្តទៀតថា “គ្រប់ការប្រកបអាជីវកម្ម ការធ្វើជំនួញអ្វីក៏ដោយ គឺទាមទារឱ្យមានភាពស្មោះត្រង់ខ្ពស់បំផុត”។
លោកបន្ថែមថថា ចំពោះការប្រកបអាជីវកម្មនៅក្នុងវិស័យអចលនទ្រព្យ គឺរឹតតែត្រូវការភាពស្មោះត្រង់ ទាំងភ្នាក់ងារអចលនទ្រព្យ ភ្ញៀវ អ្នកទិញ និងម្ចាស់អចលនទ្រព្យ ជាពិសេស ត្រូវគោរពទៅតាមក្រមសីលធម៍វិជ្ជាជីវ:របស់ខ្លួន និងបញ្ញាត្តិច្បាប់នានា។ ក្នុងន័យនេះ បើអ្នកបំពានហើយ មិនថាក្រុមហ៊ុនអ្នកតូច ឬធំប៉ុនណានោះទេ លោកអ្នកនឹងប្រឈមមុខចំពោះច្បាប់ និងមានទោសទណ្ឌជាមិនខាន។ ដូច្នេះសម្រាប់អ្នកប្រកបអាជីវកម្មក្នុងវិស័យអចនទ្រព្យ សូមគោរពតាមក្រមសីលធម៍វិជ្ជាជីវៈរបស់ខ្លួន និងកុំចាត់ទុកភ្ញៀវអ្នកវិនិយោគបរទេសដំបូងៗ ជាសាច់ជ្រូកបីជាន់ឱ្យសោះ។
លោកលី សុខឆាយ ដែលជាអគ្គនាយកក្រុមហ៊ុន LSCG Real Estate Co.,Ltd និងជាសមាជិកសមាគមសម្ព័ន្ធខ្មែរ-ចិននៅកម្ពុជា ផងដែរនោះ មានបងប្អូនចំនួន៣នាក់ មានស្រុកកំណើតនៅស្រុកស្វាយប៉ោ ខេត្តបាត់ដំបង ដោយលោកជាកូនទី២នៅក្នុងគ្រួសារ។ កាលពីអតីតកាល លោកធ្លាប់បម្រើការងារជាអ្នកស៊ីឈ្នួលរត់តុគុយទាវឱ្យគេ និងបានបញ្ចប់ការសិក្សាថ្នាក់បរិញ្ញាប័ត្រផ្នែកច្បាប់ នៅសាកលវិទ្យាល័យនីតិសាស្រ្ត និងវិទ្យាសា ស្រ្តសេដ្ឋកិច្ច(RULE) រួមជាមួយនឹងបរិញ្ញាបត្រភាសាអង់គ្លេស នៅវិទ្យាស្ថានភាសាបរ ទេស (IFL) ហើយលោកក៏អាចប្រើប្រាស់ភាសាចិន ក្នុងកិច្ចទំនាក់ទំនងលើមុខជំនួញបានយ៉ាងល្អផងដែរ។
មុនពេលលោកសម្រេចចិត្តបើកក្រុមហ៊ុនអចលនទ្រព្យ LSCG Real Estate Co.,Ltd ដែលកំពុងមានដំណើរការយ៉ាងរលូន ដោយមានក្រុមហ៊ុនអចលនទ្រព្យជាតិ និងអន្តរជាតិជាច្រើនធ្វើជាដៃគូនៅពេលបច្ចុប្បន្ននេះ លោកធ្លាប់មានបទពិសោធន៍ផ្នែកទីផ្សា រអចលនទ្រព្យក្នុងស្រុកជាង១០ឆ្នាំ និងបានសិក្សាលើជំនាញអចលនទ្រព្យអន្តរជាតិ ដោយទទួលបានសញ្ញាបត្រ CIPS ដែលជាសមាជិកសមាគមអចលនទ្រព្យសហរដ្ឋអាមេរិក។
អ្វីដែលជាសមិទ្ធផលធំៗ ដែលលោកទទួលបានបន្ទាប់ ពីបើកដំណើរការក្រុមហ៊ុនអចលនទ្រព្យ LSCG Real Estate Co.,Ltdត្រឹមរយៈពេលជាង៣ឆ្នាំ រួមមានទី១ ពានរង្វាន់ប្រចាំឆ្នាំ២០១៩ ក្នុងនាមជា ក្រុមហ៊ុនភ្នាក់ងារអចលនទ្រព្យឆ្នើម ទី២ ភាពជោគ ជ័យ លើការសរសេរគម្រោងផែនការអាជីវកម្ម ដែលទទួលស្គាល់ពីសំណាក់ លោកឧកញ៉ា ពុង ឃាវសែ ប្រធានសមាគមសម្ព័ន្ធខ្មែរ-ចិន នៅកម្ពុជា។
គេហទំព័រPropertyarea.asia មានកិត្តិយសក្នុងការប្រកាសទទួលលោកលី សុខឆាយ ជាទីប្រឹក្សាជាន់ខ្ពស់ប្រចាំគេហទំព័រនេះ ចាប់ពីថ្ងៃទី១៩ មិថុនានេះតទៅ ដែលលោកនឹងរួមចំណែកក្នុងការគាំទ្រ និងផ្សព្វផ្សាយពីសក្តានុពលនៃគេហទំព័រនេះ ដល់អ្នកវិនិយោគជាតិ អន្តរជាតិ៕
