ដោយ ៖ រ៉ាណេត
ភ្នំពេញ ៖ ក្រោយកិច្ចដំណើរការភាពជាដៃគូលើការលក់គម្រោងមណ្ឌលពាណិជ្ជកម្ម និងលំនៅឋានសហកម្មសិទ្ធិបែបទំនើបនៃគម្រោង Morgan Group ក្នុងរយៈពេល១មួយកន្លងទៅនេះ ជាល្ធផលទទួលបានការគាំទ្រពីសំណាក់អ្នកវិនិយោគ ក៏ដូចជាអតិថិជនដែលមានតម្រូវការជាក់ស្ដែងគួរជាទីមោទន។
មានប្រសាសន៍នៅក្នុងពិធីអបអរសាទរនៃកិច្ចសហការលើការលក់រយៈពេលពេញមួយឆ្នាំ លោក ថេង ចាន់ថន បានមានប្រសាសន៍ថា តាមរយៈសមិទ្ធផលដែលទទួលបានក្រោយកិច្ចខិតខំរវាងថ្នាក់ដឹកនាំនៃក្រុមហ៊ុនទាំង២ រួមទាំងបុគ្គលិកជំនាញ គឺជាការបង្ហាញពីមោទនភាពរួមគ្នាមួយនៅក្នុងគម្រោងដ៏ធំអស្ចារ្យមួយនេះ។
លោក ថេង ចាន់ថន បានមានប្រសាសន៍បន្តទៀតថា “គម្រោងមណ្ឌលពាណិជ្ជកម្ម (ផ្សារទំនើប New city Walk) និងអគារស្នាក់នៅសហកម្មសិទ្ធិ Morgan Group គឺជាគម្រោងដ៏ធំ និងអស្ចារ្យលើកដំបូងប្រចាំនៅក្នុងតំបន់ជ្រោយចង្វារ រាជធានីភ្នំពេញ កំពុងតែបង្ហាញនូវភាពទាក់ទាញ និងការចាប់អារម្មណ៍យ៉ាងខ្លាំងពីសំណាក់អតិថិជនជាតិ និងអន្តរជាតិ”។
លោកបានបន្តទៀតថា “ក្នុងរយៈពេលពេញមួយឆ្នាំនៃកិច្ចដំណើរការលក់ជាដៃគូយ៉ាងជិតស្និទ្ធកាលពីពេលកន្លងទៅនេះ ជាលទ្ធផល ក្រៅពីបានធ្វើការពង្រីកផ្សព្វផ្សាយពីសក្ដានុពល និងអត្ថបរយោជន៍យ៉ាងច្រើនរបស់គម្រោងមណ្ឌលពាណិជ្ជកម្ម និងអាគារលំនៅដ្ឋានសហកម្មសិទ្ធិបែបទំនើបលើកដំបូងប្រចាំនៅតំបន់ជ្រោយចង្វារ តាមរយៈក្រុមហ៊ុនអចលនទ្រព្យ PAPA & MAMA ដែលមានជំនាញ និងបទពិសោធន៍នៅលើការគម្រោងនានាជច្រើនប្រកបដោយភាពជោគជ័យ សម្រាប់តែគម្រោងរបស់ Morgan Group ក្រុមហ៊ុនបានជម្រុញនូវភាពទាក់ទាញ និងអត្ថប្រយោជន៍ពីគម្រោងទៅដល់ដៃអតិថិជនយ៉ាងច្រើន”។
ជាមួយនឹងការទទួលបាននូវលទ្ធផលល្អលើទីផ្សារនៃការលក់គម្រោងខាងលើនេះ លោក ថេង ចាន់ថន បានបង្ហាញពីភាពជឿជាក់ក្នុងការជម្រុញល្បឿននៃការលក់ឱ្យកាន់តែមានភាពលេចធ្លោរនៃគម្រោងទាំងមូលក្នុងពេលដ៏ខ្លីឆាប់ៗខាងមុខនេះ។
តំណាងក្រុមហ៊ុនអភិវឌ្ឍន៍គម្រោងមណ្ឌលពាណិជ្ជកម្ម និងលំនៅឋានសហកម្មសិទ្ធិ Morgan Group លោក ជូ បានបង្ហាញពីក្ដីសាទរចំពោះលទ្ធផលដែលទទួលបានពីការលក់គម្រោងតាមរយៈក្រុមហ៊ុនអចលនទ្រព្យ PAPA & MAMA ហើយលោករំពឹងថា គម្រោងមួយនេះនឹងទទួលបានភាពជោគជ័យខ្ពស់ក្រោមកិច្ចសហការយ៉ាងជិតស្និទ្ធរវាងក្រុមហ៊ុនទាំង២នេះ ។
លោកបានបញ្ជាក់ថា ក្រុមហ៊ុនអភិវឌ្ឍន៍ Morgan Group នឹងមិនបញ្ចប់ការវិនិយោគ និងអភិវឌ្ឍន៍នៅត្រឹមគម្រោងមួយនេះនោះទេ ពោលគឺនៅមានគម្រោងផ្សេងទៀតដែលនឹងលេចរូបរាងថ្មីបន្ថែមទៀតនៅក្នុងទីផ្សារសំណង់ និងអចលនទ្រព្យក្នុងប្រទេសកម្ពុជា បន្ទាប់ពីគម្រោង Morgan Group តំបន់ជោយចង្វារត្រូវបានបញ្ចប់។
នៅក្នុងឱកាសនៃការអបអរសាទរនូវកិច្ចសហការភាពជាដៃគូលើការលក់គម្រោងខាងលើនេះ គ្រប់បណ្តាភ្ញៀវកិត្តិយស និងអតិថិជនដែលបានចូលរួម គឺសុទ្ធតែទទួលបានការចាប់ឆ្នោតផ្សងសំណាងទទួលយករង្វាន់ជាវត្ថុអនុស្សាវរីយ៍យ៉ាងច្រើន រួមជាមួយនឹងការទទួលបាននូវការបញ្ចុះតម្លៃរហូតដល់១៥ភាគរយ បន្ថែមពីលើសម្ភារៈប្រើប្រាស់នៅក្នុងយូនីតនីមួយៗផងដែរ។ ដោយឡែកសម្រាប់អតិថិជនដែលជួលស្តង់លក់នៅក្នុងផ្សារទំនើប New City Walk ក្រៅពីទទួលបានការបញ្ចុះតម្លៃ ថែមទាំងទទួលបានសេវាថែទាំ និងគ្រប់គ្រងសន្តិសុខពេញមួយឆ្នាំផងដែរ៕
